Samiyele Wachibili
4 Mwana waSawulu Ishi-bbosheti* naakamvwa kuti Abbineri wakali wafwa kuHebburoni, wakasaanguna kuyoowa* alubo ma-Israyeli boonse bakakataazikana. 2 Kwakali baalumi babili bakali kuzulwida nkamu zyabasikunyanga bantu zintu zyabana baSawulu. Umwi wakali kutegwa Bbaana, umwi wakali kutegwa Rekkabbu. Bakali bana baRimoni wakuBberoti, wamusyobo waBbenjamini. (Nkaambo Bberoti anjiyo yakali kubalilwa muchilawu chaBbenjamini. 3 Bantu bakuBberoti bakachijila kuGitayimu, ambulisunu bachili beenzu nkukooko.)
4 Jonatani mwana waSawulu wakali aamwana mulombe wakalemene mawulu. Wakali aaminyaka iili musanu chiindi nikwakasika mulumbe wakazwa kuJezriyeli wakali atala aSawulu aJonatani alubo sikumulela wakamubweza wachija. Pesi sikumulela naakali kuchija kayoowede, mwana ooyo wakawa mpawo wakalemana. Mwana ooyo wakali kutegwa Mefibbosheti.
5 Rekkabbu aBbaana, bana baRimoni wakuBberoti, bakayinka kung’anda ya-Ishi-bbosheti zuba kalipya loko naakalede sikati kalikupumuna. 6 Bakanjila mung’anda kabachitaanga bayanda kubweza wiiti mpawo bakamuyasa mwida. Kuzwa waawo, Rekkabbu amwanikaakwe Bbaana bakachija. 7 Nibakanjila mung’anda, wakalilede aabulo mung’anda yakwe yakoona alubo bakamuyasa wafwa mpawo bakamudyunkula mutwe. Bakabweza mutwe wakwe mpawo bakeenda busiku boonse amugwagwa wakali kuya ku-Arabba. 8 Bakeeta mutwe wa-Ishi-bbosheti kuli Davida kuHebburoni mpawo bakati kumwaami: “Ngoyu mutwe wa-Ishi-bbosheti mwana waSawulu sinkondonyokwe, ooyo wakali kuyanda kukujaya. Sunu Jehova wapa kuti mwaami simalelaangu abweedezye chibi kuli Sawulu akubana bakwe.”
9 Nikuba oobo, Davida wakasandula Rekkabbu amwanikaakwe Bbaana, bana baRimoni wakuBberoti kati: “Kwaamba choonzyo, mbuli Jehova mbali muumi, ooyo wakandivuna* kumapenzi woonse, 10 chiindi umwi muntu naakandibuzya kuti, ‘Sawulu wafwa,’ kalikuyeeya kuti ulikundeetela makani mabotu, ndakamujata ndamujaya kuZikkilagi. Njinjiyo mbadalo mutumwa njaakajana kuzwa kulindime! 11 Ani kutegwani abantu babi bajaya muntu uululeme walede aabulo mung’anda yakwe? Tandeelede kumupa mulandu na inywe akaambo kaganzi lyakwe akumulobya aanyika?” 12 Nkinkaako, Davida wakalayilila balombe kuti babajaye. Bakabadyunkula maboko amawulu, babaanzika aafwiifwi adambwa lili kuHebburoni. Pesi bakabweza mutwe wa-Ishi-bbosheti, mpawo bakawuzikka kundawu ya-Abbineri yakuzikkila bantu muHebburoni.