Detoronomi
6 “Eeyi njiimilawu amalayilile anzila zyakubeteka, Jehova Leza wanu nzyaakalayilila kuti ndimuyiisye, kuchitila kuti mukazibambe nimwazubuka akunjila munyika njimutazoobweze, 2 kutegwa muyoowe Jehova Leza wanu akubamba malayilile aakwe amilawu yakwe yoonse njindili kumulayilila—inywe abana banu abazukulu banu—mumazuba woonse aabuumi bwanu, kuchitila kuti mupone mazuba miingi. 3 Amuswiilile nima-Israyeli, muzibambe kabotu, kuchitila kuti muzwidilile akuti muvule munyika iikunka malili abuchi, mbuli mbaakamusyomezya Jehova, Leza wamasianyookulu.
4 Swiilila O Israyeli, Jehova Leza wesu nguJehova uumwi. 5 Weelede kuyanda Jehova Leza wako amoyo wako woonse abuumi bwako boonse amanguzu aako woonse.* 6 Majwi ngindili kukulayilila sunu ayelede kuba mumoyo wako, 7 weelede kwaayiisya bana* bako akwaambuula atala angawo chiindi nukkede mung’anda, nuyenda mumugwagwa, nuwoona anubuka. 8 Weelede kwaasunga kukuboko kwako kuti abe chiyeekezyo alubo ayelede kuba mbuli chakwaanga aankumu yako. 9 Uwalembe aaminsende* yamulyango wako akumageedi aako.
10 Jehova Leza wako aazookunjizya munyika njaakakonkezya kumasianyookulu, nkukwaamba Abbrahamu, Izakka aJakkobo kuti uzookupa—nyika iili aamyuunzi mipati mibotu njutayakide pe, 11 maanda azwide zintu zyoonse zibotu nzutabelekede pe amigodi yamaanzi njutasyide pe amyuunda yamisaansa amisamu yama-olifa njutabyede pe—waakulya akukkuta, 12 ukachenjelele kuti utamulubi pe Jehova ooyo wakakugwisya munyika ya-Ijipita, mung’anda yabuzike. 13 Jehova Leza wako ngunguwe ngweelede kuyoowa, ngunguwe ngweelede kukomba alubo weelede kukonka muzina lyakwe. 14 Utatobeli bamwi baleza pe, nibaba baleza bazisi zyoonse zikuzyungulukide, 15 nkaambo Jehova Leza wako uuli aakati kanu, nguLeza uuyanda kukombwa biyo alikke. Kuti teewachita oobo, bukali bwaJehova Leza wako bulakuvutukila alubo ulakunyonyoona aanyika.
16 “Mutasunki Jehova Leza wanu mbuli mbumwakamusunka kuMasa. 17 Mweelede kusungwaalila kubamba milawu yaJehova Leza wanu aziyeekezyo zyakwe amalayilile aakwe ngaakamulayilila kuti mwaabambe. 18 Weelede kuchita ziluleme alubo zibotu mumeso aaJehova, kuchitila kuti uzwidilile akuti ukanjile akubweza nyika mbotu eeyo Jehova njaakakonkezya kumasianyookulu, 19 akutanda basinkondonyokwe boonse kunembo lyako mbuli mbaakasyomezya Jehova.
20 “Kuti mwanaako azookubuzye kuti, ‘Nkamboonzi Jehova Leza wesu naakakupa ziyeekezyo, malayilile anzila eezi zyakubeteka?’ 21 weelede kumusandula kuti, ‘Twakali bazike baFaro mu-Ijipita, pesi Jehova wakatugwisya mu-Ijipita akuboko kuli aamanguzu. 22 Jehova wakali kuchita zitondeezyo azigambyo zipati zinyonyoona mu-Ijipita, kuli Faro akubantu boonse bamung’anda yakwe katulangide. 23 Wakatugwisya munyika akutweeta aano kuti atupe nyika njaakakonkezya kumasianene. 24 Mpawo Jehova wakatulayilila kuti tutobele malayilile woonse aaya akuti tuyoowe Jehova Leza wesu, kuchitila kuti zitweendele kabotu akuti tupone mbuli mbutubede sunu. 25 Tuyoowambwa kuti tuliluleme kuti twaswiilila Jehova Leza wesu akwiibamba kabotu milawu yakwe yoonse eeyi mbuli mbaakatulayilila.