KuBaroma
10 Bakombima, nchindiyandisya mumoyo wangu alubo nchindibakombelezezya munkombyo kuli Leza, nchakuti bakafutuke. 2 Nkaambo ndipa bukamboni bwakuti, bantu aaba mbasungu kuli Leza, pesi kutali kweendelana aluzibo lwachoonzyo. 3 Akaambo kakuti teebakabuzi pe bululami bwaLeza, pesi bakali kuyanda kulibikkila bululami bwabo, teebakalibombya pe kubululami bwaLeza. 4 Nkaambo Kkristu ngunguwe mamanino aaMulawu, kuchitila kuti muntu woonse uutondeezya lusyomo, abe aabululami.
5 Nkaambo Mozesi wakalemba atala abululami bujanwa kwiinda muMulawu, naakati: “Muntu uuchita zintu eezi, uzoopona akaambo kanzizyo.” 6 Pesi bululami bweetwa akaambo kalusyomo, bwaamba kuti: “Mumoyo wako utaambi kuti, ‘Ngwani uutatante kuya kujulu?’ nkukwaamba kuti, kuti akaselusye Kkristu, 7 naakuti, ‘Ngwani uutaselukile mumulindi uutagoli?’ nkukwaamba kuti, kuti akabusye Kkristu kuzwa kubafu.” 8 Ani lugwalo lutyeni? Lwaamba kuti: “Ijwi lilaafwiifwi anduwe, lili mumulomo wako alubo lili mumoyo wako,” nkukwaamba “ijwi” lyalusyomo nditulikukambawuka. 9 Nkaambo kuti waambilizya aantanganana amulomo wako kuti Jesu Mwaami, akutondeezya lusyomo mumoyo wako kuti Leza wakamubusya kuzwa kubafu, uzoofutulwa. 10 Nkaambo muntu utondeezya lusyomo mumoyo wakwe kuti abe mululami, pesi amulomo wakwe waambilizya aantanganana kuti akafutulwe.
11 Nkaambo lugwalo lwaamba kuti: “Taakwe muntu uubikka lusyomo lwakwe mulinguwe uutazoomane manguzu.” 12 Nkaambo taakwe musiyano aakati kamuJuda amuGrikki. Kuli Mwaami uumwi biyo kubantu boonse, uubapa zintu zyiingi* bantu boonse bamwiita. 13 Nkaambo “muntu woonse wiita zina lyaJehova* uzoofutulwa.” 14 Nikuba oobo, balamwiita biyeni ooyo ngubatasyomi? Balamusyoma biyeni ooyo ngubatanamvwa atala anguwe? Balamvwa biyeni kuti kakutakwe muntu uukambawuka? 15 Alubo balakambawuka biyeni kunze kwakuti batumwa? Mbuli mbukulembedwe kuti: “Mabotu kaka mawulu aabaabo baambilizya makani mabotu aazintu zibotu!”
16 Nikuba oobo, teeboonse pe bakaswiilila makani mabotu. Nkaambo Isaya waamba kuti: “Jehova,* ngwani wakaba aalusyomo kuchintu nchaakamvwa kulindiswe?”* 17 Nkinkaako, lusyomo lulaba kuti muntu wamvwa jwi. Alubo jwi lilamvwigwa kuti kwakambawukwa atala aKkristu. 18 Pesi muleke ndibuzye, Teebakamvwa na? Kwaamba choonzyo, “ijwi lyabo lyakasika munyika yoonse, alubo mulumbe wabo wakasika kumagolelo aanyika.” 19 Muleke ndibuzye lubo, Israyeli taakazi na? Kusaanguna, Mozesi waamba kuti: “Ndizoopa kuti mube aabbivwe kwiinda mubantu baambwa kuti teechisi pe. Ndizoopa kuti munyeme loko, kwiinda mubantu baambwa kuti nchisi chabafuba-fuba.” 20 Pesi kali aachibindi, Isaya waamba kuti: “Ndakajanwa abaabo bakatali kundiyanduula pe, alubo ndakazibinkana abaabo bakatali kubuzya atala andime.” 21 Pesi atala a-Israyeli waamba kuti: “Buzuba boonse, ndatambikide maboko aangu kubantu bataswiilili alubo bali aamyoyo miyumu.”