Milimu yaBaapostoli
14 Ku-Ikkoniyo, bakanjilaamwi muchikombelo chamaJuda mpawo bakaambuula munzila yakuti nkamu mpati yamaJuda amaGrikki bakaba basyomi. 2 Pesi maJuda bakatasyoma, bakakolongania bantu bazisi akubasungilizya kuti babukile Pawulu aBbanabbasi. 3 Nkinkaako, bakatola chiindi chilamfu kabaambuula achibindi, nkaambo Jehova* wakabapede manguzu. Leza wakapa bukamboni atala aluzyalo lwakwe lupati, kwiinda mukupa kuti bachite zigambyo azitondeezyo. 4 Nikuba oobo, bantu biingi bamumuunzi bakaanzaana. Bamwi bakaba kubbazu lyamaJuda pesi bamwi bakaba kubbazu lyabaapostoli. 5 Bantu bazisi amaJuda abeendelezi babo, nibakeezya kubafubaazya akubatulula mabwe, 6 bakabuzigwa atala anzizyo, mpawo bakachijila mumyuunzi yaLikkawoniya, Listra aDebbe akuli imwi myuunzi yakali aafwiifwi. 7 Nibakali nkukooko, bakayinkilila kunembo kwaambilizya makani mabotu.
8 MuListra, mwakali umwi mwaalumi wakalemene mawulu wakakkede aansi. Mwaalumi ooyu wakazyedwe kalemene alubo taakwe naakali weenda pe. 9 Mwaalumi ooyu wakali kuswiilila Pawulu naakali kwaambuula. Pawulu naakamulangisisya akubona kuti ulaalusyomo lukonzya kumuponia, 10 wakati ajwi pati: “Nyampuka, wiimikile.” Nkinkaako, wakanyampuka mpawo wakasaanguna kweenda. 11 Bantu nibakabona zyakachitwa aaPawulu, bakoompolola mumulaka wachiLikkawoniya kabati: “Baleza baba mbuli bantu alubo batuselukila!” 12 Mpawo bakasaanguna kwiita Bbanabbasi kuti Zewusi pesi Pawulu bakamwiita kuti Hemesi, nkaambo nguwe wakali kunembo kukwaambuula. 13 Kumulyango wamuunzi, kwakali tempele lyaleza uutegwa Zewusi. Nkinkaako, mupayizi waleza ooyu wakaza aabapule bang’ombe amisini yamaluba kumulyango wamuunzi kuti azoope zipayizyo kalaamwi ankamu yabantu.
14 Pesi baapostoli nibakazimvwa, nkukwaamba Bbanabbasi aPawulu, bakadelula zigogo zyabo, bachijaanina munkamu yabantu mpawo bakoompolola kabati: 15 “Beenzuma, nkamboonzi nimulikuchita zintu eezi? Andiswe tulibantu biyo mbuli ndinywe. Tulikwaambilizya makani mabotu kulindinywe, kuchitila kuti musiye zintu eezi zitagwasyi mpawo muze kuli Leza uupona ooyo wakalenga julu, nyika, lwizi azintu zyoonse zili mumo. 16 Mumazyalani aayinda, wakazumizya bantu bazisi zyoonse kuti beende munzila zyabo. 17 Nikuba oobo, taakaleka pe kupa bukamboni atala anguwe nkaambo wakamupa zintu zibotu, wakamuwisizya mvula, wakapa kuti mooloke akumukkutya aachakulya chipa kuti myoyo yanu ibotelwe.” 18 Nikuba kuti bakaamba majwi aaya, pesi teekwakabawubila pe kukasya makamu aabantu kuti bape zipayizyo kulimbabo.
19 Pesi maJuda bazwa ku-Antiyokkiya aku-Ikkoniyo bakasika, mpawo bakasungilizya bantu alubo Pawulu bakamutulula mabwe akumukwelela aanze aamuunzi kabayeeya kuti wafwa. 20 Nikuba oobo, basikwiiya nibakamubunganina, wakanyampuka mpawo wakanjila mumuunzi. Mubuzuba bwakatobela, wakaya kuDebbe aBbanabbasi. 21 Nibakaambilizya makani mabotu mumuunzi ooyo, akugwasya bantu biingi kuti babe basikwiiya, bakabweeda lubo kuListra, ku-Ikkoniyo aku-Antiyokkiya. 22 Kabali nkukooko, bakasimya basikwiiya akubasungwaazya kuti bakkalilile mulusyomo, kabati: “Tweelede kunjila muBwaami bwaLeza kwiinda mumapenzi miingi.” 23 Mukuyungizya, bakali kubasalila baalu mumbungano imwi ayimwi, kabali kukomba akulyiimya kulya, mpawo bakabasiya mumaboko aaJehova,* ooyo ngubakali baabusyoma.
24 Mpawo bakayinda muPisidiya basika kuPamfiliya. 25 Nibakamaninsya kwaambilizya jwi muPega, bakakunuka baya ku-Ataliya. 26 Nibakazwa ooko, bakatanta bwaato baya ku-Antiyokkiya, ooko nkubakali batondeezegwa luzyalo lupati lwaLeza, akaambo kamulimu ngubakali bamaninsya aachiindi eecho.
27 Nibakasika, bakabungania mbungano mpawo bakaamba zintu zyiingi Leza nzyaakachita kwiinda mulimbabo, akuti wakali wajulila bantu bazisi mulyango wakuti basyome. 28 Nkinkaako, bakakkala aabasikwiiya kwachiindi chilamfu.