Detoronomi

5 Mozesi wakayita ma-Israyeli boonse, mpawo wakababuzya kuti: “Nima-Israyeli, amumvwe malayilile anzila zyakubeteka nzindili kumubuzya sunu alubo mweelede kuzyiiya akuzibamba kabotu. 2 Jehova Leza wesu wakapanga chizuminano andiswe kuHorebbu. 3 Jehova taakapanga chizuminano eechi amasianene pe, pesi wakachipanga aandiswe, toonse tubawumi nitulaano sunu. 4 Jehova wakaambuula aandinywe kamubwenene muchilundu kuzwa mumulilo. 5 Aachiindi eecho, ndakaliimvwi aakati kaJehova andinywe kuti ndimubuzye jwi lyaJehova, nkaambo mwakaliyoowede akaambo kamulilo alubo teemwakatanta pe muchilundu. Leza wakati:

6 “‘Ndime Jehova Leza wako, ooyo wakakugwisya munyika ya-Ijipita, mung’anda yabuzike. 7 Utabi aabamwi baleza kunze kwangu.

8 “‘Utalipangili chikozyano chibezedwe naakuti chifanikisyo chachimwi chintu chili kujulu naakuti aanyika naakuti mumaanzi kunsi aanyika. 9 Utazikotamini pe naakuti kuyungwa kuti uzibelekele, nkaambo ime ndiJehova Leza wako, ndime Leza uuyanda kukombwa biyo alikke, uusubula bana akaambo kamulandu wamawisi kusikila kuzyalani lyachitatu akuzyalani lyachine lyabaabo bandizonda, 10 pesi uutondeezya luyando lutamani kuzyuulu zyamazyalani aabaabo bandiyanda ababamba milawu yangu.

11 “‘Utabelesyi zina lyaJehova Leza wako munzila iiteelede, nkaambo Jehova takaleki pe kumusubula ooyo uubelesya zina lyakwe munzila iiteelede.

12 “‘Bamba buzuba bwaSabata bukkale kabusalala, mbuli mbaakakulayilila Jehova Leza wako. 13 Weelede kubeleka akuchita milimu yako yoonse mumazuba aali musanu alimwi, 14 pesi buzuba bwamusanu aabili ndisabata lyaJehova Leza wako. Taakwe mulimu ngweelede kuchita pe, iwe naba mwanaako mulombe naba mwanaako musimbi naba muzike wako wachaalumi naba muzike wako wachanakazi niiba ng’ombe yako niliba donki lyako niziba zivuubwa zyako naba mweenzu wako uukkede mumyuunzi yako,* kuchitila kuti muzike wako wachaalumi awachanakazi bapumune mbuli nduwe. 15 Yeeya kuti wakali muzike munyika ya-Ijipita akuti Jehova Leza wako wakakugwisya nkuko akuboko kutandabikidwe kuli aamanguzu. Jehova Leza wako nchaakakulayilila kuti ubambe buzuba bwaSabata.

16 “‘Lemeka wuso abanyoko mbuli mbaakakulayilila Jehova Leza wako, kuchitila kuti upone mazuba miingi akuti uzwidilile* munyika Jehova Leza wako njalikukupa.

17 “‘Utajayi.

18 “‘Utachiti bumambi.

19 “‘Utabbi

20 “‘Utapi bukamboni bwakubeja atala amweenzinyokwe.

21 “‘Uteemuzyi mwanakazi wamweenzinyokwe. Uteemuzyi ng’anda yamweenzinyokwe nuuba muunda wakwe naba muzike wakwe wachaalumi naba muzike wakwe wachanakazi niiba ng’ombe yakwe niliba donki lyakwe nichiba chintu chakwe.’

22 “‘Jehova wakaamba milawu eeyi kumbungano yoonse aachilundu ajwi pati kali mumulilo, mujoba amumudima uusiya mbi alubo taakwe nchaakayungizya pe mpawo wakayilemba aamabwe aabili aapapalete wandipa.

23 “‘Pesi mbumwakalimvwa biyo jwi lyakali kuzwa mumudima chilundu nichakali kuyaka mulilo, basilutwe boonse bamisyobo yanu abapati bakaza kulindime. 24 Mpawo mwakati, ‘Jehova Leza wesu watutondeezya bulemu abupati bwakwe alubo twamvwa jwi lyakwe kalizwa mumulilo. Sunu twalibonena kuti Leza ulakonzya kwaambuula aamuntu mpawo muntu ooyo ayinkilile kunembo kapona. 25 Tufwideenzi? Nkaambo mulilo ooyu mupati ulakonzya kutunyonyoona. Kuti twayinkilila kunembo kumvwa jwi lyaJehova Leza wesu, tulafwa biya. 26 Nkaambo ngwani biya aakati kabantu boonse wakamvwide jwi lyaLeza uupona kalyaambuula kuzwa mumulilo, mbuli mbutwachita, mpawo ayinkilile kunembo kapona? 27 Iwe biya nduwe weelede kwiinka aafwiifwi kuti ukamvwe zintu zyoonse nzyataambe Jehova Leza wesu, alubo nduwe uutazootubuzye zintu zyoonse nzyatakubuzye Jehova Leza wesu, iswe tulakuswiilila akuzichita.’

28 “‘Jehova wakaamvwa majwi ngimwakandibuzya, mpawo Jehova wakati kulindime, ‘Ndaamvwa majwi ngibaamba bantu aaba kulinduwe. Zyoonse nzibaamba zilikabotu. 29 Kuti bayinkilila kunembo kuba aamoyo wakundiyoowa akubamba milawu yangu yoonse; zilabeendela kabotu abana babo kukabe kutamani. 30 Yinka ukababuzye kuti: “Amubweede kumatente aanu.” 31 Pesi iwe kkala aawa andime, ndikubuzye milawu yoonse amalayilile anzila zyakubeteka nzweelede kubayiisya anzibeelede kuzoobamba munyika njindilikubapa kuti ibe yabo.’ 32 Inywe nibantu, mweelede kuchita mbuli mbaakamulayilila Jehova Leza wanu, mutaleyi kuchilisyo naakuti kuchimweensi. 33 Mweelede kweenda munzila zyoonse nzyaakamulayilila Jehova Leza wanu, kuchitila kuti mupone, muzwidilile akuti moongole munyika njimutazoobweze kuti ibe yanu.