Detoronomi
8 “Mweelede kubamba milawu yoonse njindilikumupa sunu, kuchitila kuti mwiinkilile kunembo kupona, muvule alubo munjile mubweze nyika Jehova njaakakonkezya kumasianyookulu. 2 Amuyeeye nzila ndamfu Jehova Leza wanu njaakapa kuti mweende mulinjiyo munkanda kwaminyaka eeyi iili 40, kuti amubombye akumusunka kutegwa azibe zili mumyoyo yanu, kuti abone kuti mwali kuzooyitobela na milawu yakwe naakuti pe. 3 Nkinkaako, wakamubombya akumuleka kuti mube aanzala, mpawo wakamusanina aamana njimwatakazi pe inywe amawuso kuchitila kuti muzibe kuti muntu taponi aachinkwa kupela, pesi upona aamajwi woonse aazwa mumulomo waJehova. 4 Zigogo nzimwakali kuzwaata teezyakazakala pe alubo mawulu aanu taakazimba pe muminyaka eeyi iili 40. 5 Muzizi kabotu mumyoyo yanu kuti Jehova Leza wanu wakali kumululamika mbuli mbachita muntu nalulamika mwanaakwe.
6 “Lino mweelede kubamba milawu yaJehova Leza wanu, kwiinda mukweenda munzila zyakwe akumuyoowa. 7 Nkaambo Jehova Leza wanu ulikumunjizya munyika mbotu, nyika iili aatulonga twamaanzi, tusawu atusensa tweenda maanzi mukkuti* amuchilawu chili aazilundu, 8 nyika iili aawiiti abbali, misaansa, mikuyu amipomegraneti, nyika iili aamafuta aama-olifa abuchi, 9 nyika iili aachakulya chiingi, taakwe nchimuzoobula pe, nyika iili aamabwe aali aansimbi alubo muzoosya kkopa muzilundu zyayo.
10 “Kuti mwazoolya mpawo mwakkuta, mweelede kutembawula Jehova Leza wanu akaambo kanyika mbotu njaakamupa. 11 Mutamulubi pe Jehova Leza wanu kwiinda mukuleka kubamba malayilile aakwe, nzila zyakwe zyakubeteka amilawu yakwe nzindili kumulayilila sunu. 12 Nimwaakulya akukkuta akuyaka maanda mabotu akukkala mulingawo, 13 ng’ombe zyanu ambelele zyanu nizyaakuvula, nsiliva angolida yanu niyaakuvula alubo zintu zyanu zyoonse nizyaakuvula, 14 mutakalekeli myoyo yanu kuti ilisumpule akupa kuti mulube Jehova Leza wanu, ooyo wakamugwisya munyika ya-Ijipita, mung’anda yabuzike, 15 ooyo wakapa kuti mwiinde munkanda mpati iiyoosya iili aanzoka zikali, tubanze amunyika yachimpayuma iitakwe maanzi. Nguwe wakapa kuti maanzi azwe mubbwe jumu, 16 wakamusanina aamana munkanda njibakatazi pe mawuso, kuchitila kuti amubombye akumusunka kuti zizoomugwasye kunembo. 17 Kuti mumyoyo yanu muzoolibuzye kuti, “Manguzu aangu akuboko kwangu ooku, nzizyo zyapa kuti ndibe aabunoti oobu,’ 18 mweelede kuyeeya kuti nguJehova Leza wanu uumupa manguzu aakuti mube aabunoti, kuchitila kuti azuzikizye chizuminano chakwe nchaakakonkezya kumasianyookulu, mbuli mbukubede sunu.
19 “Kuti muzoomulube Jehova Leza wanu akutobela bamwi baleza kuti mubabelekele akubakotamina, sunu ndimubuzya choonzyo kuti muzoomana. 20 Muzoomana mbuli zisi nzyali kunyonyoona Jehova kunembo lyanu, nkaambo munooli mwakaka kuswiilila jwi lyaJehova Leza wanu.