Lwakusaanguna kuBakkorinte
2 Bakombima, nindakasika kulindinywe kandaambilizya nsiswa iisalala yaLeza, teendakasika kandaambuula majwi aakuyanda kubonenenwa naakuti aabusongo. 2 Nkaambo ndakasala kutaziba chintu nichiba chimwi aakati kanu, kunze kwaJesu Kkristu, akuti wakagankaminwa aachisamu. 3 Alubo ndakasika kulindinywe kanditakwe manguzu, kandiyoowa alubo kandizazama loko, 4 alubo majwi aangu azintu nzindakakambawuka, teezyakali aamajwi aabusongo aakwelelezya, pesi zyakali kutondeezya muuya waLeza amanguzu aakwe, 5 kuchitila kuti mube aalusyomo akaambo kamanguzu aaLeza, kutali akaambo kabusongo bwabantu.
6 Iswe twaambuula busongo aakati kabaabo bakakomena, kutali bwamubwiime bwazintu oobuno* pe naakuti bwabeendelezi bamubwiime bwazintu oobuno, batazoomane. 7 Pesi twaambuula atala abusongo bwaLeza buli munsiswa iisalala, nkukwaamba busongo busisidwe, oobo Leza mbwaakaamba chiindi loko, kakutanaba bwiime bwazintu* kuti tujane bulemu. 8 Busongo oobu, mbubo mbubatazi pe beendelezi bamubwiime bwazintu oobuno,* nkaambo kaansinga bakalibuzi, nikuli teebakamujaya pe* Mwaami uulemekwa. 9 Pesi mbuli mbukulembedwe kuti: “Liso teelyakabona pe akutwi teekwakamvwa pe, alubo taakwe muntu wakayeeya zintu Leza nzyaakababambila aabo bamuyanda.” 10 Nkaambo Leza wakayubunwida ndiswe zintu eezi kwiinda mumuuya wakwe, nkaambo muuya ulayanduulisisya zintu zyoonse, niziba zintu zinikide zyaLeza.
11 Nkaambo aakati kabantu, ngwani uuzi mizeezo yamuntu, kunze kwamoyo wamuntu ooyo? Munzila iikozyenie, taakwe uuzi mizeezo yaLeza kunze kwamuuya waLeza. 12 Iswe teetwakatambula muuya wanyika pe, pesi twakatambula muuya uuzwa kuli Leza, kuchitila kuti tuzibe zintu nzitwakapegwa aaLeza amoyo woonse. 13 Zintu eezi tulazyaamba, kutali amajwi aayiisigwa aabusongo bwabantu pe, pesi amajwi aayiisigwa aamuuya, nitupandulula makani aamuuya katubelesya majwi aamuuya.
14 Pesi muntu wanyama tazitambuli pe zintu zyamuuya waLeza, nkaambo kulinguwe nzyabufuba-fuba alubo takooziziba pe, nkaambo zilangwa-langwa aamuuya. 15 Nikuba oobo, muntu wamuuya ulanga-langa zintu zyoonse, pesi we taakwe muntu uumulanga-langa pe. 16 Nkaambo “ngwani waziba mizeezo yaJehova* zyakuti nga ulamulayilila?” Pesi iswe tuli aamizeezo yaKkristu.