Kulonga
21 “Njeyi milawu yakubeteka njweelede kubabuzya:
2 “Kuti wawula muzike wachiHebberu, weelede kukubelekela kwaminyaka iili musanu awumwi, pesi mumunyaka wamusanu ayibili, weelede kumwaangununa katabbadede chintu pe. 3 Kuti kali wakaza aalikke uzoobweeda aalikke. Kuti kali wakalikwete, uzoobweeda amwanakazi wakwe. 4 Kuti simalelaakwe wamupa mwanakazi mpawo mwanakazi ooyo wamuzyalila bana balombe abasimbi, naazoobweeda weelede kwiinka alikke mpawo mwanakazi abana balaba basimalelaakwe. 5 Pesi kuti muzike ooyo wakaka kwiinka kati, ‘Ndilamuyanda simalelaangu amwanakazi wangu abana bangu, tandiyandi pe kwaangununwa.’ 6 Simalelaakwe weelede kumweeta kunembo lyaLeza wakasimpe, amwiimikizye aamulyango naakuti aamusende amudonkole kutwi kabelesya chidonkozyo, mpawo ulaba muzike wakwe kwabuumi bwakwe boonse.
7 “Kuti mwaalumi wawuzya mwanaakwe musimbi kuti abe muzike, takoowangununwa pe mbuli mbaangununwa muzike wachaalumi. 8 Kuti simalelaakwe taamuyanda pe mpawo waleka kumukwata kuti abe mwanakazi wakwe wakumbali, pesi kayanda kuti awulwe* aawumwi muntu, tayelede kumuuzizya muzwakule nkaambo unooli wamusweesya. 9 Kuti wasala kumupa mwanaakwe mulombe, weelede kumujata mbuli mwanaakwe musimbi. 10 Kuti wakwata umwi mwanakazi, weelede kusanina mwanakazi wakwe wakusaanguna, kumujanina zigogo akumupa nzyayelede mulukwatano. 11 Kuti waleka kumuchitila zintu eezi zitatu, mwanakazi ooyo ulaangunukide kweenda katabbadede mali pe.
12 “Kufumbwa muntu wuuma muntunyina kusikila wafwa, weelede kujayigwa. 13 Pesi kuti taachita aachaali alubo Leza kali wazizumizya kuti zichitike, ndilamusalila ndawu njatachijile muntu ooyo. 14 Kuti muntu wanyemena muntunyina akumujaya achaali mpawo wachijila kuchipayililo, mweelede kumugwisya mumujaye. 15 Kufumbwa mwana wuuma wisi naakuti banyina, weelede kujayigwa.
16 “Kufumbwa muntu uubba muntu naakuti wajatwa kalaawe, weelede kujayigwa.
17 “Kufumbwa muntu uutuka* wisi naakuti banyina, weelede kujayigwa.
18 “Nzezi zyeelede kuchitwa kuti bantu bakazyania mpawo umwi wawuma muntunyina abbwe pesi taafwa pe, pesi wamuchisa zyakuti woona aabulo bwakwe: 19 Kuti kakonzya kubuka akweendeenda aanze kabelesya mufunko, ooyo wakamuuma tayelede kusubulwa pe, pesi weelede kumubbadala akaambo kachiindi nchaakakachilwa kubeleka kusikila apone.
20 “Kuti muntu wawuma muzike wachaalumi naakuti wachanakazi akaponda mpawo wafwida mumaboko aakwe, weelede kusubulwa. 21 Pesi kuti kwayinda buzuba bumwi naakuti aabili katafwide, tayelede kusubulwa pe nkaambo wakamuula aamali yakwe.
22 “Kuti baalumi balwana bachisa mwanakazi ulaada mpawo mwanakazi ooyo watumbuka chiindi kachitanakkwana alubo kakutakwe wafwa, ooyo wamuchisa weelede kubbadala kweendelana azitaambwe aamulumi wamwanakazi ooyo kweendelana azitasalwe aababetesi. 23 Pesi kuti umwi wafwa, weelede kubbadala buumi abuumi, 24 liso aliso, linyo alinyo, kuboko akuboko, kuulu akuulu, 25 kupya akupya, chilonda achilonda, mfayindi amfayindi.
26 “Kuti muntu wawuma muzike wakwe wachaalumi naakuti wachanakazi aaliso mpawo lyafwa, weelede kubbadala liso lyamuzike ooyo kwiinda mukumuleka kuti ayende. 27 Alubo kuti wawuma muzike wakwe wachaalumi naakuti wachanakazi akumugwisya linyo, weelede kubbadala linyo lyamuzike ooyo kwiinda mukumuleka kuti ayende.
28 “Kuti ng’ombe yadinka mwaalumi naakuti mwanakazi mpawo wafwa, yeelede kuumwa aamabwe ifwe alubo nyama yayo tayeelede kuligwa pe, pesi munaayo tayelede kusubulwa pe. 29 Pesi kuti ng’ombe eeyo kayili aachiimbo chakudinka bantu, kakuli munaayo wakabuzigwa atala anjiyo alubo taakayijalila pe kusikila yazoojaya mwaalumi naakuti mwanakazi, yeelede kuumwa aamabwe ifwe alubo munaayo weelede kujayigwa. 30 Kuti muntu ooyo wategwa abbadale chinunuzyo, weelede kugwisya zyoonse nzyaataambilwe kuti anunune buumi bwakwe. 31 Kuti ng’ombe yadinka mwana mulombe naakuti musimbi, munaayo weelede kubbadala mbuli mbuuwamba mulawu ooyu. 32 Kuti ng’ombe yadinka muzike wachaalumi naakuti wachanakazi, munaayo weelede kubbadala mashekeli* aali 30 kuli simalelo wamuzike ooyo, mpawo ng’ombe eeyo ijayigwe kwiinda mukuumwa aamabwe.
33 “Kuti muntu waleka kujala kkomba naakuti wasya kkomba akuleka kulijala mpawo ng’ombe naakuti donki lyawida mukati, 34 weelede kubbadala munaamunyama ooyo, mpawo munyama wafwa ulaba wakwe. 35 Kuti ng’ombe yawumwi muntu yadinka yawumwi mpawo yafwa, beelede kuuzya yasyaala kayipona mpawo baabane mali eeyo ang’ombe yafwa. 36 Kuti kazizibinkene kuti ng’ombe eeyo yakali aachiimbo chakudinka zimwi mpawo munaayo waleka kwiijalila nikuba kuti wakabuzigwa, weelede kubbadala ng’ombe ang’ombe mpawo iifwide ilaba yakwe.