KuBa-efeso
3 Akaambo kakaambo aaka, ime ndiPawulu musungwa waKkristu Jesu akaambo kandinywe nibantu bazisi— 2 kuti mwakalimvwide choonzyo atala amulimu wabulangizi waluzyalo lupati lwaLeza ngundakapegwa akaambo kandinywe, 3 kuti kwiinda muchiyubunuzyo, ndakazibisigwa nsiswa iisalala mbuli mbundakamulembela mubufwiifwi muchiindi chayinda. 4 Nkinkaako, mwanoobala makani aaya, mulakonzya kubona mbundiimvwisisisya nsiswa iisalala iili atala aKkristu. 5 Mulaamwi mazyalani, nsiswa eeyi teeyakazibisigwa pe kubana babantu, mbuli mbuyayubununwa lino amuuya kubaapostoli basalala akubapolofita. 6 Nsiswa eeyi njakuti: Kwiinda mukujatanaamwi aKkristu Jesu alubo kwiinda mumakani mabotu, bantu bazisi beelede kuba basikukonaamwi anguwe akuba zipanzi zyamubili uumwi akujana chaabilo chachisyomezyo aamwi andiswe. 7 Ndakaba mubelesi wansiswa eeyi, kweendelana achipo chitabbadalwi chaluzyalo lupati lwaLeza nchindakapegwa kwiinda mukubeleka kwamanguzu aakwe.
8 Ime ndimuniini kubasalali boonse, ndakapegwa luzyalo oolu lupati, kuchitila kuti ndaambilizye makani mabotu aali atala abunoti bwaKkristu butamvwisisiki kubantu bazisi, 9 akuti ndigwasye muntu woonse kuti abone mbiilikweendelezegwa nsiswa iisalala, yakasisidwe kwachiindi chilamfu muli Leza, ooyo wakalenga zintu zyoonse. 10 Eezi zyakaba oobo, kuchitila kuti, kwiinda mumbungano, mfulumende abeendelezi bali mundawu zyakujulu, bazibisigwe atala ambububeleka munzila zyiingi zisiyene-siyene busongo bwaLeza. 11 Eezi zyeendelana aamakanze aatamani ngaakakanza atala aKkristu Jesu Mwaami wesu, 12 ooyo uupa kuti tube aalwaangunuko oolu lwakwaambuula akuti twaangunuke kusika kuli Leza katutayoowi pe, akaambo kalusyomo ndutulaalo mulinguwe. 13 Nkinkaako, ndilikumukumbila kuti mutabweedi musule pe akaambo kamapenzi ngindilikuswaana akaambo kandinywe, nkaambo aamba bulemu bwanu.
14 Akaambo kakaambo aaka, ndafugama kuli Taata, 15 ooko mpuli zyoonse zili kujulu azili aanyika nkuzijana mazina aazyo. 16 Ndikombela kuti, kwiinda mubulemu bwakwe bupati, Leza asimye muntu ngumubede mukati, kwiinda mumanguzu aamuuya wakwe, 17 akuti kwiinda mulusyomo lwanu, Kkristu akkale mumyoyo yanu muluyando. Amusimpe miyanda, muzyate aantalisyo, 18 kuchitila kuti inywe abasalali boonse, mukonzye kubumvwisisisya chakumaninina busasa, bulamfu, bulamfu bwakuya mujulu abubbile 19 akuti muzibe luyando lwaKkristu lwiinda luzibo, kuchitila kuti muzuzigwe akuzula koonse nkwapa Leza.
20 Kuli yooyo uukonzya kuchita zintu zyiingi loko kwiinda zintu zyoonse nzitukumbila naakuti nzituyeeyela kweendelana amanguzu aakwe aalikubeleka mulindiswe, 21 akube bulemu kwiinda mumbungano alubo kwiinda muli Kkristu Jesu mumazyalani woonse kusikila kukabe kutamani. Ameni.