Makani aakalembwa aaMakko
6 Wakazwa nkukooko mpawo wakasika muchilawu chakulimbabo alubo basikwiiya bakwe bakamutobela. 2 Niyakaba Sabata, wakasaanguna kuyiisya muchikombelo alubo bantu biingi bakamumvwa, bakagamba loko mpawo bakati: “Muntu ooyu wakazijana kuli zintu eezi? Nkamboonzi naakapegwa busongo buli boobu amanguzu aali boobu aakuchita milimu iigambya? 3 Ooyu mubezi, mwana waMariya amukulana waJakkobo aJosefa aJudasi aSimoni, teembubo na? Alubo bachizi bakwe balaamwi andiswe, teembubo na?” Nkinkaako, teebakamusyoma pe. 4 Pesi Jesu wakati kulimbabo: “Mupolofita ulalemekwa koonse-koonse kunze kwamuchilawu chakulimbabo, akubabbululu bakwe akuli bamung’anda yakwe.” 5 Nkinkaako, taakakonzya kuchita kufumbwa mulimu uugambya mundawu eeyo, kunze kwakubikka maboko aabantu bache bakali kuchiswa akubasilika. 6 Kwaamba choonzyo, wakagamba loko akaambo kakubula lusyomo kwabo. Mpawo wakazyunguluka myuunzi yoonse kayabuyiisya.
7 Mpawo wakayita bali Kkumi Ababili alubo wakasaanguna kubatuma kabali babili-babili alubo wakabapa manguzu aakutanda myuuya mibi. 8 Alubo wakabapa malayilile aakuti batabwezi chintu pe mulweendo, kunze kwankoli kupela, batabwezi chinkwa, chikwama chakubikkila chakulya, amali* muzikwama zyabo, 9 pesi kuti bazwaate manyatela akuti batazwaati zigogo zibili.* 10 Mukuyungizya wakati kulimbabo: “Kufumbwa ng’anda njimunjila, amukkale mumo kusikila mukazwe mundawu eeyo. 11 Alubo kufumbwa kundawu nkubataleke kumutambula naakuti kumuswiilila, nimwazwa nkukooko, amukunkumune lusuko kumawulu aanu kuti bube bukamboni kulimbabo.” 12 Mpawo bakayinka baakukambawuka kuti bantu beelede kusanduka, 13 alubo bakatanda madimoni miingi, alubo bantu biingi bakali kuchiswa bakabananika mafuta akubasilika.
14 Mwaami Herodi wakamvwa atala azintu eezi nkaambo zina lyaJesu lyakali lyazibinkana loko alubo bantu bakali kwaamba kuti: “Johane Mubbabbatizi wabusigwa kuzwa kubafu, milimu iigambya nchiilikuchitika kwiinda mulinguwe.” 15 Pesi bamwi bakali kwaamba kuti: “Ngu-Elija.” Nikuba oobo, bamwi bakali kuti: “Mupolofita uuli mbuli bapolofita bachiindi.” 16 Pesi Herodi naakamvwa zintu eezi, wakati: “Johane ngundakadyunkula mutwe, kweelede nguwe wabusigwa.” 17 Nkaambo Herodi wakali watuma bantu kuti bakajate Johane, bamusunge akuti bamubikke mujele akaambo kaHerodiyasi, mwanakazi waFilipi mwananyina, nkaambo wakali wamukwata. 18 Nkaambo Johane wakali kukkala kabuzya Herodi kuti: “Mulawu tawuzumini pe kuti ukkale aamwanakazi wamwananyokwe.” 19 Nkinkaako, Herodiyasi wakamwaangilide nkoto alubo wakali kuyanda kumujaya pesi taakali kukonzya pe. 20 Nkaambo Herodi wakali kumuyoowa Johane, nkaambo wakalizi kuti muntu uululeme alubo uusalala alubo wakamubambide kabotu. Naakali kumuswiilila, wakali kubula kuti ulachita biyeni, nikuba oobo, wakali kwiinkilila kunembo kumuswiilila kabotelwa.
21 Pesi buzuba bulikabotu bwakasika, chiindi Herodi naakababambila chilalilo balupati-pati, bapati bamasoja abaalumi bakuGalili balaampuwo, mubuzuba bwakwe bwakuzyalwa. 22 Mwana musimbi waHerodiyasi wakanjila wazyana mpawo wakabotezya Herodi abantu mbaakali kulyaabo.* Mpawo mwaami wakati kumusimbi ooyo: “Ndibuzye nchuyanda, mpawo ndilakupa.” 23 Mpawo wakakonkezya kumusimbi ooyo kati: “Kufumbwa nchutaambe ndilakupa, kusikila kuhafu yabwaami bwangu.” 24 Musimbi ooyo wakazwa mpawo wakabuzya banyina kuti: “Ndikumbileenzi?” Mpawo bakati: “Mutwe waJohane Mubbabbatizi.” 25 Musimbi ooyo wakabweeda chakufwambaana kumwaami mpawo wakati: “Ndiyanda kuti lino undipe mutwe waJohane Mubbabbatizi kawuli mundido.” 26 Nikuba kuti eezi zyakapa kuti mwaami awuse, pesi wakasala kuti amupe nzyaakali wakumbila akaambo kazikonke zyakwe abeenzu bakwe.* 27 Nkinkaako, mwaami wakatuma mulindi mpawaawo, wamulayilila kuti akeete mutwe waJohane. Mpawo wakayinka waakumudyunkula mutwe mujele, 28 mpawo wakaza aamutwe waJohane kawuli mundido. Wakawupa musimbi mpawo musimbi wakawupa banyina. 29 Basikwiiya bakwe nibakazimvwa, bakasika babweza mubili wakwe mpawo bakawulazika mukabanda.*
30 Baapostoli bakabungana kuli Jesu mpawo bakamubuzya zintu zyoonse nzibakali bachita akuyiisya. 31 Mpawo wakati kulimbabo: “Atuye kundawu iitakwe bantu mukapumune mbichaani.” Nkaambo kwakali bantu biingi bakali kusika akwiinka alubo basikwiiya teebakachilikwe chiindi chakupumuna nichiba chakulya. 32 Nkinkaako, bakatanta bwaato baya kundawu iitakwe bantu kuti bakabe aabalikke. 33 Pesi bantu bakababona kabali kwiinka alubo bantu biingi bakaziziba, mpawo kuzwa mumyuunzi yoonse, bakachijaana amawulu mpawo bakabasaangunina kusika. 34 Naakali kuseluka, wakabona nkamu mpati yabantu alubo wakabeetelela nkaambo bakali mbuli mbelele zitakwe mweembeli. Mpawo wakasaanguna kubayiisya zintu zyiingi.
35 Aachiindi eecho, chiindi chakali chayinka, mpawo basikwiiya bakwe bakasika kulinguwe mpawo bakati: “Ookuno nkulusaka, alubo chiindi chayinka. 36 Babuzye beende, kuchitila kuti baye mutuunzi tuli aafwiifwi amumyuunzi kuti bakalyuulile chakulya.” 37 Wakabasandula kuti: “Inywe amubape chakulya.” Mpawo bakati kulinguwe: “Twiinke na tukawule zinkwa zyamadinari aali 200 mpawo tuzoope bantu balye?” 38 Wakati kulimbabo: “Mulaazinkwa zingana? Amukalange!” Nibakalanga bakati: “Zili musanu abaswi babili.” 39 Mpawo wakalayilila bantu boonse kuti bakkale aamasokwe kabali mutubunga. 40 Nkinkaako, bakakkala mutubunga twabantu bali 100 atwabali 50. 41 Naakabweza zinkwa zili musanu abaswi babili, wakalanga kujulu walumba. Mpawo wakakwamuna zinkwa akusaanguna kuzipa basikwiiya kuti bazibikke kunembo lyabantu alubo baswi babili wakabaabanisya bantu boonse. 42 Nkinkaako, boonse bakalya bakkuta 43 alubo bakabwezelela chakulya chakasyaala mpawo bakazuzya mabbasikiti aali 12 kutabala baswi. 44 Aabo bakalya zinkwa bakali baalumi bali 5 000.
45 Mbubakamaninsya biyo, wakabuzya basikwiiya bakwe kuti bajane butanta bwaato baye mutala, aafwiifwi akuBbetisayida, we naakachili kubuzya bantu kuti beende. 46 Pesi naakalaya kubantu, wakaya kukukomba kuchilundu. 47 Nikwakasiya, bwaato bwakali aakati kalwizi pesi we wakali aalikke aanyika njumu. 48 Nkinkaako, naakababona kabali kukachilwa kweenzya bwaato akaambo kaguwo lyakali kuzwida nkubakali kuya, wakaya kulimbabo ku-awa yachine yakulinda kwamansiku,* kayabweenda aajulu aamaanzi mulwizi pesi wakali kuyanda kwiindilila. 49 Nibakamubona kalikweenda aajulu aalwizi bakati: “Niinzi eechi?” Mpawo bakakwiila. 50 Nkaambo boonse bakamubona alubo bakakataazikana. Pesi wakaambuulaabo mpawaawo kati: “Amube aachibindi! Ndime, mutayoowi pe.” 51 Mpawo wakanjila mubwaato mubakabede, mpawo guwo lyakawumuna. Eezi zyakabagambya loko, 52 nkaambo teebakalinamvwisisisya pe nchizyiiminina zinkwa pesi myoyo yabo yakalitindibede mukumvwisisisya.
53 Nibakazubuka akusika aanyika njumu bakasika kuGenesareti, mpawo bakaangilila bwaato kumbali aalwizi. 54 Pesi mbubakazwa biyo mubwaato, bantu bakamuziba. 55 Mpawo bakachijaana-chijaana muchilawu eecho choonse mpawo bakasaanguna kweeta bantu bakali kuchiswa kababanyampwide aamalo kababatola ooko nkubakali kumvwa kuti nkwabede. 56 Alubo kufumbwa muunzi, muunzi mupati naakuti kawunzi mwaakali kunjila, bantu bakali kubikka bantu bachiswa kumisika alubo bakali kumukombelezya kuti bantu bachiswa bajate biyo mupeto wachigogo chakwe chaajulu. Bantu boonse bakawujata, bakapona.