Samiyele Wakusaanguna
30 Davida abaalumi mbaakalaabo nibakasika kuZikkilagi mubuzuba bwachitatu, ma-Amalekki bakali basika banyanga bantu zintu kubbazu lyakumusanza* amuZikkilagi alubo bakalwana muunzi waZikkilagi mpawo bawutenta aamulilo. 2 Bakatola banakazi mubuzike abantu boonse bakali mumo, kuzwa kumuniini kusika kumupati. Taakwe ngubakajaya pe, pesi bakababweza bayinkaabo. 3 Davida abaalumi mbaakalaabo nibakasika kumuunzi, bakajana kawuli watentwa alubo banakazi babo abana babo balombe abana babo basimbi bakali batolwa mubuzike. 4 Nkinkaako, Davida abaalumi mbaakalaabo bakasaanguna kulila loko kusikila nguzu zyabo zyakulila zyamana. 5 Ambabo banakazi baDavida babili, Ahinowamu wakuJezriyeli a-Abbigeli, wakali mwanakazi waNabbali wakuKkameli, bakatolwa mubuzike. 6 Davida wakakataazikana loko, nkaambo baalumi bakali kwaamba kuti wakeelede kuumwa aamabwe, nkaambo baalumi boonse bakanyemede loko akaambo kabana babo balombe abana babo basimbi bakali babwezegwa. Pesi Davida wakalisimya muli Jehova Leza wakwe.
7 Davida wakabuzya Abbiyata mupayizi, mwana wa-Ahimelekki kuti: “Ndikumbila kabaki kabupayizi.” Nkinkaako, Abbiyata wakapa Davida kabaki kabupayizi. 8 Davida wakabuzya Jehova kuti: “Ndizitobele na zigwebenga eezi? Ndilazyeenzya na?” Mpawo Leza wakamusandula kati: “Zitobele, nkaambo kwaamba choonzyo, ulazyeenzya alubo ulafutula bantu akuboozya zintu.”
9 Chakufwambaana, Davida wakayinka aabaalumi bali 600 mbaakalaabo alubo bakeenda baakusika kuKalonga kaBbesori,* ooko bamwi baalumi nkubakasyaala. 10 Davida abaalumi bali 400 bakayinkilila kunembo kubaandilila, pesi baalumi bali 200 bakasyaala, nkaambo bakali bakatala loko kuti bazubuke Kalonga kaBbesori.
11 Bakajana mwaalumi waku-Ijipita musokwe mpawo bakamutola kuli Davida. Bakamupa chakulya kuti alye amaanzi kuti anywe 12 akankwa kankuyu ziyanikidwe azinkwa zibili zyamasaansa aayanikidwe. Naakamana kulya, wakaba aamanguzu,* nkaambo wakali waba aamazuba aatatu abusiku butatu katalide alubo katanywide maanzi. 13 Davida wakamubuzya kuti: “Uli mubelesi wani alubo uzwa kuli?” Mpawo mwaalumi ooyo wakati: “Ndili mubelesi waku-Ijipita, muzike wamu-Amalekki, pesi simalelaangu wakandisiya, nkaambo ndakachiswa kwamazuba aatatu ayinda. 14 Twakanyanga bantu zintu mumyuunzi iili kubbazu lyakumusanza* kwamaKkereti amumyuunzi yaJuda amumyuunzi iili kubbazu lyakumusanza* kwaKkalebbu alubo twakatenta muunzi waZikkilagi amulilo.” 15 Naakamvwa oobo, Davida wakati kulinguwe: “Ulanditola na kuzigwebenga eezi?” Mwaalumi ooyo wakasandula kati: “Kuti wakonka kulindime kwiinda muli Leza kuti tukoondijaya pe akuti tukoondibikka pe mukuboko kwasimalelaangu, ndilakutola kuzigwebenga eezi.”
16 Nkinkaako, mwaalumi ooyo wakamutola kundawu ooko nkubakazwide ndawu yoonse kabalikulya akunywa akusekelela akaambo kazintu zyiingi nzibakali babweza kunyika yamaFilisiti akunyika yaJuda. 17 Mpawo Davida wakasaanguna kubajaya kuzwa kuseeni kusika goko. Taakwe muntu wakafutuka pe kunze kwabaalumi bali 400 bakachija kabatantide nkamela. 18 Davida wakaboozya zintu zyoonse ma-Amalekki nzibakali babweza alubo Davida wakafutula banakazi bakwe babili. 19 Taakwe chintu chabo nichiba chimwi chakabulika, chibe chiniini naakuti chipati. Bakafutula bana babo balombe, bana babo basimbi azintu zyakali zyabwezegwa. Davida wakaziboozya zintu zyoonse nzibakali babweza. 20 Davida wakabweza mbelele ampongo ang’ombe zyoonse mpawo baalumi mbaakalaabo bakazibinga kazili kunembo lyazivuubwa zyabo kabaamba kuti: “Eezi nzizyaDavida nzyaanyanga.”
21 Mpawo Davida wakasika kwakali baalumi bali 200 bakali basyaala kuKalonga kaBbesori akaambo kakuti bakali bakatala zyakuti bakakachilwa kweenda aanguwe. Alubo baalumi aabo bakazwa kuti bakaswaanane aaDavida abantu mbaakalaabo. Davida naakasika aafwiifwi ambabo, wakabajuzya. 22 Nikuba oobo, baalumi boonse bakali aamyoyo mibi abatagwasyi bakali aakati kabaabo bakali bayinka aaDavida, bakati: “Mbukunga teebakayinka aandiswe, tatukoobapa pe kufumbwa zintu nzitwazaazyo kunze kwakuti umwi awumwi wabo abweze mwanakazi wakwe abana bakwe, ayinke.” 23 Pesi Davida wakati: “Peepe beenzuma, mutachiti oobo azintu Jehova nzyatupa. Wakatukwabilila alubo wakabikka zigwebenga zyakatulwana mukuboko kwesu. 24 Ngwani uunga ulazuminana aandinywe atala ankani eeyi? Zyaabilo nzibatajane aabo bakayinka kunkondo zyeelede kweelana anzibatajane aabo bakasyaala kabali kulinda zibbudu. Boonse beelede kujana zyaabilo zyeelene.” 25 Kuzwa mubuzuba oobo kaziya kunembo, nzyaakaamba Davida zyakaba mulawu anzila yakubeteka mu-Israyeli kusika sunu.
26 Davida naakabweeda kuZikkilagi, wakatumizya zimwi zintu zyakanyangwa kubaalu bamuJuda bakali beenzinyina. Wakati: “Nchechi chipo* chanu chazwa kuzintu zyakanyangwa kuli basinkondonyina baJehova.” 27 Wakazitumizya kuli baabo bakali kuBbeteli, bakali kuRamoti muNegebbu,* bakali kuJatiri, 28 bakali ku-Arowa, bakali kuSifumoti, bakali ku-Eshitemowa, 29 bakali kuRakkali, bakali mumyuunzi yamaJerameeli, bakali mumyuunzi yamaKkeni, 30 bakali kuHoma, bakali kuBborashani, bakali ku-Atakki, 31 bakali kuHebburoni amundawu zyoonse Davida abaalumi mbaakalaabo nzibakali kukkala kabeenda.