Lwabili kuBatesalonikka

1 Ndime Pawulu, kandilaamwi aSilvano* aTimoti, ndilikumulembela inywe nimbungano yabantu bakuTesalonikka iijisini aaLeza Taateesu aMwaami Jesu Kkristu:

2 Amube aaluzyalo lupati aluumuno kuzwa kuli Leza Taata akuMwaami Jesu Kkristu.

3 Tweelede kumulumba Leza chiindi choonse akaambo kandinywe bakombima. Eezi zileelela nkaambo lusyomo lwanu lulikukomena loko alubo luyando ndumutondeezyania moonse lulikuyungizya kuli umwi awumwi wanu. 4 Nkinkaako, tulikumudundilizya mumbungano zyaLeza akaambo kakulisimya nkumuchita alusyomo ndumutondeezya mumapenzi aanu woonse amubuyumu-yumu mbumulikuswaana. 5 Eezi zitondeezya kuti Leza ubeteka munzila iiluleme alubo zizoopa kuti mubonwe kuti muleelela kunjila muBwaami bwaLeza, oobo bulikupa kuti muswaane mapenzi.

6 Lubeta oolu luliluleme, nkaambo Leza ubweedezya mapenzi kuli baabo balikumupenzya. 7 Pesi inywe nimulikupenzegwa muzoowangununwa aamwi andiswe, aakuyubununwa Mwaami Jesu kuzwa kujulu angilozi zyakwe zili aamanguzu, 8 mumulilo uuvwilima naza kuzoobapa zibeelede aabo batazi Leza abaabo bataswiilili makani mabotu aali atala aMwaami wesu Jesu. 9 Bantu aaba bazoojana chisubulo chakunyonyoonwa kukabe kutamani, akugwisigwa kunembo lyaMwaami akubulemu bwamanguzu aakwe, 10 chiindi natazoosike kuzoolemekwaamwi abasalali bakwe alubo mubuzuba oobo, aabo boonse bakatondeezya lusyomo bazoogamba akaambo kanguwe, nkaambo mwakasyoma bukamboni mbutwakamupa.

11 Nkinkaako, tukkala katumukombela, kuchitila kuti Leza wesu amubone kuti muleelela kwiitwa aanguwe akuti kwiinda mumanguzu aakwe, achite zintu zyoonse zibotu zimubotezya amilimu yoonse yalusyomo. 12 Eezi zizoopa kuti zina lyaMwaami wesu Jesu lilemekwe mulindinywe akuti andinywe nimujisini anguwe mulemekwe, kweendelana aluzyalo lupati lwaLeza wesu alwaMwaami Jesu Kkristu.