Makani mabotu aakalembwa aaMateyo
6 “Amuchenjelele kuti bululami bwanu mutabutondeezyi kunembo lyabantu kuti bamubone, nkaambo Wuso uuli kujulu takamupi bulumbu pe. 2 Kuti kamulikupa zipo zyalweetelelo,* mutalizyi mweembo kunembo lyanu mbuli mbubachita basikuupa-wupa muzikombelo amumigwagwa kuti balumbayizigwe aabantu. Kwaamba choonzyo, ndimubuzya kuti, babujana kale bulumbu bwabo bukkwene. 3 Pesi inywe, chiindi nimupa zipo zyalweetelelo, mutazumizyi kuti kuboko kwanu kwachimweensi kuzibe zilikuchitwa aakuboko kwanu kwachilisyo, 4 kuchitila kuti zipo zyanu zyalweetelelo zitabonwi. Mpawo Wuso uubona zintu zisisikene, uzoomupa bulumbu.
5 “Alubo chiindi nimukomba, mutachiti mbuli mbubachita basikuupa-wupa, nkaambo bayandisya kukomba kabayimvwi muzikombelo ampiiswaanana migwagwa mipati, kuchitila kuti babonwe aabantu. Kwaamba choonzyo, ndimubuzya kuti, babujana kale bulumbu bwabo bukkwene. 6 Pesi chiindi nuyanda kukomba, njila mung’anda yako, ujale mulyango, mpawo ukombe kuli Wuso uutabonwi aabantu. Mpawo Wuso uubona zintu zisisikene, uzookupa bulumbu. 7 Chiindi nukomba, utanooyindululi majwi aakozyenie mbuli mbubachita bantu bazisi, nkaambo bayeeya kuti balamvwigwa kuti babelesya majwi miingi. 8 Nkinkaako, mutabi mbuli mbabo pe, nkaambo Wuso ulizizi nzimuyanda nikuba kamutanamukumbila pe.
9 “Nkinkaako, mweelede kukomba munzila eeyi:
“‘Taateesu uuli kujulu, alisalazigwe zina lyako. 10 Abuze Bwaami bwako. Akuchitwe kuyanda kwako aanyika mbuli kujulu. 11 Tupe sunu chakulya chesu chabuzuba oobuno, 12 alubo utulekelele zibi zyesu mbuli mbutubalekelela aabo batubisizya. 13 Utatunjizyi mumasunko pe, pesi utuvune kumubi.’
14 “Nkaambo kuti kamulekelela bantu milandu yabo, anguwe Wuso wakujulu uzoomulekelela, 15 pesi kuti kamutalekeleli bantu milandu yabo, anguwe Wuso tazoomulekeleli pe milandu yanu.
16 “Nimulyiimya kulya, amuleke kusyulungania kumeso mbuli mbubachita basikuupa-wupa, nkaambo balekelezya kumeso kwabo, kuchitila kuti baboneke kubantu kuti balikulyiimya kulya. Kwaamba choonzyo, ndimubuzya kuti, babujana kale bulumbu bwabo bukkwene. 17 Pesi inywe, chiindi nimulyiimya kulya, amulinanike mafuta kumutwe alubo musambe kumeso, 18 kuchitila kuti mutaboneki kuti mulikulyiimya kulya kubantu, pesi kuti mubonwe aaWuso uubona zintu zyoonse. Mpawo Wuso uubona zintu zisisikene, uzoomupa bulumbu.
19 “Amuleke kulibunganisizya bunoti aanyika, aawo mpubulyigwa aazyuuka* angula alubo aawo basikubba mpubanjila akububba. 20 Pesi amulibunganisizye bunoti kujulu, nkubutalyigwi aazyuuka angula alubo ooko basikubba nkubatanjili kuti babbe. 21 Nkaambo ooko kuli bunoti bwako, nkuunoobede moyo wako.
22 “Lambe lyamubili ndiso. Nkinkaako, kuti liso lyako kalilangide chintu chimwi,* mubili wako woonse ulaba mumuni.* 23 Pesi kuti liso lyako kalili aamunyono,* mubili wako woonse ulaba mudima. Kuti mumuni uuli mulinduwe kawuli mudima choonzyo, mudima ooyo unooli mupati loko!
24 “Taakwe muntu uukonzya kubelekela basimalelo babili, nkaambo uzoozonda umwi mpawo ayande umwi, naakuti uzookakatila kuli umwi mpawo aleke kulemeka umwi. Tamukonzyi pe kubelekela Leza aBunoti.
25 “Mukaambo aaka ndimubuzya kuti: Amuleke kukataazikana atala abuumi bwanu, kuti muzoolyaanzi naakuti muzoonywaanzi, naakuti atala amibili yanu kuti, muzoozwaataanzi. Buumi tabuyandikani loko na kwiinda chakulya, amubili kwiinda zyakuzwaata? 26 Amulangisisye bayuni bakujulu, tababyali mbuto, tabatebuli, alubo tababambi chakulya mumatala, nikuba oobo, Wuso wakujulu ulabasanina. Inywe tamuyandikani loko na kwiinda mbabo? 27 Ngwani aakati kanu uukonzya kulampya buumi bwakwe naaba aaniini* akaambo kakukataazikana? 28 Alubo, nkamboonzi nimukataazikana atala azyakuzwaata? Amwiiye chiiyo kunzila maluba aamulusaka njaakomenaayo, taabeleki pe alubo taasumi pe, 29 pesi ndimubuzya kuti, naaba Solomoni mubulemu bwakwe boonse, taakwe naakazwaata munzila mbotu mbuli limwi lyawo. 30 Kuti Leza kazwaatika zimena zyamulusaka munzila eeyi, ziliwo sunu mpawo juunza zyawaalilwa mumulilo, mubonaanga takamupi zyakuzwaata na, inywe nimuli aalusyomo luniini? 31 Nkinkaako, mutakataazikani kamwaamba kuti, ‘Tulalyaanzi?’ naakuti ‘Tulanywaanzi?’ naakuti ‘Tulazwaataanzi?’ 32 Nkaambo zintu zyoonse eezi nzizyo zilikwaandililwa aazisi. Wuso wakujulu ulizi kuti mulaziyanda zintu zyoonse eezi.
33 “Nkinkaako, amwiinkilile kunembo kusaanguna kuyanduula Bwaami abululami bwakwe mpawo zimwi zintu zyoonse eezi, zizooyungizigwa kulindinywe. 34 Nkinkaako, mutakataazikani pe atala abuzuba butobela, nkaambo buzuba butobela bunooli aamakataazyo aabo. Buzuba bumwi abumwi buli aamapenzi aabo aabweelede.