KuMahebberu
8 Kaambo kapati muzintu nzitulikwaamba nkakuti: Tuli aamupayizi mupati uuli mbuli yooyu, alubo ulikkede aansi kukuboko kwachilisyo kwachuuno chabwaami chaMupati kujulu, 2 mubelesi* wamundawu iisalala amutente lyachoonzyo, lyakayimikizigwa aaJehova* kutali amuntu pe. 3 Nkaambo mupayizi mupati woonse ulasalwa kuti ape zipo azipayizyo, nkinkaako, kwakali kuyandikana kuti ayooyu abe aachimwi chintu chakupa. 4 Kaansinga ulaanyika, taali kunooba mupayizi pe, mbukunga mpubali kale baalumi bapa zipayizyo kweendelana aMulawu. 5 Baalumi aaba balikuchita mulimu uusalala, uuli nchiichikozyano amweenzule wazintu zyakujulu, mbuli Mozesi naakali waba aafwiifwi kuyaka tente, wakapegwa malayilile aaLeza: Nkaambo waamba kuti: “Bona kuti wachita zintu zyoonse mbuli mbuzibede kweendelana ambwaakatondeezegwa kuchilundu.” 6 Pesi lino Jesu wajana mulimu* mubotu loko nkaambo anguwe ngusimwiimaakati wachizuminano chibotu, chakabambwa zili mumulawu, aazisyomezyo zibotu.
7 Kaansinga chizuminano chakusaanguna teechakapambanikide pe, teekwakali kunooyandikana chizuminano chachibili. 8 Nkaambo bantu ubajanina mulandu naamba kuti: “‘Amubone! Mazuba alikuza,’ mbaamba Jehova,* ‘aawo ninditazoopange chizuminano chipya abamung’anda ya-Israyeli abamung’anda yaJuda. 9 Tachinooli mbuli chizuminano nchindakapangana aamasianyinakulu mubuzuba nindakabajata kuboko akubagwisya munyika ya-Ijipita, nkaambo teebakakkalilila pe muchizuminano changu, nkinkaako ndakaleka kuba aandaba ambabo,’ mbaamba Jehova.*
10 “‘Nkaambo eechi nchicho chizuminano nchinditazoochite abamung’anda ya-Israyeli aakwiinda mazuba aayo,’ mbaamba Jehova.* ‘Ndizoobikka milawu yangu mumizeezo yabo alubo ndizooyilemba mumyoyo yabo. Alubo ndizooba Leza wabo mpawo ambabo bazooba bantu bangu.
11 “‘Alubo taakwe uutazooyiisye muntu wamuchisi chakwe amweenzinyina kuti: “Ziba Jehova!”* Nkaambo boonse bazoondiziba, kuzwa kumuniini aakati kabo kusika kumupati. 12 Nkaambo ndizoobeetelela kumichito yabo iitaluleme, alubo tandizooziyeeyi lubo pe zibi zyabo.’”
13 Kwiinda mukwaamba kuti “chizuminano chipya,” wapa kuti chakusaanguna chibule mulimu. Nkinkaako, eecho chamaninwa mulimu alubo chilikuzakala chaba aafwiifwi kumwayigwa.