Milimu yaBaapostoli
6 Mumazuba aayo, basikwiiya nibakali kuvula, maJuda bakali kwaambuula chiGrikki bakasaanguna kung’ung’unina maJuda bakali kwaambuula chiHebberu, nkaambo bamukabafu babo teebakali kupegwa chakulya chakali kwaabilwa buzuba abuzuba. 2 Nkinkaako, bali Kkumi Ababili bakayita nkamu yabasikwiiya mpawo bakababuzya kuti: “Tazili kabotu pe kuti iswe tusiye jwi lyaLeza kuti tukaabanisye chakulya aamatebbulu. 3 Nkinkaako, bakombima, amusale baalumi bali musanu ababili bali aampuwo mbotu aakati kanu, bazwide muuya uusalala abusongo mpawo iswe tulabapa mulimu wakuti balange-lange nkani eeyi iiyandikana, 4 mpawo iswe tulalipeda amoyo woonse kukukomba akukukambawuka jwi.” 5 Nzibakaamba zyakababotela bantu boonse mpawo bakasala Stefani, mwaalumi wakazwide lusyomo amuuya uusalala, kuswaanizya aFilipi, Purokkora, Nikkanora, Timoni, Pamenasi aNikkolayo waku-Antiyokkiya, ooyo wakasandukila kubukombi bwamaJuda. 6 Mpawo bakabeeta kubaapostoli. Nibakabakombela, bakababikka maboko.
7 Akaambo kazintu eezi, jwi lyaLeza lyakayinkilila kunembo kuzula alubo basikwiiya bakali kuvula loko muJerusalema alubo nkamu mpati yabapayizi yakasaanguna kuba aalusyomo.
8 Stefani wakazwide luzyalo lwaLeza amanguzu alubo wakali kuchita zigambyo zipati azitondeezyo aakati kabantu. 9 Pesi bamwi baalumi bakabunga kaChikombelo chaBantu Baangunukide, kabalaamwi abamwi bakuKkurene, baku-Alekizandriya abamwi bakuKkilikkiya abaku-Asiya, bakasika kuti bazookazye Stefani. 10 Pesi bakakachilwa kumuzunda akaambo kabusongo amuuya uusalala nzyaakalaazyo naakali kwaambuula. 11 Mpawo bakayunga bantu chakusisikizya kuti baambe kuti: “Twamumvwa kalikwaamba majwi aakusampula Mozesi aLeza.” 12 Alubo bakapa kuti bantu abaalu abalembi babusye musindo mpawo bakasika bamuvuumukila, bamujata changuzu mpawo bakamutola kuNkuta Mpati yamaJuda. 13 Alubo bakeeta bakamboni bakubeja mpawo bakati: “Mwaalumi ooyu uliswini kwaamba zintu zibi atala andawu eeyi iisalala kuswaanizya aMulawu. 14 Muchikozyano, twakamumvwa kalikwaamba kuti ooyu Jesu wakuNazareta uzoodilisya ndawu eeyi mpawo achinche milawu njitwakapegwa aaMozesi.”
15 Bantu boonse bakakkede muNkuta Mpati yamaJuda nibakamulanga, bakabona kuti kumeso kwakwe kwakali mbuli kwangilozi.