Detoronomi
2 “Mpawo twakaboola akutozya kunkanda anzila yakuLwizi Lusalala, mbuli mbaakandibuzya Jehova alubo twakazyunguluka Chilundu chaSeyiri kwamazuba miingi. 2 Jehova wakazoondibuzya kuti, 3 ‘Mwaba aachiindi chilamfu kamuli kuzyunguluka chilundu eechi, lino amutozye kubbazu lyakunyika. 4 Layilila bantu kuti: “Amubambalizye mugaano wababbululu banu, nkukwaamba bana ba-Isawu bakkede muSeyiri. Balamuyoowa pesi mweelede kuchenjelela. 5 Mutabalwani* pe nkaambo tandikoomupa pe nyika yabo, nikaba kapanzi kandawu kakkwana ndyato, nkaambo Isawu ndakamupa Chilundu chaSeyiri kuti chibe chakwe. 6 Mweelede kubapa mali akaambo kachakulya nchimutalye alubo mweelede kubbadala maanzi ngimutanywe. 7 Nkaambo Jehova Leza wanu wakamulongezya muzintu zyoonse nzimwakachita. Ulizi mbumwakali kweenda munkanda eeyi mpati. Jehova Leza wanu wakali aandinywe muminyaka eeyi iili 40. Taakwe nchimwakabula pe.’” 8 Nkinkaako, twakababambalizya babbululu besu, nkukwaamba bana ba-Isawu bakkede muSeyiri, alubo teetwakabelesya nzila yaku-Arabba, yaku-Elati ayaku-Eziyoni-gebberi.
“Mpawo twakanyona tweenda katubelesya nzila yakunkanda yaMowabbu. 9 Jehova wakandibuzya kuti, ‘Mutabakataazyi alubo mutabalwani pe maMowabbu, nkaambo tandikoomupa nyika yabo kuti ibe lukono lwanu. Bana baLoti ndakabapa nyika ya-Ari kuti ibe lukono lwabo. 10 (Ma-Emimu ambabo bakali kukkala mumo. Bakali aamanguzu alubo bakali biingi kabali balamfu mbuli ma-Anakki. 11 Ambabo maRefayimu bakali kubonwa mbuli ma-Anakki alubo maMowabbu bakali kubaamba kuti ma-Emimu. 12 Chiindi, maHori bakali kukkala muSeyiri, pesi bana ba-Isawu bakabatanda akubanyonyoona mpawo bakakkala munyika yabo. Eezi nzizyo nzibatazoochite ma-Israyeli kunyika njibatazookone, Jehova njatazoobape.) 13 Lino amwiinke muzubuke Kalonga kaZeredi.’ Nkinkaako, twakakazubuka Kalonga kaZeredi. 14 Kuzwa kuKkadeshi-bbaneya kusika tukazubuke Kalonga kaZeredi, twakatola minyaka iili 38, kusika lyamana zyalani lyoonse lyabantu bakali kweelela kuya kunkondo bakali mukkeempu, mbuli mbaakali wabakonkezya Jehova. 15 Kuboko kwaJehova kwakabalwana akubagwisya mukkeempu kusikila bamana.
16 “Mbubakamana biyo kufwa baalumi boonse beelela kuya kunkondo, 17 Jehova wakaambuula lubo andime kati, 18 ‘Sunu mulayinda muchilawu chaMowabbu, nkukwaamba nyika ya-Ari. 19 Kuti mwasika aafwiifwi ama-Amoni, mutabakataazyi alubo mutabalwani pe, nkaambo tandikoomupa nyika yabo kuti ibe lukono lwanu. Ndakayipa bana baLoti kuti ibe lukono lwabo. 20 Anjiyo yakali kubonwa mbuli nyika yamaRefayimu. (Chiindi, maRefayimu bakali kukkala mumo alubo ma-Amoni bakali kubaamba kuti maZamizumimu. 21 Bantu aaba bakali aamanguzu, bakali biingi kabali balamfu mbuli ma-Anakki, pesi Jehova wakabanyonyoona kunembo lyama-Amoni alubo ma-Amoni bakabatanda mpawo bakkala munyika yabo. 22 Eezi nzizyo nzyaakachitila bana ba-Isawu bakkala muSeyiri lino. Wakanyonyoona maHori kunembo lyabo, kuchitila kuti babweze nyika eeyo akukkala mulinjiyo kusikila sunu. 23 Ma-Avimu bakakkala mumyuunzi yakali kusika kuGaza, kusikila nibakazoonyonyoonwa akunyangwa ndawu eeyo amaKkafitorimu bakazwa kuKkafitori.)*
24 “‘Amunyampuke muzubuke Kalonga ka-Anoni. Ndabikka Sihoni mu-Amori mwaami Heshibboni mukuboko kwanu. Nkinkaako, amusaangune kubweza nyika yakwe alubo mumulwane. 25 Sunu ndilapa kuti bantu boonse bali aansi aajulu bayoowe akuzazama, nibamvwa makani aali atala andinywe. Bazookataazikana akuzazama* akaambo kandinywe.’
26 “Nitwakali munkanda yaKkedemoti, ndakatuma batumwa kuMwaami Sihoni waHeshibboni amajwi aaluumuno aakuti: 27 ‘Ndikumbila kwiinda munyika yako. Tandikoozwa pe mumugwagwa alubo tandikooleya kuchilisyo naakuti kuchimweensi. 28 Ndilalya chakulya akunywa maanzi ngutanduuzizye kupela. Ndizumizye biyo kuti ndiinde 29 —bana ba-Isawu bakkala muSeyiri amaMowabbu bakkala mu-Ari nzizyo nzibakandichitila—kusikila ndizubuke Jodani, ndinjile munyika njalikutupa Jehova Leza wesu.’ 30 Pesi Mwaami Sihoni waHeshibboni taakatuzumizya pe kuti twiinde, nkaambo Jehova Leza wanu wakamuzumizya kuti alisumpule akuti ayumye moyo kuchitila kuti amubikke mukuboko kwanu mbuli mbumubwene sunu.
31 “Mpawo Jehova wakandibuzya kuti, ‘Amubone, ndasaanguna kale kumupa Sihoni anyika yakwe. Amubweze nyika yakwe kuti ibe lukono lwanu.’ 32 Sihoni naakazwa abantu bakwe kuti bazootulwane kuJahazi, 33 Jehova Leza wesu wakamubikka mumaboko eesu, nkinkaako, twakamuzunda abana bakwe abantu bakwe boonse. 34 Twakabweza myuunzi yakwe yoonse aachiindi eecho alubo twakanyonyoona myuunzi yoonse kuswaanizya abaalumi, banakazi abana. Taakwe ngutwakasiya kali muumi. 35 Twakabweza biyo zivuubwa azimwi zintu mumyuunzi njitwakali twazunda. 36 Taakwe muunzi ngutwakakachilwa kusika pe, kuzwa ku-Arowa iili kumugaano waKalonga ka-Anoni (kuswaanizya amuunzi uuli mumusena), kuyoosika kuGiliyadi, Jehova Leza wesu wakayibikka mumaboko eesu. 37 Nikuba oobo, teemwakaswena pe aafwiifwi anyika yama-Amoni, kunkomwe yoonse yaKalonga kaJabbokku akumyuunzi yoonse iili muchilawu chili aazilundu naakuti kundawu njitwakakasigwa aaJehova Leza wesu.