Milimu yaBaapostoli
28 Nitwakasika kabotu toonse, twakaziba kuti kasuwa aako kategwa Melita. 2 Bantu bamundawu eeyo bakatufwida luzyalo lupati loko. Bakatutambula kabotu toonse mpawo bakatukunkila mulilo nkaambo mvula yakali kuwa alubo kwakali kutontola. 3 Pesi Pawulu naakabwezelela nkuni akuzisikka mumulilo, kwakazwa chipile munkuni eezyo nkaambo wakamvwa kupya mpawo wakamunamatila aakuboko. 4 Bantu bamundawu eeyo nibakabona nzoka eeyo ilaabuyoka kayimunamatide aakuboko, bakasaanguna kubuzyania kuti: “Kwaamba choonzyo, mwaalumi ooyu mujayi, nikuba kuti taafwida mulwizi, pesi Bululami* teebwayanda pe kuti apone.” 5 Nikuba oobo, nzoka eeyo wakayisansila mumulilo pesi taakwe niyakamuchisa pe. 6 Bantu bakali kulangilila kuti ulazimba naakuti ulafwa pesi nibakalindila kwachiindi chilamfu akubona kuti taakwe chachitika pe, bakachincha mizeezo yabo mpawo bakasaanguna kumwaamba kuti nguleza.
7 Aafwiifwi andawu eeyo, kwakali myuunda yawumwi mwaalumi uulemekwa loko mukasuwa aako, uutegwa Pabbuliyasi. Mwaalumi ooyu wakatutambula kabotu alubo wakatujata kabotu kwamazuba aatatu. 8 Wisi aaPabbuliyasi wakalilede aabulo kalikupya mubili alubo wakali kuchiswa bulwazi bwakalowa. Pawulu wakanjila mwaakabede, wakomba akumubikka maboko mpawo wakapona. 9 Nizyakachitika zintu eezi, bantu bakali kuchiswa mukasuwa aaka bakasaanguna kusika kulinguwe kuti azoobasilike. 10 Mpawo bakatulumba kwiinda mukutupa zipo zyiingi alubo nitwakaba aafwiifwi kuti tunjile mubwaato, bakalongela zintu zyoonse nzitwakali kuyanda mubwaato.
11 Nikwakayinda myeezi iitatu, twakanjila mubwaato bwakalembedwe kuti, “Bana Balombe baZewusi.” Bwaato oobu bwakali bwaku-Alekizandriya alubo bwakali mukasuwa aaka muchiindi champeyo. 12 Twakasika kuchito chaSirakkusi, mpawo twakakkala nkukooko kwamazuba aatatu. 13 Nitwakazwa ooko, twakasika kuRegiyo. Mubuzuba bwakatobela, kwakaba guwo lyakali kuzwa kumusanza mpawo mubuzuba bwachibili twakasika kuPutiyoli. 14 Aandawu eeyi, twakajana bakombima mpawo bakatukombelezya kuti tukkale ambabo kwamazuba aali musanu aabili. Nitwakazwa ooko, twakalulama kuRoma. 15 Bakombima bakuRoma nibakamvwa kuti tuzabuza, bakaza kuzootutambula. Bamwi bakeenda kusikila baakusika kumusika wa-Apiyasi, mpawo bamwi bakasika kuMaanda Aabeenzu Aatatu. Pawulu naakababona, wakalumba Leza mpawo wakaba aachibindi. 16 Kumamanino twakasika kuRoma, mpawo Pawulu wakazumizigwa kuti kakkala aalikke pesi kalindwa aamusoja.
17 Nikuba oobo, nikwakayinda mazuba aatatu, Pawulu wakayita baalumi balemekwa bamaJuda. Nibakabungana wakababuzya kuti: “Nibaalumi, nibeenzuma, nikuba kuti taakwe chintu nchindakachita chikazyania abantu bakulindiswe naakuti aziyanza zyamasianene, ndakasungwa kuJerusalema akutolwa kubantu bakuRoma. 18 Kaambo kangu nikakalangwa-langwa, bakali kuyanda kundaangununa nkaambo taakwe twaambo ntubakajana twakali kukonzya kupa kuti ndijayigwe. 19 Pesi maJuda nibakakaka kuti ndaangununwe, ndakayeeya kutola kaambo kangu kuli Kkesari pesi makanze aangu taakali aakuyandwiida bantu bakulindiswe mulandu. 20 Eezi nzizyo zyapa kuti ndikumbile kumubona akuti ndaambuule aandinywe nkaambo ndisungidwe ncheni eezi akaambo kabulangilizi mbubalaabo ma-Israyeli.” 21 Mpawo bakamubuzya kuti: “Tatunajana magwalo aazwa kuJudiya aambuula atala anduwe. Alubo taakwe muJuda naaba uumwi wakasika kuzoowamba zintu zibi atala anduwe. 22 Pesi iswe tubonaanga zilikabotu kuti waambe nzuyeeya, nkaambo kwaamba choonzyo, tulizi kuti bantu baambuula zintu zibi atala akabunga aaka koonse-koonse.”
23 Mpawo bakabamba buzuba mbubakali kuyanda kuti bazooswaanane aanguwe. Mpawo bakasika kabali biingi loko kulinguwe mung’anda njaakali kukkala. Alubo kuzwa kuseeni kusika goko, wakali kubapandulwida makani kwiinda mukupa bukamboni buzwide atala aBwaami bwaLeza kuti abakwelelezye kuti babe aalusyomo muli Jesu, kuzwa muMulawu waMozesi aBapolofita. 24 Bamwi bakasaanguna kusyoma zintu nzyaakali kwaamba pesi bamwi teebakasyoma pe. 25 Akaambo kakuti bakali kukazyania, bakasaanguna kweenda, mpawo Pawulu wakaamba jwi eeli limwi lyakuti:
“Muuya uusalala wakaambuula kwiinda mumupolofita Isaya kumasianyookulu 26 kuti, ‘Yinka kubantu aaba ukababuzye kuti: “Kumvwa muzoomvwa pesi tamuzoomvwisisisyi pe, alubo kulanga muzoolanga pesi tamuzooboni pe. 27 Nkaambo myoyo yabantu aaba yatindibala alubo bamvwa amatwi aabo pesi taakwe nchibachita pe alubo bafwinya meso aabo kuchitila kuti bataboni ameso aabo akuti batamvwi amatwi aabo akuti batamvwisisisyi amyoyo yabo kuti basanduke mpawo ndibaponie.”’ 28 Nkinkaako, amuzibe kuti, lufutuko oolu luzwa kuli Leza, lwaambilizigwa kuzisi alubo kwaamba choonzyo, bayooswiilila.” 29 *——
30 Nkinkaako, Pawulu wakali kukkala mung’anda yakali kubbadalwa kwaminyaka iibili. Alubo wakali kubatambula kabotu bantu boonse bakali kuza kulinguwe, 31 kalikubakambawukila atala aBwaami bwaLeza akubayiisya atala aMwaami Jesu Kkristu, kaambuula kaangunukide loko* kakutakwe chimukachizya pe.