Chiyubunuzyo chaJohane

4 Nizyakayinda zintu eezi, ndakalanga, mpawo ndakabona mulyango uujulikide kujulu, alubo jwi lyakusaanguna ndindakamvwa kalyaambuula aandime, lyakali mbuli kulila kwamweembo, lyakati: “Tanta, uze ookuno, mpawo ndilakutondeezya zintu zyeelede kuchitika.” 2 Nizyakayinda zintu eezi, chakufwambaana ndakaba mumanguzu aamuuya, lino bona, chuuno chabwaami chakali aandawu yacho kujulu, alubo umwi muntu wakalikkede aachuuno chabwaami eecho. 3 Alubo Ooyo wakakkede mpawaawo wakali kulibonia mbuli bbwe lyajaspa abbwe lyasadiyasi,* alubo chuuno chabwaami chakazyungulukidwe aafulichoongo uuli mbuli bbwe lya-emarawudi.

4 Chuuno eecho chabwaami chakazyungulukidwe aazyuuno zyabwaami zili 24, alubo aazyuuno eezyo zyabwaami ndakabona baalu bali 24 bakakkede aalinzizyo kabazweete zigogo zituba, alubo kumitwe yabo bakazweete ngowani zyabwaami zyangolida.* 5 Kuchuuno chabwaami kwakali kuzwa tulabi amajwi akudilima alubo kwakali malambe aamulilo aali musanu aabili aakali kuyaka kunembo lyachuuno chabwaami, alubo malambe aayo ayiminina myuuya yaLeza iili musanu ayibili. 6 Kunembo lyachuuno chabwaami kwakali chimwi chintu chili mbuli lwizi lwagilazi, chili mbuli bbwe lyakkristali.

Aakati kachuuno chabwaami* alubo kuzyunguluka chuuno chabwaami eecho, kwakali zilenge zyuumi zine zyakazwide meso kunembo akusule. 7 Chilenge chuumi chakusaanguna chakali mbuli mulavu, chilenge chuumi chachibili chakali mbuli pule wang’ombe uuchili muniini, chilenge chuumi chachitatu chakali aakumeso kuli mbuli kwamuntu, alubo chilenge chuumi chachine chakali mbuli gumbe lyuuluka. 8 Chimwi achimwi chazilenge eezi zyuumi zine, chakali aamababa aali musanu alimwi, aakazwide meso koonse-koonse, kuswaanizya amunsi. Alubo chiindi choonse sikati amansiku, zyaamba kuti: “Ulasalala, ulasalala, ulasalala Jehova* Leza, Singuzuzyoonse, ooyo wakaliwo, uuliwo alubo uuliikuza.”

9 Kufumbwa chiindi zilenge zyuumi nizipa bulemu, alulemeko akulumba kuli Yooyo uukkede aachuuno chabwaami, Ooyo uupona kusikila kukabe kutamani, 10 baalu bali 24 nga bawidaansi kunembo lyaYooyo uukkede aachuuno chabwaami, akukomba Ooyo uupona kusikila kukabe kutamani, alubo nga bawaala ngowani zyabo zyabwaami* kunembo lyachuuno chabwaami, kabati: 11 “Uleelela Jehova* Leza wesu, kutambula bulemu alulemeko amanguzu, nkaambo wakalenga zintu zyoonse, alubo akaambo kakuyanda kwako, zintu eezi zyakabawo alubo zyakalengwa.”