Baami Wachibili
5 Naamani silutwe wankamu yamasooja aamwaami waSiriya wakali mwaalumi uuli aampuwo kalemekwa aasimalelaakwe, nkaambo Jehova wakali wapa kuti Siriya izunde* kwiinda mulinguwe. Wakali silumamba uuli aamanguzu nikuba kuti wakali sichipele.* 2 Aali chimwi chiindi, maSiriya nibakali kunyanga bantu zintu munyika ya-Israyeli, bakabweza kamwi kasimbi bakatola mubuzike mpawo kakaba mubelesi wamwanakazi waNaamani. 3 Kakabuzya namalelo wako kuti: “Kaansinga simalelaangu wayinka kumupolofita kuSamariya! Ulamuponia chipele chakwe.” 4 Nkinkaako, wakayinka* waakubuzya simalelaakwe atala anzyaakabuzigwa aakasimbi kaku-Israyeli.
5 Mwaami waSiriya wakati: “Yinka lino! Ndilatumizya lugwalo kumwaami wa-Israyeli.” Nkinkaako, wakayinka kanyampwide matalenta* aansiliva aali kkumi, ngolida iilema mashekeli aali 6 000, azigogo zyakuchincha zili kkumi. 6 Wakeeta lugwalo kumwaami wa-Israyeli, lwakalembedwe kuti: “Ndatuma mubelesi wangu Naamani kuti aze aalugwalo oolu kulinduwe, kuchitila kuti umuponie chipele chakwe.” 7 Mwaami wa-Israyeli mbaakalubala biyo lugwalo oolu, wakadelula zigogo zyakwe mpawo wakati: “Ndime Leza na me uuli aamanguzu aakujaya akufutula? Nkaambo wanditumina mwaalumi ooyu kuti ndimuponie chipele chakwe! Mwalibonena kabi kuti uliikuyanda kukazyania aandime.”
8 Pesi Elisha muntu waLeza wakasimpe naakamvwa kuti mwaami wa-Israyeli wadelula zigogo zyakwe, wakatumizya mulayizyo mpawaawo kumwaami kati: “Wazidelwidaanzi zigogo zyako? Mubuzye aze kulindime kuchitila kuti azibe kuti kuli mupolofita mu-Israyeli.” 9 Nkinkaako, Naamani wakasika amabbiza aakwe angolo zyakwe zyankondo, wayimikila kumulyango wang’anda ya-Elisha. 10 Nikuba oobo, Elisha wakatuma mutumwa kuti akamubuzye kuti: “Yinka, ukasambe muli Jodani kwaziindi zili musanu azibili, mpawo mubili wako ulaba kabotu alubo ulasalala.” 11 Naamani wakanyema loko mpawo wakasaanguna kweenda kati: “Ndalikulibuzya kuti, ‘Ulazwaanze aze kulindime, azooyimikile aawa ayite zina lyaJehova Leza wakwe, kalikuvukuuzya kuboko kwakwe aajulu aachipele kuchitila kuti achiponie.’ 12 Milonga yakuDamasikko, Abbana aFaripara, teemibotu na kwiinda maanzi woonse aamu-Israyeli? Tandikonzyi na kusambila mumo mpawo ndisalale?” Kuzwa waawo, wakachengunuka weenda kanyemede.
13 Babelesi bakwe bakayinka kulinguwe mpawo bakati: “Ndeende, kaansinga mupolofita wakubuzya kuti uchite chimwi chintu chiyumu, teewali kunoochichita na? Ani lino mbukunga wakubuzya biyo kuti, ‘Kasambe usalale’?” 14 Mpawo wakakunuka waakuliwaala* muli Jodani kwaziindi zili musanu azibili, kweendelana ajwi lyamuntu waLeza wakasimpe. Mpawo chikanda chakwe chakabota chaba mbuli chamwana muniini alubo wakasalala.
15 Kuzwa waawo, wakayinka kumuntu waLeza wakasimpe, kalaamwi ankamu yakwe yabantu mpawo wakayimikila kunembo lyakwe wati: “Lino ndaziba kuti taakwe kumbi pe kuli Leza munyika yoonse, kunze kwamu-Israyeli. Lino kaka, tambula chipo* chazwa kumubelesi wako.” 16 Pesi Elisha wakati: “AJehova muumi, ooyo ngundibelekela, tandikoochitambula pe.” Wakamukombelezya kuti achitambule, pesi wakaliswini kukaka. 17 Kumamanino, Naamani wakati: “Mbukunga wakaka, ime ndimubelesi wako ndikumbila undipe museele wamunyika eeyi uunyampulwa aamyuulu zibili, nkaambo ime ndimubelesi wako tandichizoopi chipo chitentwa naakuti chipayizyo kuli bamwi baleza kunze kwakupa Jehova alikke. 18 Pesi Jehova andilekelele ndimubelesi wako akaambo kachintu eechi chimwi biyo: Simalelaangu nayinka kung’anda yaRimoni* kuti akafugame nkukooko, nga ujisilidi aakuboko kwangu, eezi nga zyapa kuti ndikafugame kung’anda yaRimoni. Kuti ndazoofugama kung’anda yaRimoni, ikaka Jehova andilekelele ime ndimubelesi wako akaambo kakuchita oobo.” 19 Mpawo wakati kulinguwe: “Yinka muluumuno.” Naakazwa aalinguwe alubo kali weenda kasinzo, 20 Gehazi mubelesi wa-Elisha muntu waLeza wakasimpe wakalibuzya kuti: ‘Simalelaangu wamulekela Naamani ooyu wakuSiriya kuti ayende katatambwide zintu nzyaayeta. AJehova muumi, ndilamutobela ndikabweze chimwi chintu kulinguwe.’ 21 Nkinkaako, Gehazi wakamwaandilila Naamani. Naamani naakabona muntu kali kuchijaana musulaakwe, wakaseluka mungolo yakwe kuti akaswaananaawe mpawo wakati: “Zyoonse zilikabotu na?” 22 Mpawo wakati: “Zyoonse zilikabotu. Simalelaangu wandituma kuti ndizookubuzye kuti, ‘Mbwaazwa biyo, ndaswayigwa aabalombe babili bazwa kubana babapolofita, aabo bakkala muzilundu zya-Efremu. Ikaka, bape talenta limwi lyansiliva azigogo zibili zyakuchincha.’” 23 Naamani wakati: “Bweza aabili biya matalenta.” Naamani wakaliswini kumukombelezya mpawo wakaputila matalenta aabili aansiliva muzikwama zibili, azigogo zibili zyakuchincha. Wakazipa babelesi bakwe babili, mpawo bakazinyampula kabali kunembo lyaGehazi.
24 Naakasika ku-Ofeli,* wakabweza zintu eezyo nzibakanyampwide, wazibikka mung’anda mpawo wakababuzya kuti beende. Nibakeenda, 25 wakanjila waakwiimikila aafwiifwi asimalelaakwe. Elisha wakati kulinguwe: “Gehazi, wazwayi?” Pesi wakati: “Taakwe nkundali ndaya pe ndimubelesi wako.” 26 Elisha wakati kulinguwe: “Moyo wangu teewali aanduwe na ooko nkwaali wayinka chiindi mwaalumi uulya naaseluka mungolo yakwe kuti aswaanane aanduwe? Eechi nchiindi chakutambula nsiliva na naakuti zigogo naakuti myuunda yama-olifa naakuti myuunda yamisaansa naakuti mbelele naakuti ng’ombe naakuti babelesi bachaalumi naakuti bachanakazi? 27 Lino chipele chaNaamani chilanamatila aalinduwe akubana bako kukabe kutamani.” Wakazwa mpawaawo kunembo lyakwe kali aachipele chituba buu mbuli chaanda.*