Makani Aakalembwa aaLukka
6 Naakali kwiinda mumyuunda yazilyo musabata, basikwiiya bakwe bakali kupulula zilyo kabalikuzipuka mumaboko kabalikulya. 2 Mpawo bamwi baFarisi bakati: “Nkamboonzi nimulikuchita zintu zitazumizigwi aamulawu muSabata?” 3 Pesi Jesu wakabasandula kuti: “Ani teemwakabala na nzyaakachita Davida abaalumi mbaakalaabo nibakaba aanzala? 4 Taakanjila na mung’anda yaLeza akupegwa zinkwa zyachitondeezyo nzyaakalya akupa zimwi baalumi mbaakali kweendaabo, zitazumizigwi aamulawu kuti ziligwe awumwi muntu kunze kwabapayizi kupela?” 5 Mpawo wakati kulimbabo: “Mwanaamuntu Mwaami waSabata.”
6 Muliimwi sabata, wakanjila muchikombelo mpawo wakasaanguna kuyiisya. Muchikombelo oomo mwakali mwaalumi wakakokonyene kuboko* kwachilisyo. 7 Balembi abaFarisi bakali kulangisisya Jesu kabayanda kubona kuti ulasilika na muSabata, kuchitila kuti bamujanine mulandu. 8 Pesi wakalizizi nzibakali kuyeeya, nkinkaako, wakabuzya mwaalumi wakakokonyene kuboko* kuti: “Nyampuka wiimikile aakati.” Mwaalumi ooyo wakanyampuka mpawo wakayimikila aakati. 9 Mpawo Jesu wakati kulimbabo: “Nibaalumi, ndikumbila kubuzya, zilazumizigwa na amulawu kuchita chintu chibotu naakuti chibi muSabata, kufutula buumi naakuti kunyonyoona?” 10 Naakabalanga boonse, wakati kumwaalumi ooyo: “Tandabika kuboko kwako.” Naakachita oobo, kuboko kwakwe kwakaba kabotu. 11 Pesi bakanyema loko alubo bakasaanguna kubuzyania kuti bamuchite biyeni Jesu.
12 Bumwi buzuba mumazuba aayo, wakazwa waya kuchilundu kuti akakombe, alubo wakabuchesya kalikukomba kuli Leza. 13 Nibwakacha, wakayita basikwiiya bakwe, mpawo aakati kabo, wakasala bali 12 mbaakayita kuti baapostoli. 14 Mazina aabo nguSimoni ngwaakawuzika kuti Petro, amwanikaakwe Andreya, Jakkobo, Johane, Filipi, Bbatolomeyo, 15 Mateyo, Tomasi, Jakkobo mwana wa-Alifasi, Simoni waambwa kuti “musungu,” 16 Judasi mwana waJakkobo aJudasi Isikkariyoti, ooyo wakazoomuuzya.
17 Mpawo wakaseluka ambabo wasika wayimikila aantandabale, alubo kwakali nkamu mpati yabasikwiiya bakwe amakamu aabantu bakali kuzwa kuJudiya yoonse, kuJerusalema akuchilawu chaTire aSidoni chili kumbali aalwizi, bakasikide kuti bazoomumvwe akuponesegwa kumalwazi aabo. 18 Nibaba aabo bakali kukataazigwa aamyuuya mibi bakasilikwa. 19 Bantu boonse bakali kuyanda kumuguma, nkaambo manguzu akali kuzwa mulinguwe kalikubaponia boonse.
20 Mpawo wakalanga basikwiiya bakwe alubo wakasaanguna kwaamba kuti:
“Mulabotelwa inywe nimufwaba nkaambo Bwaami bwaLeza mbubwanu.
21 “Mulabotelwa inywe nimuli aanzala lino nkaambo muzookkuta.
“Mulabotelwa inywe nimulila lino nkaambo muzooseka.
22 “Mulabotelwa inywe kufumbwa chiindi bantu nibamuzonda, nibamwaanda aakati kabo, nibamusampula anibabisya zina lyanu akaambo kaMwanaamuntu. 23 Amubotelwe mubuzuba oobo alubo mukondwe loko nkaambo amubone, bulumbu bwanu mbupati kujulu nkaambo zintu eezi nzizyo masianyinakulu nzibakali kuchita kubapolofita.
24 “Pesi muli aapenzi inywe nimunotede nkaambo mwakujana kale kuumbulizigwa kwanu kukkwene.
25 “Muli aapenzi inywe nimulikukkuta lino nkaambo muzooba aanzala.
“Muli aapenzi inywe nimulikuseka lino nkaambo muzoomoka akulila.
26 “Muli aapenzi nimulumbayizigwa aabantu boonse chiindi choonse, nkaambo eezi nzizyo masianyinakulu nzibakachita kubapolofita bakubeja.
27 “Pesi inywe nimulikuswiilila, ndimubuzya kuti: Amwiinkilile kunembo kuyanda basinkondonyokwe, kubachitila zibotu aabo bamuzonda, 28 kulongezya aabo bamutuka akukombela aabo bamutukila. 29 Ooyo uukuuma lubayi kuseya limwi, mupe limwi alubo muntu uukunyanga chigogo chako chaajulu, utamukasyi achamukati. 30 Muntu woonse uukukumbila, mupe alubo ooyo uukunyanga zintu zyako, utamubuzyi kuti akuboozye pe.
31 “Alubo zintu nzimuyanda kuti bantu bamuchitile, andinywe amubachitile mbuboobo.
32 “Kuti kamuyanda aabo bamuyanda, munooli muyanda kulumbwaanzi biya? Nkaambo nibaba basizibi bayanda babayanda. 33 Alubo kuti kamubachitila zibotu aabo bamuchitila zibotu, munooli muyanda kulumbwaanzi biya? Nibaba basizibi mbubachita ambabo. 34 Kuti kamukweletesya* aabo mbimuzi kuti bazoomubweedezya, munooli muyanda kulumbwaanzi biya? Nibaba basizibi bakweletesya basizibi kuchitila kuti bayiboozegwe kayikkwene. 35 Pesi inywe, amwiinkilile kunembo kuyanda basinkondonyokwe akuchita zibotu akukweletesya kamutalangilili kuti muzooboozegwe pe. Kuti mwachita oobo, bulumbu bwanu bunooli bupati alubo muzooba bana baSijulu Lyamajulu, nkaambo ulabafwida luzyalo batalumbi abasizibi. 36 Amwiinkilile kunembo kubeetelela bamwi, mbuli Wuso mbali aalweetelelo.
37 “Mukuyungizya, amuleke kubeteka kuti andinywe mutabetekwi, alubo amuleke kuyandwiida bamwi mulandu kuti andinywe mutayandwiidwi mulandu. Amwiinkilile kunembo kulekelela* bamwi kuti andinywe mulekelelwe.* 38 Amube aachiyanza chakupa alubo bantu bazoomupa andinywe. Bazootila chipimyo chibotu munkomo zyanu, chisindiidwe, chuumidwe-wumidwe alubo chizwide pamu. Nkaambo chipimyo nchimupimya, nchicho nchibatazoobelesye kuti bamupimine andinywe.”
39 Mpawo wakababuzya chimwi chikozyanisyo, wakati: “Moofu kujana wazulwida moofunyina na? Kabi boonse kabali babili balawida mudindi, teembubo na? 40 Sikwiiya teemupati pe kumuyiisi wakwe pesi muntu woonse uuyiisigwa kabotu ulaba mbuli muyiisi wakwe. 41 Nkinkaako, nkamboonzi nubona kakwa kali muliso lyamukombinyokwe pesi kutaboni tanda lili muliso lyako? 42 Kujana wabuzya mukombinyokwe kuti, ‘Mukombima, teedi ndikugwisye kakwa kali muliso,’ iwe kutabwene tanda lili muliso lyako? Nusikuupa-wupa! Saanguna kugwisya tanda lili muliso lyako, mpawo uzoobona kabotu mbukonzya kugwisya kakwa kali muliso lyamukombinyokwe.
43 “Nkaambo taakwe munsamu mubotu uuzyala michelo iibolede alubo taakwe munsamu uubolede uuzyala michelo mibotu. 44 Nkaambo munsamu umwi awumwi uzibwa aamichelo yawo. Muchikozyano, bantu tabacheli nkuyu kumaamvwa alubo tabacheli masaansa kuchiteyo chamaamvwa. 45 Muntu mubotu ugwisya zintu zibotu kuzwa mubunoti bubotu buli mumoyo wakwe, pesi muntu mubi ugwisya zintu zibi kuzwa mubunoti bubi buli mumoyo wakwe, nkaambo mulomo waambuula zintu zizwide mumoyo.
46 “Nkamboonzi nimundiita kuti, ‘Mwaami, Mwaami,’ pesi kamutazichiti pe zintu nzindaamba? 47 Amuteedi ndimubuzye mbabede muntu woonse uuza kulindime kuti aswiilile majwi aangu akwaachita: 48 Uli mbuli muntu wakayaka ng’anda. Wakasya wabbila mpawo wabikka ntalisyo aamwaala. Mvula mpati niyakawa, mulonga wakeeta, mpawo maanzi akawuminina aang’anda eeyo pesi teeyakazungaana pe nkaambo yakayakidwe kabotu. 49 Pesi kufumbwa muntu uumvwa pesi katachiti chintu, uli mbuli muntu wakayaka ng’anda aanyika kakutakwe ntalisyo. Mulonga nwaakeeta, maanzi akawuminina aang’anda eeyo mpawo yakabuka aakukolomoka alubo kudilika kwayo kwakali kupati.”