Detoronomi
17 “Tamweelede kupayizya ng’ombe naakuti mbelele iilemene kuli Jehova Leza wanu naakuti iili aachimwi chintu nchiisolwaacho, nkaambo nchintu chisesemya kuli Jehova Leza wanu.
2 “Atuteedi mwaalumi naakuti mwanakazi wajanika aakati kanu muli umwi wamyuunzi Jehova Leza wanu njalikumupa, kachita zintu zibi mumeso aaJehova Leza wanu akutyola chizuminano chakwe, 3 mpawo waleya akusaanguna kukomba bamwi baleza akubakotamina, naakuti kukomba akukotamina zuba naakuti mweezi naakuti makamu woonse aakujulu, chintu nchinditamulayilide, 4 kuti mwabuzigwa naakuti mwamvwa atala ankani eeyi, mweelede kwiiyanduulisisya. Kuti kwajanika kuti choonzyo chintu eechi chisesemya chakachitwa mu-Israyeli, 5 mwaalumi naakuti mwanakazi wakachita chibi eecho, mweelede kumugwisya aanze aamageedi aamuunzi mpawo mumuume aamabwe afwe. 6 Kuti bukamboni bwapegwa aabantu babili naakuti batatu, muntu ooyo wakabisya weelede kujayigwa, pesi kuti bukamboni bwapegwa aamuntu uumwi, tayelede kujayigwa pe. 7 Bakamboni mbabo beelede kusaanguna kumuuma kuti afwe mpawo nikutazootobele bamwi bantu boonse. Mweelede kugwisya bubi aakati kanu.
8 “Kuti mumyuunzi yanu mwabuka kaambo kamuyumina kukabeteka kaswaanizya kutilwa kwaganzi naakuti kamwi kaambo kayanda kuti kabetekwe naakuti kamwi kaambo kali atala akulwana naakuti amwi makani akukazyania, mweelede kunyampuka muye kundawu iitasalwe aaJehova Leza wanu. 9 Muzooyinke kubapayizi maLevi akumubetesi batanoobeleke mumazuba aayo mubabuzye kaambo kanu mpawo bazoomubuzya zinooli zyasalwa. 10 Mweelede kuchita kweendelana akusalwa nkubanooli bamubuzya kamuli kundawu Jehova njaakasala. Amube aachoonzyo chakuti mwachita zyoonse kweendelana ambubamulayilila. 11 Mweelede kuchita kweendelana amulawu ngubanooli bamutondeezya alubo kweendelana akusala nkubanooli bamubuzya. Mutaleyeli kuchilisyo naakuti kuchimweensi kukusala nkubanooli bamubuzya. 12 Muntu uulisumpula kwiinda mukutaswiilila mupayizi uulikubelekela Jehova Leza wanu naakuti uutaswiilili mubetesi, weelede kufwa. Mweelede kugwisya bubi mu-Israyeli. 13 Bantu boonse bazoomvwa makani aaya bazooyoowa mpawo tabazoofwi balisumpula lubo pe.
14 “Nimwazoonjila munyika Jehova Leza wanu njalikumupa akwiibweza alubo nimwazookkala mulinjiyo mpawo mwazoowamba kuti, ‘Atulisalile mwaami mbuli zisi zyoonse zituzyungulukide,’ 15 kuti kwaba oobo, mweelede kusala mwaami uunooli wasalwa aaJehova Leza wanu, mweelede kusala mwaami kuzwa kubantu bamusyobo wanu, tamweelede kusala mweenzu uutali wamusyobo wanu pe. 16 Nikuba oobo, mwaami tayelede kulibunganisizya mabbiza miingi pe naakuti kupa kuti bantu babweede ku-Ijipita kuti bakeete aambi mabbiza, mbukunga Jehova wakamubuzya kuti, ‘Tamweelede kubweeda lubo pe anzila eeyi.’ 17 Alubo tayelede kukwata banakazi biingi pe kuchitila kuti moyo wakwe utaleyi. Tayelede kulibunganizizya nsiliva angolida nyingi. 18 Kuti mwaami wazookkala aachuuno chakwe chabwaami, weelede kulilembela bbuku* lili aamajwi aaMulawu ooyu kakkopa kuli ooyo uubambidwe aabapayizi maLevi.
19 “Weelede kukkalaalyo alibale kwamazuba woonse aabuumi bwakwe kuchitila kuti ayiye kuyoowa Jehova Leza wakwe akubamba majwi woonse aaMulawu ooyu amalayilile aaya akwaachita. 20 Kuti wachita oobo, moyo wakwe tukoolisumpula pe kubantu bamusyobo wakwe. Takooleya pe kuzwa kumulawu ooyu kube kuchilisyo naakuti kuchimweensi, kuchitila kuti apone kwachiindi chilamfu mubwaami bwakwe, we abana bakwe aakati ka-Israyeli.