Makani Aakalembwa aaLukka
24 Pesi kuseeni loko mubuzuba bwakusaanguna bwamviki, bakasika kukabanda* kabali aatununkilizyo ntubakali balibambila. 2 Nikuba oobo, bakajana bbwe kalili lyakunkulisigwa kuzwa aakabanda* 3 alubo nibakanjila mukati, teebakawujana pe mubili waMwaami Jesu. 4 Kabachigambide akaambo kazintu eezi, lino bona, baalumi babili bakazweete zigogo zing’ayima, bakayimikila mpubakabede. 5 Banakazi aaba bakayoowa mpawo bakayinkilila kunembo kabalangidaansi. Nkinkaako, baalumi aabo bakati kulimbabo: “Nkamboonzi nimulikuyanduula muntu muumi aakati kabantu bafwide? 6 Tawope aano, pesi wabusigwa. Amuyeeye nzyaakamubuzya naakachili kuGalili 7 naakati, Mwanaamuntu weelede kutolwa kuli basizibi ajayigwe aachisamu mpawo azoobuke mubuzuba bwachitatu.” 8 Mpawo bakaayeeya majwi aakwe, 9 alubo bakazwa aakabanda* baakubuzya bali Kkumi Awumwi abamwi boonse zintu zyoonse eezi. 10 Aakati kabanakazi aaba, kwakali Mariya Magadalina, Jowana aMariya banyina aaJakkobo. Alubo bamwi banakazi boonse mbibakalaabo, bakali kubuzya baapostoli zintu eezi. 11 Nikuba oobo, makani aaya akali kubonekaanga taabeleki pe kulimbabo alubo teebakabasyoma pe banakazi aaba.
12 Pesi Petro wakanyampuka, wachijaana kaya kukabanda* alubo naakasondela, wakabona malembo kupela. Mpawo wakazwa weenda kagambide akaambo kazintu zyakali zyachitika.
13 Pesi mubuzuba mbuboobo, basikwiiya babili bakali kuya mumuunzi uutegwa Emawu, musinzo uulampa makkilomita aasika ku 11* kuzwa kuJerusalema. 14 Alubo bakali kuzuwa atala azintu zyoonse eezi zyakali zyachitika.
15 Nibakali kuzuwa akwaambuula atala amakani aaya, Jesu lwakwe wakasika mpawo wakatalika kweendaabo. 16 Nikuba kuti bakamubona pesi teebakamuziba pe. 17 Mpawo wakati kulimbabo: “Nganzi makani aaya ngimulikwaambuula atala angawo nimuyabweenda?” Mpawo bakayimikila kabawuside. 18 Mpawo umwi uutegwa Kkileyopasi wakati kulinguwe: “Ani uli mweenzu na uukkala aalikke muJerusalema* alubo tuzizi na zintu zyakachitika nkukooko mumazuba ngayaaya?” 19 Mpawo wakababuzya kuti: “Zintu zili?” Bakati kulinguwe: “Zintu zili atala aJesu wakuNazareta, ooyo wakatondeezya kuti mupolofita uuli aamanguzu mumajwi amumichito kunembo lyaLeza akunembo lyabantu boonse, 20 ambubakamutola bapati babapayizi besu abeendelezi kuti akapegwe chisubulo chakuti ajayigwe alubo bakamugankamina aachisamu. 21 Pesi twakali kulangilila kuti muntu ooyu nguwe wakali kuzoowangununa ma-Israyeli. Kuyungizya kuli zeezi, sunu mbuzuba bwachitatu zintu eezi kazichitikide. 22 Alubo, bamwi banakazi aakati kesu batugambya loko nkaambo bafuminide kukabanda* 23 alubo nibawubula mubili wakwe, basika kabatubuzya kuti babona chilengaano changilozi, eezyo zyaamba kuti muumi. 24 Mpawo bamwi mbitwalaabo baliinkide kukabanda,* mpawo baakujana kakuli mbuli mbubaambide banakazi aabo pesi we teebamubona pe.”
25 Nkinkaako, wakati kulimbabo: “Inywe nibafuba-fuba, alubo nimuli aamyoyo iitafwambaani kusyoma zintu zyoonse zyakaambwa aabapolofita! 26 Teekwakali kuyandikana na kuti Kkristu aswaane mapenzi aaya akuti anjile mubulemu bwakwe?” 27 Alubo kasaangunina kuli Mozesi akuBapolofita boonse, wakabapandulwida zintu zili atala anguwe kuzwa muMagwalo woonse.
28 Kumamanino bakasika aafwiifwi amuunzi nkubakali kuya, mpawo we wakachitaanga uyanda kwiindilila. 29 Pesi bakamukombelezya kuti atayindi kabati: “Kkala aandiswe, nkaambo lyabbila kale, kwasiya.” Mpawo wakanjila kuti akkalaabo. 30 Naakali kulyaabo,* wakabweza chinkwa, wachilongezya, wachikwamuna mpawo wakasaanguna kubapa. 31 Mpawo meso aabo akajulika alubo bakamuziba, pesi wakabulika. 32 Mpawo bakabuzyania kuti: “Myoyo yesu teeyalikupya na mukati, naalikwaambuula aandiswe munzila, kalikutupandulwida Magwalo munzila iimvwisisika?” 33 Aachiindi nchicheecho, bakanyampuka babweeda kuJerusalema mpawo bakajana bali Kkumi Awumwi abaabo mbibakabungenaabo, 34 aabo bakati: “Kwaamba choonzyo, Mwaami wabusigwa alubo waboneka kuli Simoni!” 35 Mpawo bakababuzya zintu zyakachitikide munzila ambubakamuziba naakakwamuna chinkwa.
36 Nibakachili kwaambuula zintu eezi, we lwakwe wakayimikila aakati kabo mpawo wakati kulimbabo: “Amube aaluumuno.” 37 Pesi akaambo kakuti bakakankama alubo bakayoowa, bakayeeya kuti babwene chilenge chamuuya. 38 Nkinkaako, wakati kulimbabo: “Nkamboonzi nimukataazikene alubo nkamboonzi nimwazumbuuzya mumyoyo yanu? 39 Amubone maboko aangu amawulu aangu. Ndime biya. Amundijate mubone. Chilenge chamuuya tachikwe nyama amafuwa, mbuli mbumubwene kuti ime ndilaazyo.” 40 Naakali kwaamba zintu eezi, wakabatondeezya maboko aakwe amawulu aakwe. 41 Pesi kabatanasyoma akaambo kakubotelwa akugamba, wakati kulimbabo: “Mulaachakulya na aano?” 42 Mpawo bakamupa kapanzi kamuswi kayokedwe, 43 mpawo wakakabweza, wakalya kabamubwene.
44 Mpawo wakati kulimbabo: “Aaya ngimakani ngindakamubuzya nindakachili aandinywe aakuti, zintu zyoonse zilembedwe atala andime muMulawu waMozesi, muBapolofita amuNtembawuzyo, zyeelede kuzuzikizigwa.” 45 Mpawo wakajula mizeezo yabo kuti bamvwisisisye zyaambwa aaMagwalo 46 alubo wakababuzya kuti, “Eezi nzizyo zilembedwe: kuti Kkristu wakali kuzoopenzegwa, mpawo azoobuke kuzwa kubafu mubuzuba bwachitatu 47 akuti kwiinda muzina lyakwe, makani aakuti bantu basanduke kuchitila kuti balekelelwe zibi, azookambawukwa muzisi zyoonse, kusaangunina kuJerusalema. 48 Muzooba bakamboni bazintu eezi. 49 Alubo amubone, ndizoomutumizya eecho Taata nchaakasyomezya. Nikuba oobo, inywe amukkale mumuunzi kusikila muzoozwaatikwe manguzu aazwa kujulu.”
50 Mpawo wakabazulwida kusika kuBbetaniya alubo wakatambika maboko wabalongezya. 51 Naakachili kubalongezya, wakaanzaanisigwa kulimbabo mpawo wakatolwa kujulu. 52 Mpawo bakamufugamina, babweeda kuJerusalema kabakondwa loko. 53 Alubo chiindi choonse bakali mutempele, kabalikutembawula Leza.