Mukambawusi

2 Mpawo mumoyo wangu ndakalibuzya kuti: “Leka ndeezye kulikondelezya* ndibone kuti kuli chibotu na chizwa.” Pesi ndakabona kuti, anzizyo eezi tazigwasyi pe.

 2 Atala akuseka ndakati, “Nkupenga!”

Atala akulikondelezya* ndakati, “Kugwasyaanzi?”

3 Ndakayanduulisisya kwiinda mukunywa wayini aachiindi chimwi kandilikubelesya busongo bwangu. Alubo ndakachita zintu zyabufuba-fuba kuchitila kuti ndibone kuti niinzi chibotu chikonzya kuchitwa aabantu mumazuba mache ngibapona aanyika. 4 Ndakachita milimu mipati loko. Ndakaliyakila maanda, ndakalilimina myuunda yamisaansa. 5 Ndakalipangila ndawu zyeebeka andawu zyakulyookezezya alubo ndakabyala misyobo yoonse yamichelo mukati. 6 Ndakalipangila malambwa aamaanzi kuchitila kuti kaatiliila lusaka lwaminsamu iifwefwema. 7 Ndakaba aababelesi bachaalumi abachanakazi alubo bamwi babelesi bakali kuzyalilwa mung’anda yangu.* Mukuyungizya, ndakaba aazivuubwa zyiingi—ng’ombe ambelele ampongo—kwiinda boonse bakandisaangunina kubawo muJerusalema. 8 Ndakalibunganizizya nsiliva angolida, lubono lwabaami* alwazilikiti. Ndakalibunganizizya bayimbi bachaalumi abachanakazi kuswaanizya acheecho chipa kuti bana balombe babotelwe—mwanakazi, kwaamba choonzyo, banakazi biingi. 9 Nkinkaako, ndakaba mupati alubo ndakabayinda boonse bakandisaangunina kubawo muJerusalema. Ndakayinkilila kunembo kandili aabusongo bwangu.

10 Teendakalyiima pe kufumbwa chintu nchindakali kuyanda. Moyo wangu teendakawukasya pe kulikondelezya* kwamusyobo woonse, nkaambo moyo wangu wakali kubotelwa akaambo kamilimu yangu yoonse njindakali kubeleka changuzu. Oobu mbuubulumbu* mbundakajana akaambo kakubeleka changuzu kumilimu yoonse njindakachita aansi aano. 11 Pesi nindakayeeyesesya atala amilimu yoonse njindakachita amaboko aangu amilimu yoonse njindakabeleka changuzu, ndakabona kuti zintu zyoonse tazigwasyi pe, kwakali kwaandilila biyo moya. Taakwe chakali kugwasya pe aansi aano.

12 Mpawo ndakazoolanga busongo, kupenga abufuba-fuba. (Nkaambo niinzi nchakonzya kuchita umwi muntu uutazootobele mwaami? Taakwe chimbi kunze kwacheecho chakachitwa kale.) 13 Ndakabona kuti busongo bulikabotu kwiinda bufuba-fuba mbuli mumuni mbuulikabotu kwiinda mudima.

14 Meso aamuntu uuchenjede ali mumutwe wakwe,* pesi mufuba-fuba weendela mumudima. Alubo ndakabona kuti boonse bali aamamanino aakozyenie. 15 Mpawo ndakati mumoyo wangu: “Chichitika kumufuba-fuba chilachitika akulindime.” Ndakajanaanzi kwiinda mukuba musongo zyiindilide? Nkinkaako, mumoyo wangu ndakati: “Azeezi tazigwasyi pe.” 16 Taakwe muntu uuyeeyegwa kukabe kutamani, abe musongo naakuti mufuba-fuba. Mumazuba aalikuza, bantu boonse bazoolubwa. Musongo uuzoofwa biyeni? Mbuli mbafwa mufuba-fuba.

17 Nkinkaako, ndakasaanguna kubuzonda buumi, nkaambo zintu zyoonse zyakali kuchitwa aansi aano zyakali kundikataazya mbukunga zyoonse teezyakali kugwasya pe, kwakali kwaandilila biyo moya. 18 Ndakasaanguna kuzizonda zintu zyoonse nzindakabelekela changuzu aansi aano, nkaambo ndizoozisiila muntu uutazoonditobele. 19 Ngwani uuzi kuti unooli musongo na naakuti unooli mufuba-fuba? Nikuba oobo, uzooyendelezya zintu zyoonse nzindakajana aansi aano kwiinda mukubeleka changuzu nkundakachita akubelesya busongo bwangu. Anzizyo eezi tazigwasyi pe. 20 Ndakawusa atala azintu zyoonse nzindakabelekela changuzu aansi aano. 21 Nkaambo muntu ulakonzya kubeleka changuzu kazulwidwa aabusongo aluzibo amaanu, pesi weelede kusiila umwi muntu chaabilo* chakwe nchaatakabelekela pe. Anzizyo eezi tazigwasyi pe alubo ndipenzi pati.

22 Muntu ujanaanzi kukubeleka changuzu nkwachita, akuchiyandisyo nchalaacho* chakubeleka changuzu aansi aano? 23 Nkaambo mulimu wakwe umweetela machise akupa kuti atabotelwi, mumazuba aakwe woonse. Moyo wakwe tuupumuni pe nikuba mansiku. Anzizyo eezi tazigwasyi pe.

24 Taakwe chintu chibotu kumuntu kwiinda kulya akunywa akubotelwa* akaambo kamilimu yakwe njabeleka changuzu. Anzizyo eezi, ndakabona kuti zizwa mukuboko kwaLeza wakasimpe, 25 nkaambo ngwani ulya akunywa kwiinda ndime?

26 Muntu uumubotezya, umupa busongo aluzibo akubotelwa, pesi sizibi umupa mulimu wakubunganizya akuyobolola zintu zyakupa muntu uuchita zintu zibotezya Leza wakasimpe. Anzizyo eezi tazigwasyi pe, nkwaandilila biyo moya.