Milimu yaBaapostoli
18 Nizyakayinda zintu eezi, wakazwa ku-Atene mpawo wakasika kuKkorinte. 2 Alubo wakajana umwi muJuda uutegwa Akkwila wakazyalilwa kuPonto, wakali aachiindi chifwiifwi kazwide ku-Itali amwanakazi wakwe Prisila, nkaambo Kkilawudiyasi wakali walayilila kuti maJuda boonse bazwe muRoma. Nkinkaako wakayinka nkubakabede, 3 alubo wakakkala aamuunzi wabo akubelekaamwi ambabo nkaambo bakali kuchita mulimu uukozyenie awakwe wakupanga matente. 4 Musabata imwi ayimwi, wakali kupa nkani* muchikombelo alubo wakali kukwelelezya maJuda amaGrikki.
5 Sila aTimoti nibakasika kabazwa kuMakkedoniya, Pawulu wakasaanguna kubelesya chiindi chakwe chiingi kukambawuka jwi kumaJuda, kabatondeezya kuti Jesu nguKkristu. 6 Pesi nibakayinkilila kunembo kumukazya akumubuzya majwi mabi, wakakunkumuna zigogo zyakwe mpawo wakati kulimbabo: “Mulandu waganzi awube aamitwe yanu. Ime ndilasalala. Lino ndaabuya kukukambawukila bantu bazisi.” 7 Nkinkaako, Pawulu wakazwa mpawaawo,* wayinka kung’anda yaTitiyasi Justo, wakali kukomba Leza, ooyo wakali aang’anda yakabambene aachikombelo. 8 Pesi mweendelezi wachikombelo uutegwa Kkrispasi wakasaanguna kusyoma muMwaami abamung’anda yakwe boonse. Alubo bantu biingi bamuKkorinte bakamvwa makani mabotu, bakasaanguna kusyoma mpawo bakabbabbatizigwa. 9 Mukuyungizya, Mwaami wakabuzya Pawulu muchilengaano mansiku kuti: “Utayoowi pe, pesi yinkilila kunembo kulikwaambuula kupela, utawumuni pe 10 nkaambo ndilaanduwe, taakwe muntu utakulwane pe kuti akuchise, nkaambo ndili aabantu biingi loko mumuunzi ooyu.” 11 Nkinkaako, wakakkala nkukooko kwamunyaka uumwi amyeezi iili musanu awumwi, kalikuyiisya jwi lyaLeza aakati kabo.
12 Galiyo naakali mweendelezi* wa-Akkaya, maJuda bakajatana kuti babukile Pawulu alubo bakamutola kuchuuno chakubetekela, 13 kabati: “Mwaalumi ooyu ulikuyunga bantu kuti bakombe Leza munzila iiteendelani amulawu.” 14 Pesi Pawulu naakali kuyanda kwaambuula, Galiyo wakabuzya maJuda kuti: “Inywe nimaJuda, kaansinga kuli chibi chachitwa naakuti kuli mulandu wachitwa, ndalikunoolipa chiindi chakumuswiilila amoyo mulamfu. 15 Pesi kuti kakuli nkukazyania atala amajwi, mazina, amulawu wanu, amukalibonene. Ime tandiyandi pe kubeteka zintu zili boobu.” 16 Mpawo wakabatanda kuti bazwe kunembo lyachuuno chakubetekela. 17 Nkinkaako, boonse bakajata Sositeni mweendelezi wachikombelo mpawo bakasaanguna kumuuma kunembo lyachuuno chakubetekela. Pesi Galiyo taakayanda pe kuliswaanizya muzintu zyoonse eezi zyakali kuchitika.
18 Mpawo Pawulu naakakkala kwamazuba, wakalaya bakombinyina mpawo wakatanta bwaato waya kuSiriya. Wakasindikilwa aaPrisila a-Akkwila. Kali kuKkenikkriya wakagelwa masusu nkaambo wakali wachita chikonke. 19 Nkinkaako, nibakasika ku-Efeso wakabasiya, pesi wakanjila muchikombelo wasaanguna kwaambuuzyania aamaJuda. 20 Nikuba kuti bakamukombelezya kuti akkale kwamazuba miingi, pesi taakazumina pe. 21 Naakalaya, wakababuzya kuti: “Kuti kakuli kuyanda kwaJehova,* ndizooboola lubo kulindinywe.” Mpawo wakatanta bwaato kazwa ku-Efeso, 22 mpawo wakasika kuKkesariya. Wakatanta waya kukujuzya mbungano. Mpawo wakakunuka waya ku-Antiyokkiya.
23 Naakakkala-kkala kundawu eeyo, wakazwa alubo wakeenda muunzi amuunzi munyika yoonse yaGalatiya ayaFuligiya kalikusimya basikwiiya boonse.
24 Ku-Efeso, kwakasika umwi muJuda uutegwa Apolo wakazyalilwa ku-Alekizandriya. Mwaalumi ooyu wakali aachipo chakwaambuula alubo wakaazi loko Magwalo. 25 Mwaalumi ooyu wakayiisidwe* nzila yaJehova* alubo wakali kupya mumuuya. Wakali kwaambuula akuyiisya zintu ziluleme atala aJesu, pesi nchaakazi biyo ninkambawuko yaJohane iili atala akubbabbatizigwa. 26 Mwaalumi ooyu wakasaanguna kwaambuula katayoowi pe muchikombelo mpawo Prisila a-Akkwila nibakamumvwa, bakamubweza mpawo bakamupandulwida makani aaLeza munzila iili njiyo. 27 Mbukunga wakali kuyanda kuzubuka kuti aye ku-Akkaya, bakombinyina bakalembela basikwiiya bankukooko lugwalo lwakuti bamutambule kabotu. Naakasika nkukooko, wakabagwasya loko bantu bakali basyomi akaambo kaluzyalo lupati lwaLeza, 28 nkaambo wakatondeezya aantanganana alubo changuzu kunembo lyabantu kuti maJuda balisweekede, kalikubatondeezya kuzwa muMagwalo kuti Jesu nguKkristu.