Lwabili kuBakkorinte
10 Ime ndiPawulu, ndilikumukombelezya amoyo uubombede aluzyalo lwaKkristu kuti, nindili aandinywe, ndili muntu waansaansi, pesi ninditali aandinywe, ndili muntu uuli aachibindi. 2 Ndilikumukombelezya kuti, nindazooba aandinywe, nditazoobi aachibindi chakubweza ntaamu zyakubakalalila bamwi babonaanga tweenda mbuli bantu banyama. 3 Nkaambo nikuba kuti tweenda mbuli bantu banyama, tatulwani nkondo kweendelana ambutubede kunyama. 4 Nkaambo zilwanisyo zyesu zyankondo, teezyabantu pe, pesi zili aamanguzu aazwa kuli Leza alubo zimwaya zintu zisimide loko mbuli ngazi. 5 Nkaambo tulikumwaya mizeezo achintu choonse chisumpukide chikazyania aaluzibo lwaLeza, alubo mizeezo yoonse tulikwiitola mubuzike kuti iswiilile Kkristu, 6 alubo tulilibambilide kusubula kutaswiilila koonse, nimwatondeezya kuti mulaswiilila chakumaninina.
7 Mubona zintu kweendelana ambuziboneka mumeso aanu. Kuti muntu kasyoma kuti nguwaKkristu, akayeeyesesye lubo kaambo aaka: Mbukunga nguwaKkristu, andiswe tulibakwe. 8 Nkaambo, nikuba kuti ndayinzilizya mbichaani kulidunda akaambo kamanguzu ngitwakapegwa aaMwaami, aakuti tumuyake kutali kuti tumumwaye, tandikooba aabweeme pe. 9 Nkaambo tandiyandi kuti kubonekaanga ndakali kweezya kumuyoosezya amagwalo aangu. 10 Nkaambo baamba kuti: “Magwalo aakwe malemu alubo alaamanguzu, pesi kuti kaliwo, taakwe manguzu pe alubo nzyaambuula tazigwasyi pe.” 11 Muntu uuli boobo, azibe kuti nzitwaamba mumagwalo katutawo, nzizyo nzitutazoochite kuti twaba nkukooko. 12 Nkaambo tatweezyi kulibikka muchiimo chabantu balilumbayizya naakuti kulyeezyanisya aambabo. Pesi nibalipima kweendelana azyeelelo zyabo alubo nibalyeezyanisya kweendelana ambubabede, zitondeezya kuti tabayeeyi pe.
13 Nikuba oobo, tatukoolidunda kunze aamigaano njitwakapegwa, pesi tulalidunda mumigaano yachilawu nchitwakapiminwa aaLeza kusikila tuzoosike kulindinywe. 14 Kwaamba choonzyo, kuza kulindinywe ooko, tazyaambi kuti tulikwiinzilizya chilawu nchitwakapegwa, nkaambo ndiswe twakasaanguna kuza kulindinywe amakani mabotu aali atala aKkristu. 15 Tatuli kulidunda kunze aamigaano njitwakapegwa, nkukwaamba kulidunda atala amilimu yawumwi muntu, pesi tulangilila kuti lusyomo lwanu lwanooyungizya, anzizyo zintu nzitwakachita muchilawu chesu zinoovula. Mpawo mulimu unooyabuvula, 16 kuchitila kuti twaambilizye makani mabotu munyika zili kule andinywe, kuchitila kuti tutalidundi aazintu zyakachitwa kale muchilawu chawumwi muntu. 17 “Pesi Ooyo uulidunda, alidunde muli Jehova.”* 18 Nkaambo muntu uuyandwa, teeyooyo ulilumbayizya pe, pesi ngooyo uulumbayizigwa aaJehova.*