Detoronomi
20 “Kuti mwayinka kunkondo kuti mukalwane basinkondonyokwe mpawo mwabona kuti bali aamabbiza, ngolo zyankondo amasooja miingi kwiinda aanu, mutabayoowi pe nkaambo Jehova Leza wanu wakamugwisya munyika ya-Ijipita uli aandinywe. 2 Nimuyanda kuya kunkondo, mupayizi weelede kusika aambuule aabantu. 3 Weelede kubabuzya kuti, ‘Swiilila, O Israyeli, lino waamba kuya kukulwana basinkondonyokwe. Ba aachibindi. Utayoowi pe nikuba kuzazama nikuba kukankama akaambo kambabo. 4 Nkaambo Jehova Leza wako ulikweenda kunembo lyako kuti akakulwanine kuli basinkondonyokwe akuti akuvune.’
5 “Basilutwe ambabo beelede kubuzya bantu kuti, ‘Mpali na wakayaka ng’anda uutanayikkala pe? Abweede kung’anda yakwe, ulabona waakufwida kunkondo mpawo umwi muntu akkale mulinjiyo. 6 Mpali na wakalima muunda wamisaansa uutanatebula michelo yayo? Abweede kung’anda yakwe, ulabona waakufwida kunkondo mpawo umwi muntu atebule michelo yayo. 7 Mpali na wakatumina musimbi pesi katanamukwata? Abweede kung’anda yakwe, ulabona waakufwida kunkondo mpawo umwi mwaalumi amukwate. 8 Ambabo basilutwe beelede kubuzya bantu kuti, ‘Mpali na uuyoowede uutakwe chibindi? Abweede kung’anda yakwe kuchitila kuti atapi kuti beenzinyina bayoowe mbuli nguwe.’ 9 Kuti basilutwe bamaninsya kwaambuula aabantu, beelede kusala bapati bamasooja kuti bazulwide bantu.
10 “Kuti mwasika muli umwi muunzi ngumuyanda kulwana, bantu bamumuunzi ooyo mweelede kubabuzya nzibeelede kuchita kuti mutabalwani pe. 11 Kuti bazizumina nzimwaamba mpawo bamujulila kuti munjile, bantu boonse mbimwajana balaba bazike banu, banoomubelekela. 12 Pesi kuti bakaka kubamba luumuno andinywe mpawo bayanda kuti mulwane, amuusinkile muunzi wabo. 13 Kwaamba choonzyo, Jehova Leza wanu uzoobabikka mukuboko kwanu. Mweelede kujaya baalumi boonse bali muli nguwo apanga. 14 Nikuba oobo, banakazi, bana, zivuubwa azintu zyoonse zili mumuunzi ooyo, zintu zyoonse zyabasinkondonyokwe mulakonzya kuzibweza zibe zyanu alubo mulakonzya kulya zintu zyabasinkondonyokwe eezyo Jehova Leza wanu nzyaamupa.
15 “Eezi nzimutazoochite kumyuunzi yoonse iili kule andinywe, iitali yazisi eezi zili aafwiifwi. 16 Pesi taakwe chintu chipona nchimweelede kusiya kachili chuumi mumyuunzi yabantu aaba, Jehova Leza wanu njalikumupa kuti ibe lukono lwanu. 17 Pesi mweelede kubanyonyoona chakumaninina maHeti, ma-Amori, maKkenani, maPerezi, maHivi maJebbusi mbuli mbaakamulayilila Jehova Leza wanu; 18 kuchitila kuti batamuyiisyi kutobela michito yabo yoonse iisesemya njibakali kuchitila baleza babo, iipa kuti mubisizye Jehova Leza wanu.
19 “Kuti mwasinkila muunzi mpawo mwawuzunda nimwazwa kuulwana kwamazuba miingi, tamweelede kugonka minsamu yawo pe. Mulakonzya kulya michelo yayo pesi tamweelede kwiigonka pe. Minsamu yamusokwe nga mulayisinkila aanga muntu na? 20 Minsamu njimuzi kuti tayiligwi njiyo kupela njimukonzya kugonka. Mulakonzya kwiigonka mpawo mwiibelesye kukusinkila muunzi ngumuli kulwana aanguwo kusikila muuzunde.