Detoronomi
25 “Kuti baalumi babili bakazyania beelede kwiinka kubabetesi bakababeteke, muntu uululeme bayoomwaamba kuti takwe mulandu pe mpawo mubi bayoomwaamba kuti ulaamulandu. 2 Kuti sikubisya keelede kuumwa, mubetesi uyoolayilila kuti alale aansi mpawo bayoomuuma mweenzinyina kalangide. Tuponda ntwayelede kuumwa tweelede kweendelana aakubisya kwakwe. 3 Sikumuuma weelede kumuuma tuponda tuli 40, tayelede kwiinzilizya pe. Kuti wayinkilila kunembo kumuuma tuponda twiinda ootu, mwananyokwe uyoofwa bweeme kunembo lyako.
4 “Utaangi ng’ombe kumulomo chiindi niipola zilyo.
5 “Kuti baalumi bazyalwa aamwi kabakkalaamwi mpawo umwi wabo wafwa katakwe mwana, mwanakazi wasikufwa tayelede kukwatwa aawumwi uutali wamumpuli. Malinyina* nguwe weelede kunjilila mwanakazi wasikufwa. 6 Mwana wakusaanguna ngwatazoozyale mwanakazi ooyo, uzoobusilizya zina lyasikufwa, kuchitila kuti zina lyakwe litalobi pe mu-Israyeli.
7 “Kuti malinyina* katayandi kukwata mwanakazi wasikufwa, mukamufu ooyo weelede kwiinka kubaalu bamumuunzi kugeedi akaambe kuti, ‘Malima ulikukaka kubusilizya zina lyamwana wabanyina mu-Israyeli. Talikuyanda pe kundinjilila.’ 8 Baalu bamumuunzi beelede kumwiita baambuule aanguwe. Kuti kaswini kukaka kati, ‘Tandiyandi pe kumukwata,’ 9 mwanakazi wasikufwa weelede kuswena kulinguwe kunembo lyabaalu, amugwisye manyatela mpawo amuswide kumeso aambe kuti, ‘Eezi nzizyo zyeelede kuchitwa kumuntu uutayandi kuyaka ng’anda yamwana wabanyina.’ 10 Mpawo zina lyampuli* yakwe mu-Israyeli lizooyitwa kuti, ‘Ng’anda yasikugwisigwa manyatela.’
11 “Kuti baalumi babili balwana mpawo mwanakazi wawumwi wasika kuti azoovune mulumaakwe kuli yooyo ngwalikulwanaawe, mpawo wamujata kubwaalumi, 12 mweelede kumugonka kuboko. Mutamufwidi nsoni pe.
13 “Muzikwama zyanu tamweelede kuba aamabwe aakupimya aabili aasiyene, pati adiini. 14 Utabi aazipimyo zibili zisiyene* mung’anda yako, chipati achiniini. 15 Weelede kuba aachikkelo chachoonzyo chitabbidi achipimyo chachoonzyo chitabbidi, kuchitila kuti upone mazuba miingi munyika Jehova Leza wako njalikukupa. 16 Nkaambo muntu woonse uutasyomeki uuchita zintu eezi, ulasesemya kuli Jehova Leza wanu.
17 “Amuyeeye nzibakamuchita ma-Amalekki munzila nimwakali kuzwa mu-Ijipita, 18 mbubakamuswaana munzila akulwana bantu boonse bakakatede abakatalikwe manguzu bakali kusyaalila musule lyanu. Teebakamuyoowa pe Leza. 19 Jehova Leza wanu aakumupumuzya kuli basinkondonyokwe boonse bamuzyungulukide munyika Jehova Leza wanu njalikumupa kuti ibe lukono lwanu, mweelede kunyonyoona ma-Amalekki kuchitila kuti batazooyeeyegwi lubo pe aansi aajulu. Mutazoolubi pe.