Makani aakalembwa aaMakko
7 BaFarisi abamwi balembi bakazwide kuJerusalema bakamubunganina. 2 Mpawo bakabona bamwi basikwiiya bakwe kabalikulya amaboko aali aadoti, nkukwaamba kuti kabatasambide* kumaboko. 3 (Nkaambo baFarisi amaJuda boonse tabalyi pe kuti teebasamba kumaboko kusika kutukokola, batobelezya tunsiya-nsiya twamasianyinakulu, 4 alubo kuti bazwa kumisika, tabalyi pe kuti teebasamba. Kuli tumwi tunsiya-nsiya twiingi ntubakatambula alubo ntubakakatide, tuli mbuli kunika nkomeki, nongo, azibelesyo zyakkopa* mumaanzi.) 5 Nkinkaako, baFarisi aaba abalembi bakamubuzya kuti: “Nkamboonzi basikwiiya bako nibatatobelezyi tunsiya-nsiya twabantu bachiindi, pesi balya chakulya chabo amaboko aabo aali aadoti?” 6 Wakati kulimbabo: “Isaya wakali kwaamba choonzyo naakapolofita atala andinywe nibasikuupa-wupa, mbuli mbukulembedwe kuti, ‘Bantu aaba balandilemeka amilomo yabo, pesi myoyo yabo ili kule andime. 7 Kundikomba nkubachita nkwabuyo, nkaambo bayiisya milawu yabantu mbuli kuti ninjiisyo zyaLeza.’ 8 Mwaleka mulawu waLeza mpawo mwakakatila kutunsiya-nsiya twabantu.”
9 Mukuyungizya wakati kulimbabo: “Chabuchenjezu, mwatondeezya kutaba aandaba amulawu waLeza, kuchitila kuti mutobelezye tunsiya-nsiya twanu. 10 Muchikozyano, Mozesi wakati, ‘Lemeka wuso abanyoko,’ akuti, ‘Muntu uutukila wisi naakuti banyina, weelede kujayigwa.’ 11 Pesi inywe mwaamba kuti, ‘Kuti muntu wabuzya wisi naakuti banyina kuti: “Kufumbwa chintu nchindilaacho chikonzya kumugwasya, nikkobbani (nkukwaamba kuti, nchipo chibambilidwe kupegwa Leza),”’ 12 tamuchimuzumizyi pe kuti achitile wisi naakuti banyina chintu chimwi biyo. 13 Nkinkaako, mwapa kuti jwi lyaLeza litagwasyi akaambo katunsiya-nsiya twanu ntumulikuyiisya bantu. Alubo muchita zintu zyiingi zili mbuli zeezi.” 14 Nkinkaako, naakaayita lubo makamu aabantu kulinguwe, wakati kulimbabo: “Amundiswiilile moonse, mumvwisisisye nchaamba makani aaya. 15 Taakwe chintu chili aanze aamuntu chinjila mulinguwe chikonzya kupa kuti atasalali pe, pesi zintu zizwa mumuntu nzizyo zipa kuti atasalali pe.” 16 *——
17 Naakanjila mung’anda kule abantu, basikwiiya bakwe bakasaanguna kumubuzya atala achikozyanisyo. 18 Nkinkaako wakati kulimbabo: “Andinywe tamulikumvwisisisya pe mbuli mbabo? Tamuzi na kuti taakwe chintu chili aanze aamuntu, chinjila mulinguwe chikonzya kupa kuti atasalali, 19 mbukunga chinjila mwida kutali mumoyo wakwe alubo chilazwa chiye muchimbuzi?” Nkinkaako, wakatondeezya kuti chakulya choonse chilasalala. 20 Mukuyungizya, wakati: “Zintu zizwa mumuntu, nzizyo zipa kuti atasalali. 21 Nkaambo kuzwa mukati, mumoyo wamuntu, muzwa mizeezo mibi: bwaamu,* kubba, kujaya, 22 bumambi, kutangala, milimu mibi, lweeno, michito iitondwa,* liso lilaamunyono, kusampula, kulisumpula, abufuba-fuba. 23 Zintu zibi zyoonse eezi, zizwa mukati alubo nzizyo zipa kuti muntu atasalali.”
24 Jesu wakanyampuka mpawaawo mpawo wakaya kuchilawu chaTire aSidoni. Nkukooko, wakanjila muli imwi ng’anda alubo taakwe muntu ngwaakali kuyanda kuti azibe, pesi bantu bakaziziba. 25 Aachiindi nchicheecho, umwi mwanakazi wakali aamwana musimbi wakali aamuuya mubi, wakamvwa atala anguwe, mpawo wakasika waliwaala kumawulu aakwe. 26 Mwanakazi ooyo wakali muGrikki wakazyalilwa kuFonikke yakuSiriya alubo wakaliswini kumukumbila kuti atande dimoni lyakali mumwanaakwe. 27 Pesi Jesu wakati kulinguwe: “Leka bana bakkute saansi, nkaambo tazili kabotu pe kubweza chinkwa chabana akuchiwaalila tunkala.” 28 Pesi mwanakazi ooyo wakamusandula kuti: “Iiyi mwaami, nituba tunkala tuli munsi aatebbulu, tulya bufwefwelenga bulosegwa aatwana.” 29 Mpawo Jesu wakati kulinguwe: “Akaambo kakuti waamba zintu eezi, yinka, dimoni lyazwa mumwanaako.” 30 Nkinkaako, mwanakazi ooyo wakayinka kumuunzaakwe, mpawo wakajana mwanaakwe kalede aabulo alubo dimoni lyakali lyazwa.
31 Jesu naakali kuboola kuzwa kuchilawu chaTire kaya kuLwizi lwaGalili, wakayinda muSidoni amuchilawu chaDekkapoli.* 32 Kali nkukooko,* bakamweetela umwi mwaalumi wakatali kumvwa kumatwi alubo wakatali kukonzya kwaambuula kabotu, mpawo bakakombelezya Jesu kuti amubikke kuboko. 33 Jesu wakamutola kumbali kule akwakali nkamu yabantu. Mpawo wakanjizya minwe yakwe mumatwi aamwaalumi ooyo alubo naakaswida mate, wakaguma lulimi lwamwaalumi ooyo. 34 Naakalanga kujulu, wakayoyela aajulu mpawo wakati kulinguwe: “Efata,” nkukwaamba kuti, “Sinkuka.” 35 Mpawo matwi aakwe akasinkuka alubo penzi lyakwe lyakutaambuula kabotu lyakamana, mpawo wakasaanguna kwaambuula kabotu. 36 Mpawo wakabachenjezya kuti batabuzyi muntu pe, pesi naakali kubabuzya oobo, bakayungizya kwaambilizya makani aaya. 37 Kwaamba choonzyo, bantu bakagamba loko mpawo bakati: “Zintu zyoonse wazichita kabotu. Nibaba bantu batamvwi kumatwi wapa kuti bamvwe akuti zimuumu zyaambuule.”