Samiyele Wakusaanguna

27 Nikuba oobo, Davida wakati mumoyo wakwe: “Bumwi buzuba Sawulu uzoondijaya. Chintu nchindikonzya kuchita, nkuchijila kunyika yamaFilisiti mpawo Sawulu ulatakata kundiyanduula muchilawu choonse chama-Israyeli alubo ndilafutuka mukuboko kwakwe.” 2 Nkinkaako, Davida wakanyampuka abaalumi bali 600 mbaakalaabo mpawo bakaya kuli Akkishi mwana waMayokki, mwaami waGati. 3 Davida wakakkala aa-Akkishi kuGati, we abaalumi mbaakalaabo, umwi awumwi wakali aampuli yakwe. Davida wakali aabanakazi bakwe babili, Ahinowamu wakuJezriyeli a-Abbigeli wakuKkameli, ooyo wakali mwanakazi waNabbali. 4 Sawulu naakamvwa kuti Davida wakali wachijila kuGati, wakaleka kumuyanduula.

5 Davida wakati kuli Akkishi: “Kuti wandifwida luzyalo, ndikumbila kuti undipe ndawu yakukkala muli kamwi kawunzi kuchitila kuti ndikkale nkuko. Nkamboonzi mubelesi wako nayelede kukkala aanduwe mumuunzi wamwaami?” 6 Nkinkaako, Akkishi wakamupa Zikkilagi mubuzuba oobo. Nzizyo zyakapa kuti Zikkilagi ibe yabaami baJuda kusika sunu.

7 Davida wakakkala mukawunzi kamaFilisiti kwamunyaka uumwi amyeezi iine. 8 Davida wakali kwiinka aabaalumi mbaakalaabo kuti bakalwane maGeshuri, maGizi ama-Amalekki, nkaambo bakali kukkala munyika yakali kuzwida kuTelamu kuyoosika kuShuri, kayikunukila kunyika ya-Ijipita. 9 Davida naakali kulwana nyika eeyo, taakwe mwaalumi naba mwanakazi ngwaakali kusiya kali muumi, pesi mbelele ampongo, ng’ombe, madonki, nkamela azigogo, wakali kuzibweza mpawo wakali kubweeda kuli Akkishi. 10 Akkishi wakali kumubuzya kuti: “Nkuukuli nkwanyanga bantu zintu sunu?” Davida wakali kusandula kati: “Kumusanza kwaJuda”* naakuti “Kumusanza kwamusyobo waJerameeli” naakuti “Kumusanza kwamaKkeni.” 11 Davida taakali kusiya kufumbwa mwaalumi naakuti mwanakazi kali muumi kuti atolwe kuGati. Wakali kwaamba kuti: “Kuchitila kuti batababuzyi atala andiswe kabati, ‘Oobu mbaatuchita Davida.’” (Oobu mbumbubo mbaakali kuchita chiindi choonse naakali kukkala mukawunzi kamaFilisiti.) 12 Akkishi wakali kumusyoma Davida, kalibuzya kuti mumoyo wakwe: ‘Waba chintu chinunka nsu kubantu bakulimbabo ma-Israyeli, nkinkaako, unooli mubelesi wangu chiindi choonse.’