KuBafilipi
1 Ndime Pawulu kandilaamwi aTimoti, tubazike baKkristu Jesu, tulikumulembela inywe nibasalali boonse bajisini aaKkristu Jesu bali muFilipi, kuswaanizya abalangizi ababelesi bambungano:
2 Amube aaluzyalo lupati aluumuno kuzwa kuli Leza Taateesu aMwaami Jesu Kkristu.
3 Ndilamulumba Leza wangu chiindi choonse nindimuyeeya 4 munkombyo zyangu zyoonse zyakumukombelezezya. Ndikomba nkombyo yakukombelezya imwi ayimwi akukondwa, 5 akaambo kakugwasilizya nkumwakachita kumakani mabotu,* kuzwa mubuzuba bwakusaanguna kusikila kuchiindi eechino. 6 Nkaambo ndili aachoonzyo atala achintu eechi, kuti ooyo wakasaanguna mulimu mubotu mulindinywe, uzoowuchita kusikila awumaninsye mubuzuba bwaKkristu Jesu. 7 Zilikabotu loko kuti ndiyeeye oobu atala andinywe moonse nkaambo ndimuyanda loko, inywe nibasikutola lubazu aamwi andime muluzyalo lupati, muzyaanzyo zyangu zyamujele anindikwabilila makani mabotu akupa kuti abe mumulawu.
8 Nkaambo Leza ulizi kuti ndilamuyeeya moonse aluyando lupati luli mbuli ndwalaalo Kkristu Jesu. 9 Alubo ndikkala kandikombela kuti luyando lwanu lwiinkilile kunembo kuyungizya, aamwi aluzibo lwachoonzyo akumvwisisisya koonse, 10 kuti mube aachoonzyo atala azintu ziyandikana loko, kuchitila kuti mutabi aamulandu akuti mutalebyi bamwi kusikila mubuzuba bwaKkristu, 11 akuti muzuzigwe muchelo uululeme, uubawo kwiinda muli Jesu Kkristu, kuchitila kuti Leza apegwe bulemu akuti atembawulwe.
12 Lino bakombima, ndiyanda kuti muzibe kuti chiimo changu chapa kuti makani mabotu ayinkilile kunembo, 13 zyakuti zyaanzyo zyangu zyamujele akaambo kaKkristu, zyazibinkana koonse-koonse aBalindi boonse baMwaami wakuRoma, abamwi boonse. 14 Bakombima biingi muMwaami, baba aachibindi akaambo kazyaanzyo zyangu zyamujele alubo balikuyungizya kuba aachibindi chakwaambuula jwi lyaLeza kabatayoowi pe.
15 Nichoonzyo kuti bamwi balikukambawuka Kkristu akaambo kamunyono akukazyania, pesi bamwi balikuchita oobo akaambo kamakanze mabotu. 16 Aabo bali aamakanze mabotu, balikwaambilizya Kkristu akaambo kaluyando, nkaambo balizi kuti ndakasalwa kuti ndikwabilile makani mabotu.* 17 Pesi aabo bali aamunyono akukazyania, balikuchita oobo akaambo kakuti balikundilwana, kutali amakanze mabotu, nkaambo bayanda kundipenzya muzyaanzyo zyangu zyamujele. 18 Zintu eezi zyapa kuti kube biyeni? Zyapa kuti munzila zyoonse, kufumbwa kuti mukuupa-wupa naakuti mukasimpe, Kkristu aambilizigwe alubo ndilabotelwa akaambo kazeezi. Kwaamba choonzyo, ndinoobotelwa chiindi choonse, 19 nkaambo ndilizi kuti eezi zizoopa kuti ndifutulwe kwiinda munkombyo zyanu zyakukombelezya amukugwasigwa aamuuya waJesu Kkristu. 20 Eezi zyeendelana aachiyandisyo chipati nchindilaacho abulangilizi bwakuti, tandikooba aabweeme pe muzyiimo zyoonse, pesi kuti, kwiinda mulwaangunuko lwangu loonse lwakwaambuula, Kkristu ulalemekwa kwiinda mumubili wangu mbuli mbukwakabede chiindi, kufumbwa kuti mubuumi naakuti mulufu.
21 Nkaambo kulindime, kupona nguKkristu alubo kufwa mbulumbu. 22 Kuti ndayinkilila kunembo kupona munyama, eeyi njiimichelo yamilimu yangu, pesi nzinditasale tandikoozyaamba pe. 23 Tandizi pe kuti ndisaleenzi aakati kazintu eezi zibili, nkaambo ndili aachiyandisyo chakwaangununwa akuba aaKkristu, nkaambo kwaamba choonzyo, kuchita oobo nkubotu loko. 24 Nikuba oobo, kulayandikana kuti ndiinkilile kunembo kupona munyama akaambo kandinywe. 25 Nkinkaako, mbukunga ndili aachoonzyo atala amakani aaya, ndilizi kuti ndinooli mbuboobu alubo ndinooli aandinywe moonse kuti mukomene akuti mukondwe mulusyomo, 26 kuchitila kuti mufusuuke akubotelwa muli Kkristu Jesu akaambo kandime, kuti ndazooba aandinywe lubo.
27 Inywe* amupone bweelede kweendelana amakani mabotu aali atala aKkristu, kuchitila kuti kufumbwa kuti ndasika kuzoomubona naakuti tandiwo pe, ndimvwe atala andinywe akuziba kuti muliimvwi nji kamuli aamuzeezo uumwi,* mbuli muntu uumwi, nimulwanina lusyomo lwamakani mabotu, 28 alubo kamutabayoowi pe aabo bamukazya. Kutayoowa kwanu mbukamboni bwakuti bazoonyonyoonwa pesi inywe muzoofutulwa, alubo eezi zizwa kuli Leza. 29 Nkaambo mwakapegwa chilongezyo akaambo kaKkristu, kutali chakusyoma mulinguwe kupela, pesi achakuswaana mapenzi akaambo kanguwe. 30 Nkaambo mulikulwana nkondo iikozyenie ayeeyo njimwakabona kandilikwiilwana, njimumvwide kuti ndichiilwana asunu.