Habbakkukki
1 Mulumbe ngwaakatambula mupolofita Habbakkukki* muchilengaano:
2 Ndilalila kwachiindi chilamfu biyeni, O Jehova kuti undigwasye, pesi kutamvwide pe?
Ndilakumbila kwachiindi chilamfu biyeni kuti undivune kunkondo, pesi kutanjilili* pe?
3 Nkamboonzi nulikupa kuti ndibone zintu zibi?
Nkamboonzi nulikulekela bantu kabali kudyaamininwa?
Nkamboonzi nikuli lunyonyooko akulwana kunembo lyangu?
Alubo nkamboonzi nikuzwide kukazyania akutamvwanana?
4 Mulawu tuuchikwe manguzu pe,
Abululami tabuchichitwi pe.
Nkaambo basizibi bazyunguluka balulami.
Eezi nzizyo zyapambanisya bululami.
5 “Amulange aakati kazisi mubikkile maanu!
Amulangisisye kamugambide akugankabala;
Nkaambo kuzoochitika chimwi chintu mumazuba aanu
Nchimutazoosyomi pe nikuba kuti mwachibuzigwa.
6 Nkaambo ndilamubusizya maKkaludiya,
Chisi chikali alubo chikalafusi.
Bakukulula ndawu mpati yanyika
Kuti babweze myuunzi iitali yabo.
7 Balayoosya akukankamya.
Balibikkila milawu yabo abweendelezi.*
8 Mabbiza aabo alachijaana kwiinda basiluwe,*
Alubo balayoosya kwiinda bawumpe mansiku.
Mabbiza aabo aankondo alalika;
Mabbiza aabo azwa kule loko.
Avuumuka mbuli gumbe lifwambaanina kulya.
9 Boonse baza aabukali.
Masyu aabo alangide kunembo mbuli luuwo lwakubuzwezuba,
Bayola basungwa mbuli museele.
10 Baweela baami
Baseka nkume-nkume.
Baseka ndawu zyoonse zikwabilidwe;
Balundika dwi lyamuseele akuzizunda.
11 Mpawo balayinda mbuli luuwo akutimbula,
Pesi bazooba aamulandu,
Nkaambo baamba kuti manguzu aabo baajana kuli leza wabo.”*
12 Teewakaliwo na kuzwa lili alili, O Jehova?
O Leza wangu, Uusalala, tufwi pe.*
O Jehova, wakabasala kuti babeteke;
O Bbwe lyangu, wakababikka kuti beete chisubulo.*
13 Meso aako asalala loko zyakuti taabulangi pe bubi,
Alubo tulekeli bubi pe.
Ani mpo nkamboonzi nulikulekela basilweeno
Akuumuna biyo chiindi sizibi namena muntu uululeme kwiinda nguwe?
14 Nkamboonzi nupa kuti bantu babe mbuli baswi bamulwizi,
Mbuli zilenge zyamumaanzi ziyavula, zitakwe mweendelezi?
15 Zintu zyoonse eezi ulazilabula* akalobyo.
Ulazicha mukansabwe kakwe,
Alubo uzibikka mukanyandi kakwe.
Nzizyo zipa kuti abotelwe loko.
16 Nzizyo zipa kuti ape zipayizyo* kukansabwe kakwe
Akupa zipayizyo kukanyandi kakwe;
Akaambo kanzizyo, chaabilo chakwe chilaneneesya,*
Achakulya chakwe nchibotu.
17 Ani mpo unooswini kalongonona kansabwe kakwe na?*
Unooswini kajaya zisi katazifwidi luzyalo na?