Baami Wachibili
22 Josiya wakali aaminyaka iili musanu ayitatu naakaba mwaami, alubo wakeendelezya kwaminyaka iili 31 muJerusalema. Banyina bakali kutegwa Jedida mwana wa-Adaya wakuBbozikkati. 2 Wakachita ziluleme mumeso aaJehova alubo wakeenda munzila zyoonse zyaDavida sianyinakulu, taakwe naakaleyela kuchilisyo naakuti kuchimweensi.
3 Mumunyaka wachi 18 wabweendelezi bwaMwaami Josiya, mwaami wakatuma Shafani mulembi, mwana wa-Azaliya mwana waMeshulamu kung’anda yaJehova kati: 4 “Kuya kuli Hilikkiya mupayizi mupati, ukamubuzye kuti abweze mali yoonse iilikweetwa mung’anda yaJehova, eeyo balindi bamilyango njibabunganizya kayizwa kubantu. 5 Mali eeyo ngayipegwe aabo basalidwe kuti beendelezye mulimu mung’anda yaJehova, mpawo bantu aabo balayipa babelesi bamung’anda yaJehova, aabo beelede kubambulula ng’anda mpiifwide,* 6 nkukwaamba aabo bali aaluzibo lwakupanga zintu, basikuyaka, abasikuyaka kababelesya mabwe. Alubo beelede kubelesya mali eeyo kuula mapulanga amabwe aanengedwe kuti babambulule ng’anda. 7 Pesi tabalangililwi kuti baambe kuti bayibelesya biyeni mali njibapegwa, nkaambo balasyomeka.”
8 Nikwakayinda chiindi, Hilikkiya mupayizi mupati wakabuzya Shafani mulembi kuti: “Ndajana bbuku lyaMulawu mung’anda yaJehova.” Nkinkaako, Hilikkiya wakapa Shafani bbuku eelyo, mpawo wakasaanguna kulibala. 9 Mpawo Shafani mulembi wakayinka kumwaami waakumubuzya kuti: “Babelesi bako bakuna mali yajanika mung’anda, mpawo bayipa aabo basalidwe kuti beendelezye mulimu mung’anda yaJehova.” 10 Alubo Shafani mulembi wakabuzya mwaami kuti: “Kuli bbuku ndyaandipa Hilikkiya mupayizi.” Mpawo Shafani wakasaanguna kulibala kunembo lyamwaami.
11 Mwaami mbaakaamvwa biyo majwi aamubbuku lyaMulawu, wakadelula zigogo zyakwe. 12 Mpawo mwaami wakalayilila Hilikkiya mupayizi, Ahikkamu mwana waShafani, Akkibbori mwana waMikkaya, Shafani mulembi, a-Asaya mubelesi wamwaami, kuti: 13 “Amwiinke mukabuzye makani kuli Jehova kuchitila kuti ime abantu amaJuda boonse, tuzibe nzitweelede kuchita atala amajwi aali mubbuku eeli lyajanika. Nkaambo bukali bwaJehova bwatuvutukila mbupati, akaambo kakuti masianene teebakaaswiilila pe majwi aali mubbuku eeli, nkaambo bakaleka kubamba makani woonse aalembedwe aali atala andiswe.”
14 Nkinkaako, Hilikkiya mupayizi, Ahikkamu, Akkibbori, Shafani, a-Asaya, bakayinka kuli Hulida mupolofita wachanakazi. Mwanakazi ooyu wakali mwanakazi waShalumu mwana waTikkiva mwana waHahasi, ooyo wakali kulanga zigogo,* alubo wakali kukkala Mundawu Mpya yaJerusalema. Bakaambuulaawe nkukooko. 15 Mwanakazi ooyu wakababuzya kuti: “Nzezi nzyaamba Jehova Leza wa-Israyeli, ‘Amukabuzye mwaalumi wamutuma kulindime kuti: 16 “Nzezi nzyaamba Jehova, ‘Ndizooyeta penzi aandawu eeyi akubantu bakkala mumo, majwi woonse aali mubbuku aayo mwaami waJuda ngaabala, azoozuzikizigwa. 17 Akaambo kakuti bandisiya akuti balikuuntumuna busi bwazipayizyo kuli bamwi baleza kuchitila kuti bandinyemye amilimu yabo yoonse yamaboko aabo, bukali bwangu buzoovutukila ndawu eeyi alubo tabuzoozimiki pe.’” 18 Pesi mwaami waJuda ooyo wamutuma kuti muzoobuzye makani kuli Jehova, nzezi nzimweelede kumubuzya, “Nzezi nzyaamba Jehova Leza wa-Israyeli atala amakani ngwaamvwa: 19 ‘Akaambo kakuti moyo wako wabomba alubo walichesya kunembo lyaJehova nwaamvwa nzindaamba atala andawu eeyi abantu bakkala mumo—kuti bazooba chintu chigambya alutuko—akuti wadelula zigogo zyako akulila kunembo lyangu, andime ndakumvwa, mbaamba Jehova. 20 Eezi nzizyo zitazoope kuti ndikuzikkaamwi amasianyookulu, alubo uzoolazikwa mukabanda kako muluumuno. Meso aako taazoowaboni pe mapenzi woonse ngindiyanda kuzooyeta aandawu eeyi.’”’” Mpawo bakatola makani aaya kumwaami.