Malakki
2 “Inywe nibapayizi, mulawu ooyu nguwanu. 2 Kuti mukake kuuswiilila akuubikka mumoyo kuti mulemeke zina lyangu,” mbaamba Jehova wamakamu, “ndizoomutuka alubo ndizoopa kuti zilongezyo* zyanu zichinche zibe lutuko. Kwaamba choonzyo, ndachincha zilongezyo zyanu kuti zibe lutuko nkaambo tamuli kuubamba pe mumoyo wanu.”
3 “Amubone! Akaambo kamichito yanu, ndizoonyonyoona* mbuto njimwakabyala, alubo ndizoomwaya mafumba kumeso aanu, mafumba aabanyama bamumapobwe aanu; alubo muzootolwa kulingawo.* 4 Mpawo muzooziba kuti ndime ndakapa mulawu ooyu kuchitila kuti chizuminano changu aLevi chiinkilile kunembo,” mbaamba Jehova wamakamu.
5 “Chizuminano changu anguwe chakali chabuumi aluumuno nzindakamupa, kuswaanizya akuyoowa.* Wakandiyoowa, kwaamba choonzyo wakaliyoowa zina lyangu. 6 Mulawu* wakasimpe wakali munkanwa lyakwe alubo taakwe kutalulama kwakajanika aamilomo yakwe. Wakeenda aandime muluumuno amubululami, alubo wakapa kuti biingi baleke kubisya. 7 Nkaambo milomo yamupayizi yeelede kukwabilila luzibo alubo bantu beelede kuyanduula mulawu* kuzwa kulinguwe nkaambo mutumwa waJehova wamakamu.
8 “Pesi inywe lwanu mwaleya munzila. Mwapa kuti biingi balebwe kwiinda mukutatobela mulawu.* Mwanyonyoona chizuminano chaLevi,” mbaamba Jehova wamakamu. 9 “Nkinkaako, ndilapa kuti munyansigwe akupa kuti mulangilwe aansi abantu boonse nkaambo teemwakeenda munzila zyangu pe, pesi mwakatondeezya kusaluula nimwakali kubelesya mulawu.”
10 “Toonse tatukwe ndeende uumwi na? TeeLeza umwi na wakatulenga? Nkinkaako, nkamboonzi nituli kuchitilana chalweeno, katusofwaazya chizuminano chamasianene? 11 Juda wakachita chalweeno alubo chintu chisesemya chakachitwa mu-Israyeli amuJerusalema; nkaambo Juda wakasofwaazya busalali* bwaJehova mbwayanda alubo wakabweza musimbi uukomba baleza bakuli zimwi nyika kuti abe mwanakazi wakwe. 12 Jehova uzoojaya muntu woonse uuchita eezi kuzwa mutente lyaJakkobo, kazitakwe ndaba kuti ngwani, nikuba kuti upa zipo kuli Jehova wamakamu.”
13 “Alubo kuli chimwi chintu* nchimuchita, chipa kuti muzuzye chipayililo chaJehova amisozi akulila akumimila,* zyakuti tachizibikkili maanu pe zipo zyanu nzimupa alubo tachiziyandi pe zintu zizwa mukuboko kwanu. 14 Alubo mwaamba kuti, ‘Akaambo kanzi?’ Akaambo kakuti Jehova waba kamboni aakati kanu amwanakazi wakubulombe bwanu ngumulikujata munzila yakutasyomeka nikuba kuti mweenzinyokwe alubo mwanakazi wanu wamumulawu.* 15 Pesi kuli uumwi uutazichitide pe nkaambo wakali aamuuya waLeza.* Muntu ooyo wakali kuyanduulaanzi? Wakali kuyanduula bana baLeza. Amuchenjelele muuya wanu, alubo mutachiti chakutasyomeka kubanakazi bakubulombe bwanu. 16 Nkaambo ndilakuzonda* kulekana,” mbaamba Jehova Leza wa-Israyeli, “ndilamuzonda muntu uuchita zyakulwana,”* mbaamba Jehova wamakamu. “Amuchenjelele muuya wanu, mutachiti chakutasyomeka pe.”
17 “Mwapa kuti Jehova akatale amajwi aanu. Pesi mwaamba kuti, ‘Twapa kuti akatale biyeni?’ Kwiinda mukwaamba kuti, ‘Muntu woonse uuchita zibi mubotu mumeso aaJehova alubo ulabotelwa akaambo kanguwe,’ naakuti kwiinda mukwaamba kuti, ‘Ulikuli Leza wabululami?’”