Lwakusaanguna kuBakkorinte
6 Kuti umwi wanu kali aakaambo amweenzinyina, nkamboonzi namutola kunkuta yabantu bataluleme, kwiinda kuti amutole kubasalali? 2 Tamuzi na kuti basalali bazoobeteka nyika? Kuti kakuli kuti nyika izoobetekwa aandinywe, tamukonzyi na kubeteka twaambo tuniini loko? 3 Tamuzi na kuti tuzoobeteka ngilozi? Kuti kakuli oobo, kujana twakachilwa na kubeteka makani aabuumi oobuno? 4 Nkinkaako, kuti kamuli aamakani aabuumi oobuno aayanda kubetekwa, nga mulasala bantu balangilwaansi ambungano na kuti babe babetesi? 5 Ndilikwaamba zintu eezi kuti mube aabweeme. Mundibuzya kuti taakwe muntu musongo na aakati kanu, uukonzya kubeteka makani aakati kabakombinyina? 6 Pesi mulikutolana kunkuta zyabantu batasyomi. Kujana mwachita oobo na kunembo lyabantu batasyomi?
7 Kuti kamulikutolana kunkuta, kwaamba choonzyo mwazundwa kale. Nkamboonzi nimutalekeli biyo kuti umwi wamubisizya? Nkamboonzi nimutalekeli biyo kuti mwabbidwa? 8 Kwiinda kuti muchite oobo, mulikubisizya bakombinyokwe akubabbida. Kujana mwachita oobo na kubakombinyokwe?
9 Tamuzi na kuti bantu bataluleme tabazookoni Bwaami bwaLeza? Muteenwi* pe. Basibwaamu,* basikukomba zibumbwa, basimamambi, baalumi boonwa aabaaluminyina, baalumi boona baaluminyina, 10 babbi, basikutangala, basikukolwa, basikutukila, amasosi, tabazookoni Bwaami bwaLeza. 11 Nikuba oobo, bamwi banu mbumwakabede, pesi mwakasanzigwa, mwakasalazigwa, mwakaambwa kuti muliluleme muzina lyaMwaami Jesu Kkristu amuuya waLeza wesu.
12 Kulindime zintu zyoonse zilizumizidwe, pesi teezintu zyoonse zigwasya. Kulindime zintu zyoonse zilizumizidwe, pesi tandikoozumina kweendelezegwa aachintu choonse. 13 Chakulya nchabula, alubo bula mbwachakulya pesi Leza uzoozinyonyoona zyoonse. Mubili teewakuchita bwaamu* pe, pesi nguwaMwaami alubo Mwaami nguwe uulangania mubili. 14 Nikuba oobo, Leza wakabusya Mwaami, andiswe uzootubusya kuzwa kulufu kabelesya manguzu aakwe.
15 Tamuzi na kuti mibili yanu nzipanzi zyaKkristu? Ndibweze zipanzi zyaKkristu na, ndikaziswaanizye aawuule? Peepe! 16 Tamuzi na kuti kufumbwa muntu uuliswaanizya aawuule, mubili uumwi andilyo? Nkaambo Leza waamba kuti: “Babili bazooba mubili uumwi.” 17 Pesi kufumbwa muntu uujisini aaMwaami, ulaamwi anguwe mumuuya. 18 Amuchije bwaamu!* Chimwi chibi choonse nchakonzya kuchita muntu, chili aanze aamubili wakwe, pesi kufumbwa muntu uuchita bwaamu, ubisizya mubili wakwe. 19 Tamuzi na kuti mibili yanu nditempele lyamuuya uusalala uuli mulindinywe ngumwakapegwa aaLeza? Buumi bwanu teebwanu pe, 20 nkaambo mwakawulwa aamuulo. Nkinkaako, amweezye amanguzu aanu woonse kulumbayizya Leza mumibili yanu.