Kulonga
31 Jehova wakayinkilila kunembo kwaambuula aaMozesi kati: 2 “Ndasala Bbezaleli mwana wa-Uri mwana waHuri wamusyobo waJuda. 3 Ndilamuzuzya aamuuya waLeza akumupa busongo, kumvwisisisya aluzibo lwakupanga zintu zyamisyobo yoonse, 4 lwakupanga zintu zibotu kabelesya ngolida, nsiliva akkopa 5 aluzibo lwakunengulula akusekka mabwe alwakupanga zintu zyoonse kabelesya mapulanga. 6 Mukuyungizya, ndasala Oholiyabbu mwana wa-Ahisamakki wamusyobo waDani kuti amugwasye alubo ndilabikka busongo mumyoyo yabantu boonse bali aaluzibo, kuchitila kuti bapange zintu zyoonse nzindakakulayilila, nkukwaamba 7 tente lyakuswaanganina, bbokesi lyaBukamboni achivunisyo chalyo, zibelesyo zyoonse zyaatente, 8 tebbulu azibelesyo zyalyo, chibikkilo chamalambe changolida iisalalisya azibelesyo zyacho, chipayililo chatununkilizyo, 9 chipayililo chazipo zitentwa azibelesyo zyacho zyoonse, bbavu achikkalilo chalyo, 10 zigogo zibotu, zigogo zisalala zya-Aroni mupayizi azigogo zyabana bakwe batabeleke kabali bapayizi, 11 mafuta aakunanika atununkilizyo twamundawu iisalala. Balazichita zyoonse nzindakulayilila.”
12 Alubo Jehova wakabuzya Mozesi kuti: 13 “Buzya ma-Israyeli kuti, ‘Mweelede kuba aachoonzyo chakuti mulaabamba masabata aangu, nkaambo nchitondeezyo aakati kangu andinywe mumazyalani aanu kuchitila kuti muzibe kuti ime ndiJehova ndili kumusalazya. 14 Mweelede kubamba Sabata nkaambo lilasalala kulindinywe. Kufumbwa muntu uusofwaazya buzuba oobu, weelede kujayigwa alubo kufumbwa uutachite mulimu anguwe weelede kujayigwa. 15 Mulakonzya kubeleka kwamazuba aali musanu alimwi, pesi buzuba bwamusanu aabili, ndisabata lyakupumuna chakumaninina. Oobu mbuzuba busalala kuli Jehova. Kufumbwa muntu uuchita mulimu mubuzuba bwaSabata weelede kujayigwa. 16 Ma-Israyeli beelede kubamba Sabata, beelede kubamba Sabata mumazyalani aabo woonse. Eechi nchizuminano kukabe kutamani. 17 Nchitondeezyo kukabe kutamani aakati kangu ama-Israyeli nkaambo kwamazuba aali musanu alimwi, Jehova wakalenga majulu anyika mpawo mubuzuba bwamusanu aabili wakayimikila kubeleka alubo wakapumuna.’”
18 Mbaakamaninsya biyo kwaambuula aaMozesi muChilundu chaSinayi, wakapa Mozesi mabwe aabili aapapalete aaBukamboni aakalembedwe amunwe waLeza.