Samiyele Wachibili
7 Mwaami kali wakkala mung’anda yakwe* alubo Jehova kali wapa kuti apumune kuli basinkondonyina boonse bakamuzyungulukide, 2 mwaami wakabuzya mupolofita Natani kuti: “Bona, ime ndikkede mung’anda yazisamu zyamukkedari, kakuli Bbokesi lyaLeza wakasimpe likkede mutente lipangidwe aamilembo.” 3 Natani wakasandula mwaami kati: “Yinka ukachite kufumbwa zili mumoyo wako, nkaambo Jehova ulaanduwe.”
4 Mubusiku mbuboobo, jwi lyaJehova lyakasika kuli Natani kaliti: 5 “Yinka ukabuzye mubelesi wangu Davida kuti, ‘Nzezi nzyaamba Jehova: “Nga ulandiyakila ng’anda na yakuti ndikkale? 6 Nkaambo tandinaba aabuzuba ndakkala mung’anda pe kuzwa mubuzuba nindakagwisya ma-Israyeli ku-Ijipita kusika sunu, pesi ndakali kweenda kandili mutente alubo kandili mutente lyakukombela. 7 Kwachiindi choonse nindakali kweenda aama-Israyeli boonse, kuli nindakabuzya bazulwidi bamisyobo yama-Israyeli na, aabo mbindakasala kuti beembele bantu bangu ma-Israyeli kuti: ‘Nkamboonzi nimwakatandiyakila ng’anda yazisamu zyamukkedari?’”’ 8 Nkinkaako, buzya mubelesi wangu Davida kuti, ‘Nzezi nzyaamba Jehova wamakamu: “Ndakakubweza kumachezezyo, kuli kutobela butanga kuti ube muzulwidi wabantu bangu ma-Israyeli. 9 Ndinooli aanduwe kufumbwa nkuya alubo basinkondonyokwe boonse ndizoobanyonyoona kunembo lyako. Mukuyungizya, ndizoopa kuti zina lyako libe pati mbuli zina lyabantu balemekwa aanyika. 10 Ndizoobasalila ndawu bantu bangu ma-Israyeli akupa kuti bakkale aalinjiyo alubo bayookkala nkuko, taakwe chitazoobanyonganie lubo pe. Basizibi tabazoobadyaaminini lubo pe mbuli mbubakachita chiindi, 11 kuzwa mubuzuba nindakabikka babetesi kuti beendelezye bantu bangu ma-Israyeli. Alubo ndizoopa kuti upumune kuli basinkondonyokwe boonse.
“‘“Mukuyungizya, Jehova wakakubuzya kuti Jehova uzookuyakila ng’anda.* 12 Nutazoofwe akuzikkwa amasianyookulu, ndizoopa kuti umwi wabana bako abe mwaami, nkukwaamba mwanaako mulombe. Ndizoobukkazikizya bwaami bwakwe. 13 Nguwe uutazooyake ng’anda iitazoope kuti zina lyangu lilemekwe alubo ndizookkazikizya chuuno chakwe chabwaami kukabe kutamani. 14 Ndizooba wisi anguwe uzooba mwanaangu. Kuti wabisya, ndizoomululamika aakaponda kabantu azimboko zyabana babantu.* 15 Luyando lwangu lutamani taluzoogwisigwi pe aalinguwe mbuli mbundakalugwisya aali Sawulu, ooyo ngundakagwisya kunembo lyako. 16 Ng’anda yako abwaami bwako zinooyimvwi nji kukabe kutamani kunembo lyako. Chuuno chako chabwaami chizookkazikizigwa kukabe kutamani.”’”
17 Natani wakabuzya Davida majwi aaya woonse kuswaanizya achilengaano eechi choonse.
18 Mpawo Mwaami Davida wakanjila, wakkala aansi kunembo lyaJehova mpawo wakati: “Ndimeni biya, O Mwaami Singuzuzyoonse Jehova? Alubo bamung’anda yangu mbaani biya zyakuti nga ulandichitila zintu zyoonse eezi? 19 Kuyungizya aali zeezi, O Mwaami Singuzuzyoonse Jehova, iwe waamba kuti, ng’anda yamubelesi wako inooliwo kwachiindi chilamfu alubo malayilile aaya ngabantu* boonse, O Mwaami Singuzuzyoonse Jehova. 20 Niinzi chimwi nchakonzya kwaamba kulinduwe mubelesi wako Davida kakuli iwe undizi kabotu, O Mwaami Singuzuzyoonse Jehova? 21 Wachita zintu zyoonse eezi zipati alubo waziyubununa kumubelesi wako akaambo kajwi lyako alubo kweendelana amoyo wako.* 22 Nchuli mupati, O Mwaami Singuzuzyoonse Jehova. Taakwe uuli mbuli nduwe pe alubo taakwe umwi Leza kunze kwako. Zyoonse nzitwakamvwa amatwi eesu zitondeezya kuti majwi aaya ngachoonzyo. 23 Nchiichili chimwi chisi aanyika chili mbuli bantu bako ma-Israyeli? Leza wakayinka waakubanununa kuti babe bantu bakwe alubo wakalipangila zina kwiinda mukubachitila zintu zipati alubo zigambya. Wakatanda zisi abaleza bazyo akaambo kabantu bako, aabo mbwaakanununa ku-Ijipita kuti babe bantu bako. 24 Wakasala bantu bako ma-Israyeli kuti babe bantu bako kukabe kutamani alubo iwe, O Jehova, wakaba Leza wabo.
25 “Lino O Jehova, zuzikizya chisyomezyo nchwaachita atala amubelesi wako ang’anda yakwe kukabe kutamani alubo chita mbuli mbwaasyomezya. 26 Zina lyako alisumpulwe kukabe kutamani kuchitila kuti bantu baambe kuti, ‘Jehova wamakamu nguLeza wama-Israyeli’ alubo ng’anda yamubelesi wako Davida ayikkazikizigwe kunembo lyako. 27 Nkaambo iwe, Jehova wamakamu, Leza wama-Israyeli, wayubunwida mubelesi wako makani aakuti: ‘Ndizookuyakila ng’anda.’* Mubelesi wako nchatayoowi kukomba nkombyo eeyi kulinduwe. 28 Lino, O Mwaami Singuzuzyoonse Jehova, nduwe Leza wakasimpe amajwi aako ngakasimpe alubo mubelesi wako wamusyomezya zintu eezi zibotu. 29 Nkinkaako, botelwa aakulongezya* ng’anda yamubelesi wako. Alubo ng’anda eeyo ayiinkilile kunembo kayiliwo kukabe kutamani kunembo lyako, nkaambo iwe O Mwaami Singuzuzyoonse Jehova, wasyomezya eezi alubo chilongezyo chako achibe mung’anda yamubelesi wako kukabe kutamani.”