Chiyubunuzyo chaJohane
12 Mpawo kujulu kwakaboneka chitondeezyo chipati: Mwanakazi, wakazweete zuba alubo mweezi wakali kunsi aamawulu aakwe, alubo kumutwe wakwe kwakali ngowani yabwaami iili* aanyenyeezi zili 12, 2 alubo wakali aada. Wakali kulila akupengaana akaambo kamachise ngaakamvwide naakali kuyanda kutumbuka.
3 Kujulu kwakaboneka chimwi chitondeezyo. Lino bona! Kwakali nzoka mpati iiyoosya iisalala mbuli mulilo, iili aamitwe iili musanu ayibili ameja aali kkumi alubo yakali aangowani zyabwaami zili musanu azibili* kumitwe yayo, 4 alubo muchila wayo wakali kukwela chipanzi chatatu chanyenyeezi zyakujulu, mpawo yakaziwaalila aanyika. Nzoka eeyo yakaliimvwi kunembo lyamwanakazi wakali kuyanda kutumbuka, kuchitila kuti naatumbuka, inyonyoone mwanaakwe.
5 Mpawo mwanakazi ooyo wakatumbuka mwana mulombe, wachaalumi, ooyo uutazooyembele zisi zyoonse ankoli yansimbi. Alubo mwanaakwe wakavupwidwa kuli Leza akuchuuno chakwe chabwaami. 6 Mpawo mwanakazi ooyo wakachijila munkanda, ooko nkwali aandawu njaakabambilwa aaLeza, ooko nkubakali kuzoomusanina kwamazuba aali 1 260.
7 Mpawo kwakabuka nkondo kujulu: Mikkayeli* angilozi zyakwe bakalwana aanzoka eeyo, alubo nzoka eeyo angilozi zyayo bakalwana aambabo 8 pesi teebakazunda pe,* alubo teebakachilikwe ndawu pe kujulu. 9 Nkinkaako, nzoka eeyo mpati yakawaalwa, nzoka yakusaanguna iitegwa Dyabbulosi aSaatani, ooyo uulikweena bantu boonse bakkala aanyika, wakawaalilwa aansi aanyika, alubo ngilozi zyakwe zyakawaalilwa aansi aamwi anguwe. 10 Mpawo ndakamvwa jwi pati kujulu kaliti:
“Lufutuko, manguzu, bwaami bwaLeza wesu abweendelezi bwaKkristu wakwe, zyasika, nkaambo sikutamikizya bakombima wawaalilwa aansi, ooyo uubatamikizya sikati amansiku kunembo lyaLeza wesu. 11 Alubo bakamuzunda akaambo kaganzi lyaMwanaambelele alubo akaambo kajwi lyabukamboni bwakwe, alubo teebakabuyanda pe buumi bwabo nikuba kuchiindi nibakalangene aalufu. 12 Akaambo kamakani aaya, amubotelwe nimajulu andinywe nimukkala mulingawo! Ilaapenzi nyika alwizi, nkaambo Dyabbulosi waseluka kulindinywe kanyemede loko, nkaambo ulizi kuti wasyaalilwa aachiindi chifwiifwi.”
13 Nzoka eeyo niyakabona kuti yawaalilwa aansi aanyika, yakapenzya mwanakazi wakali watumbuka mwana wachaalumi. 14 Pesi mwanakazi ooyo wakapegwa mababa aabili aagumbe pati, kuchitila kuti awuluke aye munkanda kundawu yakwe, ooko nkwayelede kusaninwa kwachiindi aziindi ahafu yachiindi,* kule akwakali nzoka.
15 Mpawo nzoka eeyo yakaluka maanzi aali mbuli mulonga kusule aamwanakazi, kuchitila kuti mwanakazi ooyo ayinkile mumulonga ooyo. 16 Pesi nyika yakasika kuti izoogwasye mwanakazi ooyo, mpawo yakaasama, yamena mulonga wakali walukwa aanzoka. 17 Nkinkaako, nzoka eeyo yakamunyemena loko mwanakazi ooyo, mpawo yakayinka kuti ikalwane aabana bamwanakazi basyeede, aabo babamba milawu yaLeza alubo bali aamulimu wakupa bukamboni atala aJesu.