KuBaroma
14 Amumutambule muntu ulaalusyomo lutasimide, pesi aabo bali aamaboneno aasiyene aanu,* mutababeteki pe. 2 Umwi muntu ulaalusyomo lwakulya zintu zyoonse, pesi muntu uutasimide ulya zisyu kupela. 3 Ooyo uulya atamulangilaansi ooyo uutalyi, alubo ooyo uutalyi atabeteki ooyo uulya nkaambo Leza wamutambula. 4 Nduweni kuti ubeteke mubelesi wawumwi muntu? Kuwa kwakwe naakuti kwiimikila kwakwe zyiinka aasimalelaakwe. Kwaamba choonzyo, uzooyimikizigwa nkaambo Jehova* ulakonzya kupa kuti ayimikile.
5 Umwi muntu ubona bumwi buzuba kabuyandikana kwiinda bumwi, pesi umwi ubona bumwi buzuba kabukozyenie aamwi woonse. Umwi awumwi abe aachoonzyo chakuti nzyayeeya zilikabotu. 6 Ooyo uubamba buzuba, uchitila Jehova.* Alubo ooyo uulya, uchitila Jehova* nkaambo ulumba Leza. Ooyo uutalyi, uchitila Jehova* nikuba oobo nga walumba Leza. 7 Kwaamba choonzyo, taakwe naaba uumwi aakati kesu uuliponena alubo taakwe uulifwida pe. 8 Nkaambo kuti katupona, tuponena Jehova,* alubo kuti twafwa, tufwida Jehova.* Nkinkaako, kufumbwa kuti tulibawumi naakuti twafwa, tuli baJehova.* 9 Nkaambo Kkristu wakafwa alubo wakaba muumi lubo, kuchitila kuti abe Mwaami wabantu boonse, bawumi abafwide.
10 Pesi nkamboonzi nubeteka mukombinyokwe? Naakuti nkamboonzi numulangilaansi mukombinyokwe? Kabi toonse tuzooyimikila kunembo lyachuuno chaLeza chakubetekela. 11 Nkaambo kulilembedwe kuti: “‘Mbuli mbundili muumi,’ mbaamba Jehova,* ‘bantu boonse bazoondifugamina alubo bazoozumina aantanganana kuti ndime Leza.’” 12 Nkinkaako, umwi awumwi wesu uzoolyaambilila kunembo lyaLeza.
13 Nkinkaako, atuleke kubetekana pesi amukanze kutabikka chilebyo naakuti chimwi chintu chikonzya kuwisya mukombinyokwe. 14 Ndilizi alubo ndili aachoonzyo muMwaami Jesu, kuti taakwe chintu chitasalali pe. Pesi kuti umwi muntu wabona kuti chimwi chintu tachisalali, tachisalali pe kulinguwe. 15 Nkaambo kuti mukombinyokwe kalebwa akaambo kachakulya, nkukwaamba kuti tucheendi kweendelana aaluyando pe. Utanyonyooni muntu wakafwidwa aaKkristu akaambo kachakulya chako. 16 Nkinkaako, mutapi kuti zintu zibotu nzimuchita, zyaambwe kuti nzibi. 17 Nkaambo Bwaami bwaLeza tabwaambi kulya akunywa, pesi bwaamba bululami, luumuno akukondwa kwiinda mumuuya uusalala. 18 Nkaambo kufumbwa muntu uubelekela Kkristu munzila eeyi, ulatambulika kuli Leza alubo ulayandwa abantu.
19 Nkinkaako, atubeleke changuzu kuti tuchite zintu zyeeta luumuno azintu ziyaka umwi awumwi. 20 Amuleke kudilisya mulimu waLeza akaambo kachakulya biyo. Nisimpe kuti zintu zyoonse zilasalala, pesi tazili kabotu pe kuti muntu alye chintu chitape kuti bamwi balebwe. 21 Zilikabotu kuleka kulya nyama, kunywa wayini naakuti kuchita chimwi chintu chipa kuti mukombinyokwe alebwe. 22 Lusyomo ndulaalo alube lwako awulikke kunembo lyaLeza. Ulabotelwa muntu uutalipi mulandu akaambo kachintu nchabona kuti chilikabotu. 23 Pesi kuti katakwe choonzyo, unooli waba aamulandu kale kuti walya, nkaambo walya katakwe lusyomo pe. Kwaamba choonzyo, chintu choonse muntu nchachita katakwe lusyomo, nchibi.