Makani Aakalembwa aaJohane
8 12 Mpawo Jesu wakababuzya lubo kuti: “Ime ndili mumuni wanyika. Kufumbwa muntu uunditobela takooyenda mumudima pe, pesi ulaba aamumuni wabuumi.” 13 Nkinkaako, baFarisi bakati kulinguwe: “Bukamboni bwako mbwakubeja, nkaambo upa bukamboni buli atala anduwe.” 14 Jesu wakabasandula kuti: “Nikuba kuti ndapa bukamboni buli atala andime, bukamboni bwangu mbwachoonzyo nkaambo ndilikuzi nkundakazwa ankundiya. Pesi inywe tamukuzi pe nkundakazwa ankundiya. 15 Inywe mubeteka kweendelana ambubabeteka bantu,* ime taakwe muntu ngundibeteka pe. 16 Nikuba kuti ndabeteka, kubeteka kwangu nkwachoonzyo, nkaambo tandili aandilikke pe, Taata wakandituma ulaandime. 17 Alubo muMulawu wanu, kulilembedwe kuti: ‘Bukamboni bwabantu babili mbwachoonzyo.’ 18 Ime ndipa bukamboni buli atala andime, anguwe Taata wakandituma, upa bukamboni atala andime.” 19 Mpawo bakamubuzya kuti: “Wuso ulikuli?” Jesu wakasandula kuti: “Tamundizi pe, naaba Taata tamumuzi pe. Kaansinga mulindizi, nikuli mulimuzi anguwe Taata.” 20 Naakaamba majwi aaya, wakali kuyiisya mutempele, kali aandawu yakali aazibikkilo zyamali. Nikuba oobo, taakwe wakamujata pe nkaambo chiindi chakwe teechakalinasika pe.
21 Nkinkaako, wakababuzya lubo kuti: “Ndilikweenda alubo muzoondiyanduula pesi muzoofwida muzibi zyanu. Nkundilikuya tamukonzyi pe kukusika.” 22 Mpawo maJuda bakasaanguna kwaamba kuti: “Teebiya uyanda kulijaya? Nkaambo ulikwaamba kuti, ‘Nkundilikuya tamukonzyi pe kukusika.’” 23 Mpawo wakayinkilila kunembo kubabuzya kuti: “Inywe muli baansi, ime ndizwa kujulu. Inywe muli banyika eeyi, ime tandili wanyika eeyi. 24 Nchindamubuzya kuti, muzoofwida muzibi zyanu. Nkaambo kuti kamutasyomi kuti ndime nguwe, muzoofwida muzibi zyanu.” 25 Nkinkaako, bakasaanguna kumubuzya kuti: “Nduweni?” Jesu wakabasandula kuti: “Ndilikataazizyaanzi kwaambuula aandinywe? 26 Ndilaazintu zyiingi nzindeelede kwaambuula atala andinywe akubeteka. Pesi simpe ndyakuti, Ooyo wakandituma ngwakasimpe alubo zintu nzindakamvwa kulinguwe, nziizintu nzindilikwaambuula munyika.” 27 Pesi teebakamvwisisisya pe kuti wakali kubabuzya atala aWisi. 28 Mpawo Jesu wakati: “Mwaakwaanzika Mwanaamuntu, mpawo mpumutazoozibe kuti ndime nguwe akuti tandichiti zintu nzindiliyeeyela andilikke pe, pesi ndaambuula zintu eezi mbuli mbaakandiyiisya Taata. 29 Alubo, Ooyo wakandituma ulaandime, tandisiide aandilikke pe nkaambo chiindi choonse ndichita zintu zimubotezya.” 30 Naakali kwaamba zintu eezi, bantu biingi bakaba aalusyomo mulinguwe.
31 Mpawo Jesu wakayinkilila kunembo kubuzya maJuda bakali bamusyoma kuti: “Kuti mwakkalilila mujwi lyangu, munooli basikwiiya bangu bachoonzyo 32 alubo muzooziba kasimpe mpawo kasimpe kazoomwaangununa.” 33 Mpawo bakamusandula kuti: “Iswe tuli bana ba-Abbrahamu alubo tatunaba aabuzuba twaba bazike bawumwi muntu pe. Nkamboonzi nulikuti, ‘Muzoowangununwa’?” 34 Mpawo Jesu wakati kulimbabo: “Kwaamba choonzyo, ndimubuzya simpe kuti, muntu woonse uuchita chibi, muzike wachibi. 35 Mukuyungizya, muzike takkali mung’anda yasimalelaakwe kukabe kutamani pesi mwana nguukkala kukabe kutamani. 36 Nkinkaako, kuti Mwana wamwaangununa, munooli mwaangunuka choonzyo. 37 Ndilizizi kuti muli bana ba-Abbrahamu. Nikuba oobo, muyanda kundijaya nkaambo tamulikwaatambula pe majwi aangu aakati kanu. 38 Ndaambuula zintu nzindakabona nindakali aTaata, pesi inywe muchita zintu nzimwakamvwa kuli wuso.” 39 Mpawo bakamusandula kuti: “Taateesu ngu-Abbrahamu.” Mpawo Jesu wakati kulimbabo: “Kaansinga muli bana ba-Abbrahamu, nikuli mulikuchita milimu njaakachita Abbrahamu. 40 Pesi lino muyanda kundijaya, nkaambo ndamubuzya kasimpe nkindakamvwa kuli Leza. Abbrahamu teenzizyo pe nzyaakachita. 41 Mulikuchita milimu yawuso.” Mpawo bakati kulinguwe: “Teetwakazyalwa mubwaamu* pe, pesi tuli aaTaata uumwi, Leza.”
42 Jesu wakati kulimbabo: “Kaansinga Leza nguWuso, nikuli mulandiyanda, nkaambo ndakazwa kuli Leza alubo nchindilaano. Teendakaliyeeyela pe kuzaano pesi ndakatumwa aaLeza. 43 Nkamboonzi nimutalikuzimvwisisisya pe nzindilikwaamba? Nkaambo tamuliswiilili pe jwi lyangu. 44 Muzwa kuli wuso Dyabbulosi alubo mulombozya kuchita nzyayanda wuso. We wakali mujayi kuzwa naakasaanguna alubo taakakkalilila pe mukasimpe, nkaambo kasimpe takamo pe mulinguwe. Naamba zyakubeja, waamba kweendelana ambabede nkaambo ngusikubeja alubo nguwisi wababeji. 45 Pesi akaambo kakuti ime ndimubuzya kasimpe, tamundisyomi pe. 46 Ngwani aakati kanu uukonzya kwaamba kuti ndakachita chibi? Kuti kandaamba kasimpe, nkamboonzi nimutandisyomi? 47 Muntu uuzwa kuli Leza, ulaaswiilila majwi aaLeza. Chipa kuti mutaaswiilili, nkuti tamuzwi kuli Leza pe.”
48 Mpawo maJuda bakamusandula kuti: “Teetwaamba choonzyo na nitwati, ‘Uli muSamariya alubo ulaadimoni’?” 49 Jesu wakasandula kuti: “Tandikwe dimoni pe. Ime ndilemeka Taata pesi inywe tamundilemeki pe. 50 Tandilikuliyandwiida bulemu pe, pesi mpali Ooyo uuyanda kuti ndipegwe bulemu alubo nguumubetesi. 51 Kwaamba choonzyo, ndimubuzya simpe kuti, muntu uubamba jwi lyangu takaluboni pe lufu.” 52 Mpawo maJuda bakati kulinguwe: “Lino twaziba kuti ulaadimoni. Abbrahamu wakafwa. Bapolofita bakafwa pesi iwe ulikuti, ‘Muntu uubamba jwi lyangu takaluboni pe lufu.’ 53 Sa ulimupati kuli taateesu Abbrahamu ooyo wakafwa chiindi? Bapolofita ambabo bakafwa. Iwe uyanda kulichitani?” 54 Jesu wakasandula kuti: “Kuti ndalipa bulemu, bulemu bwangu mbwabuyo. Taata, ooyo ngumwaamba kuti nguLeza wanu, nguundipa bulemu. 55 Nikuba oobo, inywe tamumuzi pe pesi ime ndilimuzi. Kuti ndaamba kuti tandimuzi pe, ndinooli ndaba sikubeja mbuli ndinywe. Ime ndilimuzi alubo ndibamba jwi lyakwe. 56 Abbrahamu wuso wakabotelwa loko naakali kulangilila buzuba bwangu alubo wakabubona, mpawo wakabotelwa.” 57 Mpawo maJuda bakati kulinguwe: “Wakamubona kuli Abbrahamu, kakuli tunasisya niiba minyaka iili 50?” 58 Jesu wakati kulimbabo: “Kwaamba choonzyo, ndimubuzya simpe kuti, Abbrahamu katanabawo, ime ndakaliwo.” 59 Nkinkaako, bakabweza mabwe kuti bamutulule, pesi Jesu wakayuba mpawo wakazwa mutempele.