Lwakusaanguna kuBakkorinte
1 Ndime Pawulu, wakayitwa kuba mwaapostoli waKkristu Jesu akaambo kakuyanda kwaLeza, kandilaamwi amukombima Sositeni, 2 ndilikumulembela inywe nimbungano yaLeza iili muKkorinte, nimwakasalazigwa aamwi aKkristu Jesu, akwiitwa kuti mube basalali, kuswaanizya abaabo boonse bali mundawu zisiyene-siyene, balikwiita zina lyaMwaami wesu Jesu Kkristu, Mwaami wabo awesu:
3 Amube aaluzyalo lupati aluumuno kuzwa kuli Leza Taateesu aMwaami Jesu Kkristu.
4 Chiindi choonse ndilamulumba Leza wangu akaambo kandinywe, akaambo kaluzyalo lupati lwaLeza ndumwakapegwa kwiinda muli Kkristu Jesu, 5 nkaambo muzintu zyoonse mwakalongezegwa mulinguwe, mukwaambuula kabotu amuluzibo lwiingi, 6 mbuli mbubwakasimisigwa bukamboni buli atala aKkristu aakati kanu, 7 kuchitila kuti mutabuli chipo nichiba chimwi, nimuchilindila kuyubununwa kwaMwaami wesu Jesu Kkristu achiyandisyo chipati. 8 Alubo uzoomusimya kusikila kumamanino, kuchitila kuti mutajanwi kamuli aamulandu mubuzuba bwaMwaami wesu Jesu Kkristu. 9 Leza ulasyomeka, ooyo wakamwiita kuti mubaamwi* aMwanaakwe Jesu Kkristu Mwaami wesu.
10 Lino bakombima, ndilikumusungwaazya muzina lyaMwaami wesu Jesu Kkristu, kuti moonse mweelede kuzuminana mukwaambuula alubo takweelede kuba kwaanzaana aakati kanu, pesi amujatane amoyo woonse, mube aamuzeezo uumwi alubo kamuyeeya munzila iikozyenie. 11 Nkaambo bamwi bamung’anda yaKkiloye bakandibuzya atala andinywe nibakombima, kuti kuli kukazyania aakati kanu. 12 Nzindilikwaamba nzyakuti, umwi awumwi wanu waamba kuti: “Ime ndili waPawulu,” “Ime ndili wa-Apolo,” “Ime ndili waKkefasi,”* “Ime ndili waKkristu.” 13 Kkristu ulaanzeene na? Pawulu wakamufwida na aachisamu? Naakuti, mwakabbabbatizigwa muzina lyaPawulu na? 14 Ndilamulumba Leza nkaambo taakwe naaba umwi ngundakabbabbatizya, kunze kwaKkrispasi aGayo, 15 kuchitila kuti kutabi muntu waamba kuti wakabbabbatizigwa muzina lyangu. 16 Nisimpe kuti abamung’anda yaStefanasi ndakababbabbatizya. Pesi bamwi boonse aaba, tandizi pe kuti kuli umwi na ngundakabbabbatizya. 17 Nkaambo Kkristu taakandituma kuti ndibbabbatizye pe, pesi wakandituma kuti ndaambilizye makani mabotu kanditabelesyi majwi aabusongo,* kuchitila kuti chisamu chakupenzezya* chaKkristu chitabi chabuyo.
18 Nkaambo makani aali atala achisamu chakupenzezya* mbufuba-fuba kuli baabo balikunyonyooka, pesi kulindiswe nitulikufutulwa, manguzu aaLeza. 19 Nkaambo kulilembedwe kuti: “Ndizoopa kuti busongo bwabantu basongo bumane, alubo maanu aabantu bayiide, ndizoowakaka.”* 20 Muntu musongo ulikuli? Mulembi* ulikuli? Sikukazya wamubwiime bwazintu oobuno* ulikuli? Leza taapa kuti busongo bwanyika eeyi bube bufuba-fuba na? 21 Nkaambo mubusongo bwaLeza, nyika teeyakamuziba pe Leza kwiinda mubusongo bwayo, nkinkaako Leza wakabona kazili kabotu kuti abelesye bufuba-fuba bwazintu zilikukambawukwa kuti afutule aabo basyoma.
22 Nkaambo maJuda bayanda zitondeezyo, maGrikki bayanduula busongo, 23 pesi iswe tukambawuka atala aKkristu, ooyo wakagankaminwa aachisamu. KumaJuda nchilebyo, pesi kubantu bazisi mbufuba-fuba. 24 Nikuba oobo, Kkristu manguzu aaLeza alubo mbusongo bwaLeza kuli baabo bakayitwa, kumaJuda akumaGrikki. 25 Nkaambo chintu chibonwa kuti mbufuba-fuba bwaLeza, chili aabusongo kwiinda bantu alubo chintu chibonwa kuti nkubula manguzu kwaLeza, chilisimide kwiinda bantu.
26 Nkaambo mulibwene bakombima kuti, mukwiitwa kwanu teebiingi pe babonwa kuti mbasongo mumeso aabantu, teebiingi pe bali aamanguzu, teebiingi pe bana bamubwaami,* 27 pesi Leza wakasala zintu zyanyika zibonwa kuti nzyabufuba-fuba, kuti ape kuti bantu basongo bafwe bweeme, alubo Leza wakasala zintu zyanyika zibonwa kuti tazikwe manguzu, kuti ape kuti zintu zisimide zifwe bweeme, 28 alubo Leza wakasala zintu zyanyika zibonwa kuti nzyabuyo, zilangilwaansi, zintu zitawo, kuti ape kuti zintu ziliwo zibule mulimu, 29 kuchitila kuti kutabi muntu uulidunda mumeso aaLeza. 30 Akaambo kanguwe, mulijisini aKkristu Jesu, ooyo kulindiswe, waba busongo buzwa kuli Leza, bululami, busalali akwaangununwa kwiinda muchinunuzyo, 31 kuchitila kuti kube mbuli mbukulembedwe kuti: “Ooyo ulidunda, alidunde muli Jehova.”*