Makani mabotu aakalembwa aaMateyo
21 Nibakali baba aafwiifwi akuJerusalema, bakasika kuBbetifeji aaChilundu chama-Olifa, mpawo Jesu wakatuma basikwiiya babili, 2 kati: “Amwiinke mumuunzi ngumulangide, mpawo mbumutasike biyo, mulajana donki lyaangidwe amwanaalyo. Amwaangunune muzaawo. 3 Kuti umwi muntu wamubuzya chimwi chintu, mweelede kwaamba kuti, ‘Mwaami ulikwaayanda.’ Mpawo ulamuzumizya mpawaawo kuti muzaawo.”
4 Eezi zyakachitika kuti kuzuzikizigwe eezyo zyakaambwa kwiinda mumupolofita, ooyo wakati: 5 “Amubuzye mwana musimbi waZiyoni kuti: ‘Bona! Mwaami wako ulikuza kulinduwe, amoyo uubombede katantide donki, nkukwaamba mwana wadonki, mwana wamunyama uunyampula zibbudu.’”
6 Nkinkaako, basikwiiya bakayinka baakuchita mbuli mbubakalayililwa aaJesu. 7 Bakeeta donki amwanaalyo alubo bakayala zigogo zyabo zyaajulu aalingawo, mpawo Jesu wakakkala aazigogo eezyo. 8 Bantu biingi bakayala zigogo zyabo zyaajulu munzila alubo bamwi bakali kutema ntabi zyaminsamu kabaziyala munzila. 9 Mukuyungizya, makamu aabantu aakali kweenda kunembo lyakwe abamwi bakali kumutobela musule, bakali koompolola kabati: “Inche kaka, mufutule Mwana waDavida! Ulilongezedwe ooyo uuza muzina lyaJehova!* Inche kaka, mufutule, iwe nuuli kujulu lyamajulu!”
10 Naakanjila muJerusalema, muunzi woonse wakaba aalupyopyongano, kawuti: “Ngwani ooyu?” 11 Makamu aabantu akaliswini kwaamba kuti: “Ooyu mupolofita Jesu, uuzwa kuNazareta yakuGalili.”
12 Jesu wakanjila mutempele mpawo wakatanda bantu boonse bakali kuuzya akuula mutempele, alubo wakapindimuna matebbulu aabasikuchincha mali azyuuno zyabaabo bakali kuuzya nziba. 13 Mpawo wakati kulimbabo: “Kulilembedwe kuti, ‘Ng’anda yangu izootegwa ning’anda yakukombela,’ pesi inywe mulikwiichita chiyubilo chababbi.” 14 Mukuyungizya, boofu abaabo bateendi bakasika kulinguwe mutempele alubo wakabasilika.
15 Bapati babapayizi abalembi nibakabona zintu zigambya nzyaakachita, abana balombe bakali koompolola mutempele kabati: “Inche kaka, mufutule Mwana waDavida!” bakanyema loko, 16 mpawo bakati kulinguwe: “Ulizimvwide na nzibalikwaamba bana aaba?” Jesu wakati kulimbabo: “Iiyi ndilizimvwide. Ani teemwakabala na kuti, ‘Kumilomo yabana ayatwana tunyonka wapa kuti kuzwe ntembawuzyo’?” 17 Nkinkaako, wakazwa mumuunzi ooyo wabasiya, mpawo wakaya kuBbetaniya, ooko nkwakaakoona.
18 Kuseeni loko naakali kubweeda kuJerusalema, wakaba aanzala. 19 Wakabona mukuyu wakali kumbali aanzila, mpawo wakayinka kulinguwo. Pesi taakwe nchaakajana pe kunze kwamatu kupela. Mpawo wakawubuzya kuti: “Kutachizoobi lubo muchelo aalinduwe.” Mpawo mukuyu ooyo wakayuma mpawaawo. 20 Basikwiiya nibakabona zintu eezi, bakagamba mpawo bakati: “Niinzi chapa kuti mukuyu ooyu uyume mpawaawo?” 21 Jesu wakabasandula kuti: “Kwaamba choonzyo, ndimubuzya kuti, kuti kamuli aalusyomo alubo kamutazumbuuzyi pe, tamuzoochiti nzindachita kumukuyu ooyu kupela, pesi nikuba kuti mwabuzya chilundu eechi kuti: ‘Nyukuka, uliwaale mulwizi,’ zizoochitika. 22 Alubo zintu zyoonse nzimukumbila nimukomba kamuli aalusyomo, muzoozipegwa.”
23 Naakanjila mutempele, bapati babapayizi abaalu babantu bakasika kulinguwe naakali kuyiisya, mpawo bakati: “Wakaajana kuli manguzu aakuchita zintu eezi? Alubo ngwani wakakupa manguzu aayo?” 24 Jesu wakabasandula kati: “Andime ndilamubuzya mubuzyo uumwi. Kuti mwandisandula, andime ndilamubuzya nkundaajana manguzu aakuchita zintu eezi. 25 Kubbabbatizya nkwaakachita Johane, kwakazwa kuli? Kujulu na, naakuti kubantu?” Pesi bakasaanguna kwaambuuzyania muli chabo-chabo kabati, “Kuti twati, ‘Kujulu,’ ulatubuzya kuti, ‘Nkamboonzi nimwakaleka kumusyoma?’ 26 Pesi kuti twati, ‘Kubantu,’ tuyoowa nkamu yabantu, nkaambo bantu boonse, Johane bamubona mbuli mupolofita.” 27 Nkinkaako, bakasandula Jesu kuti: “Tatuzi pe.” Anguwe wakati kulimbabo: “Andime tandikoomubuzya pe kuti manguzu aakuchita zintu eezi ndaajana kuli.
28 “Muyeeyaanzi? Umwi mwaalumi wakali aabana babili. Naakayinka kuli wakusaanguna, wakati: ‘Mwanaangu, sunu yinka kumuunda wamisaansa ukabeleke.’ 29 Pesi mwana ooyo wakasandula kuti: ‘Tandikooyinka pe.’ Pesi nikwakayinda chiindi, wakalisola mpawo wakayinka. 30 Naakayinka kuli wachibili, wakamubuzya makani aakozyenie. Mwana ooyu wakasandula kuti, ‘Ndilayinka Ndeende,’ pesi taakayinka pe. 31 Aakati kabana aaba babili, nguuli wakachita kuyanda kwawisi?” Bakati: “Ngwakusaanguna.” Jesu wakati kulimbabo: “Kwaamba choonzyo, ndimubuzya kuti, basimutelo amawuule balikumusaangunina kunjila muBwaami bwaLeza. 32 Nkaambo Johane wakaza kulindinywe munzila yabululami. Pesi teemwakamusyoma pe. Nikuba oobo, basimutelo amawuule bakamusyoma alubo nikuba kuti mwakazibona zintu eezi, teemwakalisola pe kuti mumusyome.
33 “Amumvwe chimwi chikozyanisyo: Kwakali umwi mwaalumi, mwininyika, wakalima muunda wamisaansa, wawuyakila mpawo wakasya chikandilo chawayini mulinguwo, wayaka ngazi mpawo wakawusiila balimi mpawo wakayinka kunyika iili kule. 34 Nichakaba chiindi chamichelo, mwininyika wakatuma bazike bakwe kubalimi kuti bakeete michelo yakwe. 35 Nikuba oobo, balimi aabo bakajata bazike. Umwi bakamuuma, umwi bakamujaya, umwi bakamutulula mabwe. 36 Mpawo wakatuma bamwi bazike biingi kwiinda bakusaanguna, pesi ambabo bakabachita mbuli bakusaanguna. 37 Kumamanino, wakatuma mwanaakwe kubalimi, kati, ‘Bazoomulemeka mwanaangu.’ 38 Balimi aabo nibakamubona mwana ooyo, bakati muli chabo-chabo: ‘Ooyu ngusikukona. Amuze tumujaye, mpawo tubweze lukono lwakwe!’ 39 Nkinkaako, bakamubweza, bamuwaalila aanze aamuunda wamisaansa mpawo bakamujaya. 40 Aazoosika mwinimuunda wamisaansa, uzoobachitaanzi balimi aabo?” 41 Bakati kulinguwe: “Uzoobanyonyoona bubi nkaambo mbabi loko mpawo muunda wamisaansa uzoowupa bamwi balimi batazoomupe michelo niyabizwa.”
42 Jesu wakati kulimbabo: “Teemwakabala na muMagwalo kuti: ‘Ibbwe ndibakakaka bayaki, lyaba bbwe liyandikana lyaakkona.* Ibbwe eeli lyazwa kuli Jehova* alubo lilagambya mumeso eesu’? 43 Nchindilikumubuzya kuti, muzoonyangwa Bwaami bwaLeza alubo buzoopegwa chisi chizyala michelo yeelede. 44 Alubo muntu uuwida aabbwe eeli, uzootyokooka. Ooyo nguliwida, lizoomuziya.”
45 Bapati babapayizi abaFarisi nibakamvwa zikozyanisyo zyakwe, bakaziba kuti wakali kwaamba mbabo. 46 Nikuba kuti bakali kuyanda kumujata,* bakayoowa nkamu yabantu nkaambo bantu bakali kumubona mbuli mupolofita.