Detoronomi
18 “Bapayizi maLevi, nkukwaamba musyobo woonse waLevi, tabakwe chaabilo pe niluba lukono ama-Israyeli. Banoolya zipo zitentwa kuli Jehova, nduulukono lwabo. 2 Nkinkaako, tabeelede kuba aalukono aakati kabananyina, Jehova nduulukono lwabo mbuli mbaakababuzya.
3 “Nzezi bantu nzibeelede kupa bapayizi: Kufumbwa muntu uupa chipayizyo kufumbwa kuti ning’ombe naakuti nimbelele, weelede kupa mupayizi kuulu kwakunembo, miyaya akkulu. 4 Mweelede kumupa zilyo zyanu zyakusaanguna, wayini yanu mpya yakusaanguna, mafuta aanu aakusaanguna aboya bwakusaanguna mbumwakagela kumbelele zyanu. 5 Jehova Leza wanu wakasala nguwe abana bakwe kuzwa kumisyobo yanu yoonse kuti kabeleka muzina lyaJehova chiindi choonse.
6 “Pesi kuti muLevi wazwa muli umwi wamyuunzi yanu mu-Israyeli mwaakali kukkala nkaambo uyanda kuyookkala kundawu Jehova njaakasala,* 7 ulakonzya kubeleka muzina lyaJehova Leza wakwe nkukooko mbuli baLevinyina boonse balikubeleka kunembo lyaJehova nkukooko. 8 Weelede kunoojana chakulya cheelene aachabo kuyungizya kulizeezyo nzyaakajana naakawuzya lukono ndwaakajana kumasianyinakulu.
9 “Nimwazoonjila munyika Jehova Leza wanu njalikumupa, muteezyi kutobelezya michito iisesemya yazisi eezyo. 10 Aakati kanu takweelede kujanwa muntu uutenta mwanaakwe mulombe naakuti musimbi mumulilo,* musondi, simasalamusi, muntu uubuzya makani kuli simabibo, mulozi, 11 muntu uutumina bamwi ziposo, muntu wiinka kubasondi, muntu waamba zitazoochitike kunembo naakuti muntu uubuzya makani kubantu bakafwa. 12 Nkaambo kufumbwa muntu uuchita zintu eezi ulasesemya kuli Jehova. Jehova Leza wanu ulikutanda zisi eezi kunembo lyanu nkaambo zyakali kuchita michito eeyi iisesemya. 13 Mweelede kuba bantu batakwe nchibasolwaacho kunembo lyaJehova Leza wanu.
14 “Nkaambo zisi eezi nzimuli kuzunda zyakali kuswiilila basimasalamusi abasondi pesi Jehova Leza wanu ulikumukasya kuchita zintu zili boobu. 15 Jehova Leza wanu uzoomubusizya mupolofita uuli mbuli ndime aakati kabantu banu. Mweelede kumuswiilila. 16 Eeyi ninsandulo yazintu nzimwakakumbila Jehova Leza wanu kuHorebbu mubuzuba bwamuswaangano nimwakati, ‘Utapi kuti tumvwe jwi lyaJehova Leza wesu nikuba kuubona lubo mulilo ooyu mupati kuchitila kuti tutafwi.’ 17 Mpawo Jehova wakati kulindime, ‘Nzibaamba zilikabotu. 18 Ndizoobabusizya mupolofita uuli mbuli nduwe kuzwa aakati kabantu bakulimbabo. Ndizoobikka majwi aangu munkanwa lyakwe mpawo uzoobabuzya zyoonse nzindimulayilila. 19 Kwaamba choonzyo, muntu uutazooleke kuswiilila majwi aangu ngatazoowambe muzina lyangu, uzoolyaambilila zibi zyakwe.
20 “‘Kuti mupolofita walisumpula kwiinda mukwaamba makani muzina lyangu nginditamulayilide kuti aambe, naakuti waamba muzina lyabamwi baleza, mupolofita ooyo weelede kufwa. 21 Pesi kuti mumyoyo yanu mwalibuzya kuti, “Tuzooziba biyeni kuti Jehova teenguwe wakaamba makani aaya?” 22 Kuti mupolofita waamba makani muzina lyaJehova mpawo makani aayo taazuzikizigwa naakuti taachitika, nkukwaamba kuti Jehova teenguwe wakaamba makani aayo pe. Mupolofita ooyo unooli wakaamba chakulisumpula. Tamweelede kumuyoowa pe.’