Petro Wachibili
2 Nikuba oobo, kwakali bapolofita bakubeja aakati kabantu, munzila iikozyenie, kuzooba bayiisi bakubeja aakati kanu. Chakusisikizya bayiisi aaba bazooyeta tubunga tunyonyoona, alubo bazoomukaka munaabo wakabawula, kabalyeetela lunyonyooko chakufwambaana. 2 Mukuyungizya, bantu biingi bazootobela michito yabo iitondwa,* alubo akaambo kambabo, nzila yakasimpe izoowambuulwa bubi. 3 Alubo, bazoomweena kababelesya majwi aakubeja akaambo kakutangala kwabo. Pesi lubeta lwabo lwakasalwa chiindi loko, talulikunonoka pe, alubo lunyonyooko lwabo talulikoona pe.
4 Kwaamba choonzyo, Leza taakaleka pe kuzisubula ngilozi zyakabisya, pesi wakaziwaalila muTatarasi* akuzyaanga aancheni zyamudima* uusiya mbi kuti zibambilwe kubetekwa. 5 Alubo taakaleka pe kwiisubula nyika yachiindi, pesi wakabamba Nowa mukambawusi wabululami kakwabilidwe aamwi abamwi bali musanu ababili, aawo naakeeta zambangulwe kubantu bakatali kuyoowa Leza. 6 Alubo myuunzi yaSodoma aGomora wakayipa mulandu kwiinda mukwiinyonyoona kusikila yaba dyota, kababikkila chikozyano chazintu ziza, bantu bakatali kuyoowa Leza. 7 Alubo wakavuna Loti mululami, ooyo wakali kukataazikana loko atala amichito iitondwa yakali kuchitwa aabantu* bataswiilili mulawu— 8 nkaambo buzuba abuzuba, mwaalumi ooyo uululeme wakali kupengaana loko mumoyo wakwe akaambo kamichito mibi njaakali kubona akumvwa, naakakkede aakati kabo. 9 Nkinkaako, Jehova* ulikuzi kubavuna kuzwa mumasunko bantu balipedelede kulinguwe, akubamba bantu bataluleme kuti bazoonyonyoonwe mubuzuba bwalubeta, 10 kapati aabo bayanda kubisya mibili yabamwi, abaabo batalemeki bweendelezi.*
Bali aachibindi alubo balalisumpula, tabayoowi pe kwaambuula zintu zibi atala abaabo balemekwa, 11 nikuba kuti ngilozi zilisimide alubo zili aamanguzu miingi, tazibapi mulandu pe kwiinda mukubaambila majwi mabi akaambo kakuti zilamulemeka Jehova.* 12 Pesi bantu aaba, mbuli banyama batayeeyi babelesya maanu aakulengwaawo alubo bazyalilwa kujatwa akunyonyoonwa, baambuula bubi atala azintu nzibatazi pe. Bazoonyonyoonwa akaambo kanzila zyabo zyalunyonyooko, 13 bazoojana bulumbu bwamachise kuzwa kunzila zyabo zyamachise.
Kulabanoneezya kupona buumi bwakulikondelezya niliba sikati. Bantu aaba ntubata abubi, balikondelezya munjiisyo zyabo zyalweeno chiindi nibapobola aamwi andinywe. 14 Meso aabo azwide bumambi alubo tabakonzyi pe kuleka chibi, alubo boongelezya aabo batakkalinkene pe. Bali aamyoyo yakayiisigwa kutangala. Mbana batukidwe. 15 Basiya nzila iiluleme, bapambulwa. Batobela nzila yaBbalamu mwana waBbewoli, ooyo wakayanda bulumbu bwakuchita zintu zibi, 16 pesi wakalulamikwa akaambo kakuchita zintu zitaluleme. Munyama uutaambuuli uubweza zibbudu, wakaambuula ajwi lyamuntu kuti umulesye kuchita zintu zyakupenga nzyaakali kuyanda kuchita mupolofita ooyu.
17 Bantu aaba ntusawu tutakwe maanzi asikunku uupupulwa aaguwo pati, alubo mudima uusiya mbi ubambilidwe mbabo. 18 Baambuula majwi aakulisumpula aatagwasyi. Kwiinda mukuchita zintu zikwelelezya kunyama akuchita michito iitondwa,* boongelezya bantu bachizwa kukufutuka kuli baabo bapona muzibi. 19 Nikuba kuti balikubasyomezya lwaangunuko, bo lwabo mbazike bakubola, nkaambo kuti umwi muntu wazundwa awumwi muntu, uba muzike wakwe.* 20 Kwaamba choonzyo, kuti kabali bakafutuka kuzintu zitasalali zyanyika kwiinda muluzibo lwachoonzyo lwaMwaami aMufutuli Jesu Kkristu mpawo baliswaanizya lubo muzintu nzizeezyo akuzundwa aanzizyo, mamanino aabo alabija loko kwiinda mbubakabede kumasaangunino. 21 Zyali kunoobota loko kaansinga teebakayiziba kabotu nzila yabululami, kwiinda kuti nibayiziba bafutatile mulawu uusalala ngubakatambula. 22 Nzikaamba kasimpi kachoonzyo zyachitika kulimbabo: “Munkala wabweedela malusi aakwe alubo ngulube yakali yasanzigwa, yabweeda lubo kuyoobumbuluka mumatope.”