KuBaroma
16 Ndilikumuzibisya atala aFebbi muchizi wesu, uubeleka mumbungano iili kuKkenikkriya, 2 kuchitila kuti mumutambule muMwaami mbuli mbukweelela basalali alubo mumugwasye muli zyoonse nzyatakwaazyo pe, nkaambo wakakwabilila bantu biingi kuswaanizya andime.
3 Amundijuzizye Prisikka a-Akkwila, babelesima muli Kkristu Jesu, 4 bakabikka buumi bwabo* mungozi akaambo kangu. Ndibalumba loko alubo mbungano zyoonse zyabantu bazisi zilikubalumba. 5 Alubo amujuzye mbungano iinjilila mung’anda yabo. Amujuzye Epinetasi uuyandwa, muchelo wakusaanguna waKkristu ku-Asiya. 6 Amujuzye Mariya, ooyo wakabeleka changuzu akaambo kandinywe. 7 Amujuzye babbululu bangu, Andronikka aJuniyasi mbindakasungidwe aabo, baalumi mbibazi kabotu baapostoli alubo baba aachiindi chilamfu kabajisini aaKkristu kwiinda ndime.
8 Amundijuzizye Ampiliyato uuyandwa muMwaami. 9 Amujuzye Uribbanasi mubelesima muli Kkristu, aStakku uuyandwa. 10 Amujuzye Apele uusyomeka muli Kkristu. Amujuzye bamung’anda ya-Aristobbulo. 11 Amujuzye bbululu wangu Herodiyoni. Amujuzye bamung’anda yaNakkiso, bali muMwaami. 12 Amujuzye Trayifina aTrayifosa, banakazi balikubeleka changuzu muMwaami. Amujuzye Pesisi muchizi wesu uuyandwa, nkaambo wakabeleka changuzu muMwaami. 13 Amujuzye Rufasi uusalidwe muMwaami alubo amujuzye banyina, mbindibona kuti mbaama andime. 14 Amujuzye Asunikkrito, Filegoni, Hemesi, Patrobba, Hemasi abakombima balaamwi ambabo. 15 Amujuzye Filologo aJuliya, Neriyasi amuchizi wakwe,* a-Olimpa, abasalali boonse balaamwi ambabo. 16 Amujuzyanie amyonto iisalala. Mbungano zyaKkristu zyoonse zilikumujuzya.
17 Lino ndilikumusungwaazya bakombima, kuti mubachenjelele aabo bapa kuti kube kwaanzaana abapa kuti bamwi balebwe kwiinda mukwaamba zintu zisiyene anzimwakayiya. Amubatantamuke. 18 Nkaambo bantu bali boobo, mbazike bazintu ziyandwa aamyoyo yabo,* kutali baMwaami wesu Kkristu alubo kwiinda mukwaambuula bunonoono akubelesya majwi aakwelelezya, boongelezya myoyo yabaabo balyiibide. 19 Kuswiilila kwanu kwazibinkana abantu boonse alubo eezi zindipa kubotelwa. Nikuba oobo, ndiyanda kuti mube bantu bachenjede mukuchita zintu zibotu pesi mutabi aamulandu mukuchita zintu zibi. 20 Nkaambo Leza ooyo uupa luumuno, uzoopwachula Saatani kunsi aamawulu aanu muchiindi chifwiifwi. Luzyalo lupati lwaMwaami wesu Jesu alube aandinywe.
21 Timoti mubelesima ulikumujuzya alubo babbululu bangu Lukkiya, Jasoni aSosipata balikumujuzya.
22 Ime ndiTetiyasi ndalemba lugwalo oolu, ndilikumujuzya muMwaami.
23 Gayo ooyo ngundisikilide aamuunzaakwe, ooko mbungano yoonse nkwiinjilila, ulikumujuzya. Erastasi uubamba mali* yamuunzi ulikumujuzya, kuswaanizya amwanikaakwe* Kkwatasi. 24 *——
25 Kuli yooyo uukonzya kumusimya kweendelana amakani mabotu ngindaambilizya, akukambawuka atala aJesu Kkristu nkundichita, kweendelana akuyubununwa kwansiswa iisalala yakasisidwe kuzwa chiindi, 26 pesi lino yayubununwa alubo yazibinkana kwiinda muMagwalo aabupolofita aakati kazisi zyoonse, kweendelana amalayilile aaLeza uuliwo lyoonse, uuyanda kuti tuswiilile kwiinda mulusyomo, 27 kuli Leza, musongo alikke, akube bulemu kwiinda muli Jesu Kkristu kukabe kutamani. Ameni.