Milimu yaBaapostoli
20 Lupyopyongano nilwakamana, Pawulu wakatuma mulayizyo wakuti basikwiiya baze mpawo wakabasungwaazya. Naakamaninsya, wakalaya mpawo wakasaanguna lweendo lwakwe lwakuya kuMakkedoniya. 2 Naakayinda muzilawu eezyo, akwaamba majwi miingi akusungwaazya bantu bakali nkukooko, wakasika muGrisi. 3 Wakakkala nkukooko kwamyeezi iitatu, pesi akaambo kakuti maJuda bakali kuyanda kumujaya naakali kuyanda kutanta bwaato kuti ayinke kuSiriya, wakachincha muzeezo mpawo wakasala kwiinda akuMakkedoniya. 4 Wakasindikilwa aaSopata mwana waPilasi wakuBberiya, a-Aristakko aSekkanda bakuTesalonikka, aGayo wakuDebbe, aTimoti, alubo kuzwa kuchilikiti cha-Asiya, kwakali Tikkikko aTrofimo. 5 Baalumi aaba bakatunga kunembo mpawo baakutulinda kuTrowa, 6 pesi nikwakayinda mazuba aaPobwe lyaZinkwa Zitakwe Bumena, twakazwa kuFilipi twatanta bwaato twaya kuTrowa. Lweendo oolu lwakatola mazuba aali musanu. Nitwakasika, twakakkala nkukooko kwamazuba aali musanu aabili.
7 Mubuzuba bwakusaanguna bwamviki, nitwakabungenaamwi kuti tulye, Pawulu wakasaanguna kwaambuula ambabo nkaambo wakali sikweenda mubuzuba bwakali kutobela alubo wakaambuula kwachiindi chilamfu kusikila aakati kamansiku. 8 Mung’anda yamujulu mutwakabungene, mwakali malambe miingi. 9 Pawulu naakachili kwaambuula, umwi mulombe uutegwa Yutikko wakakkede aawindo, wakajatwa aang’onzi. Nizyakamuzunda, wakawa kazwa mung’anda yamujulu yachitatu mpawo bakamubweza kafwide. 10 Pawulu naakaseluka, wakaliwaala aalinguwe, wamufukata mpawo wakati: “Mutalili pe nkaambo muumi.” 11 Mpawo wakatanta mung’anda yamujulu wakwamuna chinkwa mpawo wasaanguna kulya. Wakayinkilila kunembo kalikwaambuula kwachiindi chilamfu kusikila nibwakacha mpawo wakeenda. 12 Nkinkaako, bakabweza mulombe ooyo kali muumi alubo bakawumbulizigwa loko.
13 Mpawo iswe twakatunga kunembo abwaato katuya ku-Asosi, ooko nkutwakali kuyootansika Pawulu mubwaato nkaambo wakaambide kuti tuzoomujana nkuko, mbukunga wakali kuyanda kweenda aamawulu. 14 Naakatujana ku-Asosi, twakamubweza abwaato twaya kuMitileni. 15 Mubuzuba bwakatobela, twakazwa ooko twatanta bwaato twasika kuKkiyosi. Pesi mubuzuba bwachibili, twakayinda muSamosi mpawo mubuzuba bwachitatu, twakasika kuMelitasi. 16 Pawulu wakali wasala kutayinda mu-Efeso, kuchitila kuti atakkali chiindi chilamfu muchilikiti cha-Asiya nkaambo wakali kuchijaanina kuya kuJerusalema kuchitila kuti, kuti kazikonzeka, akaakusike nkuko mubuzuba bwaPobwe lyaPentekkoste.
17 Nikuba oobo, kachili kuMelitasi wakatuma jwi ku-Efeso alubo wakayita baalu bambungano. 18 Nibakasika kulinguwe, wakababuzya kuti: “Mulizi kabotu mbundakali kupona aakati kanu, kuzwa mubuzuba bwakusaanguna nindakasika muchilikiti cha-Asiya. 19 Ndakabelekela Mwaami akulibombya koonse amisozi amapenzi ngindakali kuswaana akaambo kamaJuda bakali kuyanda kundijaya. 20 Nikuba oobo, teendakaleka pe kumubuzya zintu zimugwasya nikuba kumuyiisya aantanganana akung’anda ang’anda. 21 Pesi ndakapa bukamboni buzwide kumaJuda akumaGrikki, bwakuti basanduke baze kuli Leza akuti babe aalusyomo muMwaami wesu Jesu. 22 Amubone, lino ndiya kuJerusalema kandaangidwe mumuuya.* Nikuba oobo, tandizi pe kuti niinzi zitakachitike kulindime nkukooko. 23 Pesi mumyuunzi yoonse, muuya uusalala ulikwiindulula-yindulula kundibuzya kuti, kusungwa amapenzi zilindilindide. 24 Nikuba oobo, buumi bwangu tandibuboni kuba chintu chiyandikana pe, pesi nchindiyanda nchakuti ndimaninsye lweendo lwangu amulimu ngundakapegwa aaMwaami Jesu, wakupa bukamboni buzwide atala amakani mabotu aaluzyalo lupati lwaLeza.
25 “Lino amubone! Ndilizi kuti aakati kanu, inywe mbindakakambawukila atala aBwaami bwaLeza, taakwe naaba uumwi uutazoondibone lubo pe. 26 Nchindamwiita sunu kuti muzoobe bakamboni bakuti ndilasalala kuganzi lyabantu boonse, 27 nkaambo teendakaleka pe kumubuzya makanze* woonse aaLeza. 28 Amulibambe inywe lwanu abutanga boonse, oobo muuya uusalala ngwaakamusala kuti mube balangizi bambubo akuti mweembele mbungano yaLeza njaakawula aganzi lyaMwanaakwe. 29 Ndilizi kuti ndayinka, bawumpe bakali, bazoonjila aakati kanu alubo bazoobujata chalunya butanga. 30 Alubo aakati kanu, kuzooba baalumi batazoowambe zintu zipilingene kuti bapambule basikwiiya kuti babatobele.
31 “Nkinkaako, amukkale kamulindide, muyeeye kuti, kwaminyaka iitatu teendakaleka pe kumuyiisya mansiku asikati amisozi. 32 Kuchiindi eechino, ndimubikka mumaboko aaLeza akujwi lyaluzyalo lwakwe lupati, limuyaka akumupa lukono aakati kabasalali boonse. 33 Taakwe nindakalombozya nsiliva yamuntu, niiba ngolida, nichiba chigogo. 34 Inywe mulizi kuti, maboko aangu aaya ngawo aakapa kuti ndijane ziyandikana azyabaabo mbindakalaabo. 35 Muzintu zyoonse eezi nzindakachita, ndakamutondeezya kuti, mweelede kubeleka changuzu kuti mugwasye batakwe manguzu. Alubo mweelede kukkala kamwaayeeya majwi aakaambwa aaMwaami Jesu, aawo naakati: ‘Kupa, kupa kubotelwa loko kwiinda kutambula.’”
36 Naakamaninsya kwaamba zintu eezi, wakafugama ambabo boonse mpawo wakakomba. 37 Kwaamba choonzyo, boonse bakalila loko mpawo bakakumbata* Pawulu bamumyonta, 38 nkaambo majwi ngaakaamba aakuti, tabachizoomuboni lubo pe akabachisa loko. Mpawo bakamusindikila kubwaato.