Baami Wakusaanguna
15 Mumunyaka wachi 18 wabweendelezi bwaMwaami Jerobbowamu mwana waNebbati, Abbijamu wakaba mwaami waJuda. 2 Wakeendelezya kwaminyaka iitatu muJerusalema. Banyina bakali kutegwa Maakka, muzukulu wa-Abbishalomu. 3 Wakaliswini kweenda muzibi zyoonse eezyo wisi nzyaakachita, alubo moyo wakwe teewakamaninina pe* kuli Jehova Leza wakwe mbuli moyo waDavida sianyinakulu. 4 Nikuba oobo, akaambo kaDavida, Jehova Leza wakwe wakamupa lambe muJerusalema kwiinda mukubikka mwanaakwe mundawu yakwe akupa kuti Jerusalema ikkale kayiliwo. 5 Nkaambo Davida wakachita ziluleme mumeso aaJehova alubo taakwe naakaleya pe kuzintu zyoonse nzyaakamulayilila mumazuba woonse aabuumi bwakwe, kunze kwankani ya-Uriya muHeti. 6 Alubo kwakali nkondo aakati kaRehobbowamu aJerobbowamu mumazuba woonse aabuumi bwakwe.
7 Makani aachiindi woonse aali atala a-Abbijamu azyoonse nzyaakachita, taalembedwe na mubbuku lyamakani aachiindi aaziindi zyabaami baJuda? Kwakali nkondo aakati ka-Abbijamu aJerobbowamu. 8 Abbijamu wakalazikwaamwi amasianyinakulu alubo bakamuzikka muMuunzi waDavida. Mwanaakwe Asa wakaba mwaami mundawu yakwe.
9 Mumunyaka wachi 20 wabweendelezi bwaMwaami Jerobbowamu wa-Israyeli, Asa wakasaanguna kweendelezya Juda. 10 Wakeendelezya muJerusalema kwaminyaka iili 41. Banyinakulu bakali kutegwa Maakka, muzukulu wa-Abbishalomu. 11 Asa wakachita ziluleme mumeso aaJehova mbuli Davida sianyinakulu. 12 Wakatanda mawuule baatempele bachaalumi munyika eeyo alubo wakagwisya zibumbwa zisesemya* zyoonse nzibakali bapanga masianyinakulu. 13 Nibaba banyinakulu Maakka wakabagwisya aachuuno chakeelede kupegwa banyina bamwaami,* nkaambo bakali bapanga chibumbwa chisesemya chakali kubelesegwa kukomba chisamu chisalala.* Asa wakagonka chibumbwa chabo chisesemya mpawo wakachitenta muKkuti lyaKkidroni.* 14 Pesi ndawu zyakukombela teezyakagwisigwa pe. Nikuba oobo, moyo wa-Asa wakalimaninide kuli Jehova kwabuumi bwakwe boonse. 15 Alubo wakeeta zintu mung’anda yaJehova, eezyo we awisi nzibakasalazya, nkukwaamba nsiliva, ngolida azimwi zibelesyo zisiyene-siyene.
16 Chiindi choonse kwakali nkondo aakati ka-Asa aBbaasha mwaami wa-Israyeli. 17 Nkinkaako, Mwaami Bbaasha wa-Israyeli wakasika kuti azoolwane Juda, alubo wakasaanguna kuyaka* Rama kuti asinkile bantu bakali kuzwa akunjila kuMwaami* Asa waJuda. 18 Mpawo Asa wakabweza nsiliva yoonse angolida zyakasyeede muzibikkilo zyamung’anda yaJehova amuzibikkilo zyamung’anda yamwaami* mpawo wakazipa babelesi bakwe. Kuzwa waawo, Mwaami Asa wakabatuma kuli Bbeni-hadadi mwana waTabbrimoni, mwana waHeziyoni, mwaami waSiriya, ooyo wakali kukkala muDamasikko, mpawo wakati: 19 “Kuli chizuminano aakati kangu anduwe alubo aakati kandeende awuso. Ndili kukutumizya chipo chansiliva angolida. Kuza uzootyole chizuminano chako aMwaami Bbaasha wa-Israyeli kuchitila kuti andisiye.” 20 Bbeni-hadadi wakaswiilila Mwaami Asa alubo wakatuma basilutwe bamasooja aakwe kuti bakalwane myuunzi ya-Israyeli, mpawo bakazunda Ijoni, Dani, Abbeli-bbeti-maakka, Kkinereti yoonse anyika yoonse yaNafutali. 21 Bbaasha naakamvwa oobo, wakaleka kuyaka* Rama mpawaawo, mpawo wakayinkilila kunembo kakkala muTiriza. 22 Kuzwa waawo, Mwaami Asa wakayita maJuda boonse—taakwe wakasyaala pe—mpawo bakabweza mabwe azisamu zyakuRama eezyo Bbaasha nzyaakali kubelesya kuyaka,* mpawo Mwaami Asa wakabelesya nzizyo kuyaka Gebba iili muBbenjamini aMizipa.
23 Makani aachiindi woonse aali atala a-Asa amanguzu aakwe woonse azyoonse nzyaakachita amyuunzi njaakayaka,* taalembedwe na mubbuku lyamakani aachiindi aaziindi zyabaami baJuda? Pesi naakachembaala wakachiswa bulwazi bwamawulu. 24 Mpawo Asa wakalazikwaamwi amasianyinakulu alubo wakazikkwaamwi ambabo muMuunzi waDavida sianyinakulu. Mwanaakwe Jehoshafati wakaba mwaami mundawu yakwe.
25 Nadabbu mwana waJerobbowamu wakaba mwaami wa-Israyeli mumunyaka wachibili wabweendelezi bwaMwaami Asa waJuda, alubo wakeendelezya Israyeli kwaminyaka iibili. 26 Wakaliswini kuchita zibi mumeso aaJehova alubo wakeenda munzila yawisi amuchibi chakwe nchaakapa kuti Israyeli achite. 27 Bbaasha mwana wa-Ahija wamung’anda ya-Isakkara wakamubukila, alubo Bbaasha wakamujaya kuGibbetoni yakali yamaFilisiti, chiindi Nadabbu ama-Israyeli boonse nibakali kusinkila Gibbetoni. 28 Nkinkaako, Bbaasha wakamujaya mumunyaka wachitatu wabweendelezi bwaMwaami Asa waJuda mpawo wakaba mwaami mundawu yakwe. 29 Mbaakaba mwaami biyo, wakabajaya boonse bamung’anda yaJerobbowamu. Taakwe naba uumwi wamung’anda yaJerobbowamu ngwaakasiya kayoya. Wakabanyonyoona boonse kweendelana ajwi lyaJehova ndyaakali waamba kwiinda mumubelesi wakwe Ahija wakuShilo. 30 Eezi zyakachitika akaambo kazibi Jerobbowamu nzyaakachita azibi nzyaakapa kuti Israyeli achite alubo akaambo kakuti wakamunyemya loko Jehova Leza wa-Israyeli. 31 Makani aachiindi woonse aali atala aNadabbu azintu zyoonse nzyaakachita, taalembedwe na mubbuku lyamakani aachiindi aaziindi zyabaami ba-Israyeli? 32 Alubo kwakali nkondo chiindi choonse aakati ka-Asa aMwaami Bbaasha wa-Israyeli.
33 Mumunyaka wachitatu wabweendelezi bwaMwaami Asa waJuda, Bbaasha mwana wa-Ahija wakaba mwaami wa-Israyeli yoonse muTiriza alubo wakeendelezya kwaminyaka iili 24. 34 Pesi wakaliswini kuchita zibi mumeso aaJehova alubo wakeenda munzila yaJerobbowamu amuchibi chakwe nchaakapa kuti Israyeli achite.