Petro Wachibili
1 Ndime Simoni Petro, muzike amwaapostoli waJesu Kkristu, ndilikumulembela inywe nimwakajana lusyomo luyandikana luli mbuli lwesu, kwiinda mubululami bwaLeza wesu aMufutuli Jesu Kkristu:
2 Luzyalo lupati aluumuno aziyungizigwe kulindinywe kwiinda muluzibo lwachoonzyo lwaLeza alwaJesu Mwaami wesu, 3 nkaambo manguzu aaLeza atupa zintu zyoonse* zipa kuti tube aabuumi akuti tulipede kulinguwe amoyo woonse kwiinda muluzibo lwachoonzyo lwaYooyo wakatwiita, kwiinda mubulemu bwakwe abubotu bwakwe. 4 Kwiinda muzintu eezi, wakatupa* zisyomezyo zibotu alubo zipati loko, kuchitila kuti kwiinda mulinzizyo, mube basikutola lubazu mubulemu bwaLeza, mbukunga mwakachija kubola kwanyika, kweetwa aakaambo kachiyandisyo chibi.
5 Akaambo kakaambo aaka, amubeleke changuzu kuti kulusyomo lwanu muyungizye bubotu, kububotu bwanu muyungizye luzibo, 6 kuluzibo lwanu muyungizye kulinyona, kukulinyona kwanu muyungizye kulisimya, kukulisimya kwanu muyungizye kulipeda kuli Leza, 7 kukulipeda kwanu kuli Leza muyungizye luyando lwabuzyalwanyokwe, kuluyando lwanu lwabuzyalwanyokwe muyungizye luyando. 8 Nkaambo kuti zintu eezi kazili mulindinywe alubo kazifusuuka, zizoopa kuti mutabi bakandu* naakuti batazyali michelo atala aluzibo lwachoonzyo lwaMwaami wesu Jesu Kkristu.
9 Nkaambo muntu uutakwe zintu eezi moofu, uufwinya meso aakwe kuti ataboni mumuni* alubo waluba kusalazigwa kwakwe kuzwa kuzibi zyakwe zyachiindi. 10 Nkinkaako bakombima, amuyungizye biya kubeleka changuzu, kuchitila kuti kwiitwa kwanu akusalwa kwanu kube kwachoonzyo, nkaambo kuti mwayinkilila kunembo kuchita zintu eezi, tamukakachilwi pe nikuba kuti kube biyeni. 11 Kwaamba choonzyo, munzila eeyi muzoopegwa chilongezyo chipati chakunjila* muBwaami butamani bwaMwaami wesu aMufutuli, Jesu Kkristu.
12 Akaambo kakaambo aaka, ndiyanda kukkala kandimuyeezya zintu eezi, nikuba kuti mulizizi alubo mulizyatide mukasimpe kali mulindinywe. 13 Pesi ndizibona kazili kabotu, kuti kufumbwa kandichili mutente eeli,* ndimusungwaazye aziyeekezyo, 14 mbukunga ndilizi kuti tente lyangu lyaba aafwiifwi kugwisigwa, mbuli mbaakandisalazizya Mwaami wesu Jesu Kkristu. 15 Ndinoochita zintu zyoonse nzindikonzya, kuchitila kuti nindeenda, muzookonzye kuziyeeya zintu eezi.
16 Teetwakamuzibya manguzu aaMwaami wesu Jesu Kkristu akubawo kwakwe kwiinda mukutobela twaano twakubeja tulukidwe kabotu-kabotu, pesi twakalibonena biya bulemu bwakwe. 17 Nkaambo wakatambula kulemekwa abulemu kuzwa kuli Leza Taata, chiindi bulemu bugambya nibwakamubuzya majwi aali mbuli aaya aakuti:* “Ooyu Mwanaangu ngundiyandisya, uundibotezya ime lwangu.” 18 Kwaamba choonzyo, majwi aaya twakaamvwa kaazwa kujulu nitwakali aanguwe muchilundu chisalala.
19 Nkinkaako, tulaajwi eeli lyabupolofita lyakachitwa kuba lyachoonzyo, alubo mulikuchita kabotu kuliswiilila, mbuli lambe limunika mumudima (kusikila kubuchedo aniyazwa nyenyeezi yakubuchedo) mumyoyo yanu. 20 Nkaambo chakusaanguna mulizi kuti, taakwe bupolofita bwaLugwalo buzwa kubupanduluzi bwabantu pe. 21 Nkaambo bupolofita taakwe nibwakeetwa akaambo kakuyanda kwamuntu pe, pesi bantu bakaambuula zizwa kuli Leza kabazulwidwa aamuuya uusalala.