Lwakusaanguna Luya Kuli Timoti
4 Nikuba oobo, ijwi lyakazulwidwa aamuuya lilaamba* aantanganana kuti, kumazuba aali kunembo, bamwi bazoowa mulusyomo, kababikkila maanu kumakani aalweeno aakazulwidwa aamyuuya* akunjiisyo zyamadimoni, 2 kwiinda mulweeno lwabantu baamba zyakubeja, bali aamyoyo* iitabeleki mbuli kuti yakatentwa aansimbi iipya. 3 Bakasya kukwatana alubo balayilila bantu kuti baleke kulya chakulya Leza nchaakalenga kuti kachiligwa aakulumba abaabo bali aalusyomo abakazi kabotu kasimpe. 4 Nkaambo chilenge choonse chaLeza nchibotu, alubo taakwe cheelede kukakwa pe, kufumbwa biyo kuti chatambulwa aakulumba, 5 nkaambo chilasalazigwa kwiinda mujwi lyaLeza akuchikombela.
6 Kuti bakombima wabapa malayilile aaya, uzooba mubelesi mubotu waKkristu Jesu, wakasaninwa aamajwi aalusyomo amajwi aanjiisyo mbotu njulikutobela aafwiifwi. 7 Pesi tukake twaano twakubeja tutasalali, tuli mbuli tooto twaanwa aamachembele. Alubo liyiisye kuli aamakanze aakuyoowa Leza. 8 Nkaambo kuyiisya mubili* kugwasya mbichaani, pesi kuyoowa Leza kulagwasya muzintu zyoonse, nkaambo kuli aachisyomezyo chabuumi buliwo lino abuumi bulikunembo. 9 Makani aaya alasyomeka alubo ayelede kutambulwa munzila iizwide. 10 Nchitulikubeleka changuzu akulwisya, nkaambo bulangilizi bwesu twakabubikka aali Leza uupona, nkukwaamba Mufutuli wabantu bamisyobo yoonse, kapati wabaabo basyomeka.
11 Yinkilila kunembo kupa malayilile aaya akuyiisya zintu eezi. 12 Kutabi muntu uukulangilaansi akaambo kakuti uli muniini. Pesi kuli baabo basyomeka, ba chikozyano chibotu mukwaambuula, mukulijata, muluyando, mulusyomo, mukusalala. 13 Yinkilila kunembo kulipeda kubalila bantu boonse, kusungwaazya akuyiisya, kusikila ndizoosike. 14 Utachilangilaansi pe chipo chili mulinduwe nchwaakapegwa kwiinda mubupolofita, chiindi kabunga kabaalu nikakabikka maboko aalinduwe. 15 Yeeyesesya atala azintu eezi, ubbile mulinzizyo, kuchitila kuti kwiinkilila kunembo kwako kubonwe aabantu boonse. 16 Kkala kulilanga-langa iwe lwako akuyiisya kwako. Zijatisisye zintu eezi, nkaambo kuti wachita oobo, ulalifutula iwe lwako abaabo bakuswiilila.