Babetesi
6 Pesi ma-Israyeli bakachita lubo zintu zibi mumeso aaJehova mpawo Jehova wakababikka mukuboko kwamaMidiyani kwaminyaka iili musanu ayibili. 2 MaMidiyani bakadyaaminina ma-Israyeli. Ma-Israyeli bakayanduula ndawu zyakuyubila* muzilundu, mumpako zyamabwe amundawu zikataazya kusika akaambo kamaMidiyani. 3 Ma-Israyeli nibakali kubyala mbuto, maMidiyani, ma-Amalekki, abantu baKubuzwezuba bakali kubalwana. 4 Bakali kukkempa kuti balwane ma-Israyeli, alubo bakali kunyonyoona zilimwa zyamunyika kuyoosika kuGaza, teebakali kubasiila chakulya niziba mbelele niiba ng’ombe niliba donki. 5 Nkaambo bakali kuza mubwiingi bwabo mbuli nsozi kabali aalubono amatente aabo. Bantu aabo ankamela zyabo teebakali kubalika pe. Bakali kuza munyika kuti bazooyinyonyoone. 6 Ma-Israyeli bakafwaba loko akaambo kamaMidiyani. Bakayita Jehova kuti abagwasye.
7 Ma-Israyeli nibakayita Jehova kuti abagwasye akaambo kamaMidiyani, 8 Jehova wakatuma mupolofita kuma-Israyeli wakababuzya kuti: “Nzezi nzyaamba Jehova Leza wa-Israyeli, ‘Ndakamugwisya munyika ya-Ijipita mung’anda yabuzike. 9 Ndakamuvuna kuzwa mukuboko kwama-Ijipita akubantu boonse bakali kumudyaaminina, ndakabatanda kunembo lyanu mpawo ndakamupa nyika yabo. 10 Alubo ndakamubuzya kuti: “Ndime Jehova Leza wanu. Mutayoowi baleza bama-Amori bali aanyika njimukkede.” Pesi teemwakandiswiilila* pe.’”
11 Mpawo ngilozi yaJehova yakasika yakkala aansi aamunsamu mupati wakali ku-Ofira, wakali waJowashi mu-Abbiyezari. Mwanaakwe Gidiyoni wakali kuuma wiiti muchikandilo chawayini kuti ayisisile maMidiyani. 12 Ngilozi yaJehova yakalibonia kulinguwe mpawo yakati: “Jehova ulaanduwe, iwe silumamba uuli aamanguzu.” 13 Mpawo Gidiyoni wakamusandula kuti: “Ikaka mwaami wangu, kuti kakuli kuti Jehova ulaandiswe, nkamboonzi nitwasikilwa zintu zyoonse eezi? Ilikuli milimu yoonse iigambya njitwakalwiidwa aamandeende nibakati, ‘Jehova taakatugwisya mu-Ijipita na? Lino Jehova watulekelezya akutubikka mukuboko kwamaMidiyani.” 14 Jehova wakamulanga mpawo wakamubuzya kuti: “Yinka amanguzu ngulaawo. Uzoovuna ma-Israyeli mukuboko kwamaMidiyani. Teendime na nindili kukutuma?” 15 Gidiyoni wakamusandula kuti: “Ikaka Jehova, nga ndilabavuna biyeni ma-Israyeli? Bona! Mpuli* yesu njiiniini loko mumusyobo waManase, andime biya taakwe mbundibede pe mung’anda yandeende.” 16 Pesi Jehova wakamubuzya kuti: “Uzoojaya maMidiyani mbuli kuti ulikujaya muntu uumwi, nkaambo ndinooli aanduwe.”
17 Mpawo Gidiyoni wakamubuzya kuti: “Ikuti kakuli kuti wandifwida luzyalo, ndipe chitondeezyo chakuti nduwe biya nuuli kwaambuula aandime. 18 Ikaka utazwi pe aano kusikila ndiboole achipo changu ndichibikke kunembo lyako.” Mpawo wakati: “Ndinookkede aano kusikila uboole.” 19 Mpawo Gidiyoni wakeenda waakubamba mwanaampongo akupanga chinkwa chitakwe bumena kabelesya efa yafulawa. Nyama wakayibikka mubbasikiti alubo musinza wakawubikka muchilongo; wakazyeeta kulinguwe mpawo wakamubikkila munsi aamunsamu mupati.
20 Ngilozi yaLeza wakasimpe yakamubuzya kuti: “Bweza nyama achinkwa chitakwe bumena uzibikke aabbwe pati eeliya, mpawo utile musinza.” Wakachita mbuboobo. 21 Mpawo ngilozi yaJehova yakatandabika nkoli yakali mukuboko kwayo yaguma nyama achinkwa chitakwe bumena, mpawo mubbwe mwakazwa mulilo wakatenta nyama achinkwa chitakwe bumena. Ngilozi yaJehova yakabulika. 22 Gidiyoni wakaziba kuti yakali ngilozi yaJehova.
Mpawo Gidiyoni wakati: “Bamayoo, Mwaami Singuzuzyoonse Jehova, ndabona ngilozi yaJehova chantongola meso!” 23 Pesi Jehova wakamubuzya kuti: “Baaluumuno. Utayoowi pe; tukoofwa pe.” 24 Gidiyoni wakayakila Jehova chipayililo nkukooko chichiitwa kuti Jehova-shalomu* kusikila sunu. Chili mu-Ofira yama-Abbi-yezari.
25 Mubusiku oobo, Jehova wakamubuzya kuti: “Bweza pule wang’ombe wawuso uuchili muniini, pule wachibili uuli aaminyaka iili musanu ayibili, udilisye chipayililo chaBbaala chawuso, alubo ugonke chisamu chisalala* chili kumbali aacho. 26 Nwaamaninsya kuyakila Jehova Leza wako chipayililo aajulu aandawu eeyi iikwabilidwe kubelesya mabwe aayalidwe kabotu-kabotu, ubweze pule wang’ombe wachibili mpawo umupe kali chipo chitentwa aankuni zyazwa aachisamu chisalala* nchutagonke.” 27 Gidiyoni wakabweza baalumi bali kkumi aakati kababelesi bakwe mpawo wakachita mbuli mbaakabuzigwa aaJehova. Pesi zintu eezi taakazichita sikati pe, nkaambo wakayoowa bamung’anda yawisi abantu bamumuunzi ooyo, nkinkaako, wakazichita mansiku.
28 Baalumi bamumuunzi ooyo nibakabuka mubuzuba bwakatobela kuseeni, bakajana chipayililo chaBbaala kachili chadilisigwa achisamu chisalala* chakali kumbali aacho kachili chagonkwa alubo pule wang’ombe wachibili wakali wapayizigwa aachipayililo chakali chayakwa. 29 Bakabuzyania kuti: “Ngwani wachita zintu eezi?” Nibakayanduulisisya bakaamba kuti: “Gidiyoni mwana waJowashi nguwe wachita zintu eezi.” 30 Mpawo baalumi bamumuunzi bakabuzya Jowashi kuti: “Gwisya mwanaako kuti ajayigwe, nkaambo wadilisya chipayililo chaBbaala akugonka chisamu chisalala* chili kumbali aacho.” 31 Jowashi wakabuzya baalumi boonse bakamuzida kuti: “Mweelede kumulwanina biya na Bbaala? Mweelede kumuvuna biya na? Kufumbwa muntu uutamuvune, weelede kujayigwa sunu kuseeni. Kuti kakuli kuti nguleza, amumuleke alilwanine, mbukunga kuli muntu wakadilisya chipayililo chakwe.” 32 Mubuzuba oobo, wakawuzika Gidiyoni kuti Jerubbaala* kati: “Bbaala ngalivune, mbukunga umwi muntu wakadilisya chipayililo chakwe.”
33 MaMidiyani boonse, ma-Amalekki, abantu baKubuzwezuba bakajatanizya masooja aabo; mpawo bakazubukila* muKkuti* lyaJezriyeli akukkempa nkukooko. 34 Muuya waJehova wakasikila Gidiyoni mpawo wakalizya mweembo, ma-Abbi-yezari bakabungana akumutobela. 35 Wakatuma batumwa muchilawu chaManase choonse, ambabo bakabungana bamutobela. Alubo wakatuma batumwa muchilawu cha-Asha, Zebbuloni, achaNafutali bakasika kuti bazooswaanane aanguwe.
36 Mpawo Gidiyoni wakabuzya Leza wakasimpe kuti: “Kuti kakuli kuti ulavuna ma-Israyeli kwiinda mulindime, mbuli mbwaakasyomezya, 37 ndilayala mulembo waboya bwambelele aalubuwa lwakupolela. Kuti mulembo ooyo ube aalume* awulikke, pesi aansi kakuli kuyumu, ndilaziba kuti ulabavuna ma-Israyeli kwiinda mulindime mbuli mbwaakasyomezya.” 38 Eezi nzizyo zyakachitika. Naakabuka kuseeni mubuzuba bwakatobela, wakadina mulembo ooyo mpawo kwakazwa maanzi miingi aakazuzya ndido mpati. 39 Nikuba oobo, Gidiyoni wakabuzya Leza wakasimpe kuti: “Ikaka utandinyemeni pe, ndizumizye ndaambe kamwi kupela. Ndikumbila kububelesya lubo boya bwambelele oobu, kuti ndibone kuti unooli aandime na. Ndikumbila kuti boya bwambelele bube mbubo abulikke buyumu, pesi aansi woonse kube lume.”* 40 Eezi nzizyo nzyaakachita Leza mubusiku oobo; boya bwambelele mbubo abulikke bwakali buyumu, pesi aansi woonse kwakaba lume.*