Lwakusaanguna kuBakkorinte

13 Kuti kandaambuula milaka yabantu ayangilozi pesi kanditakwe luyando, ndinooli ndaba mbuli mulangu uusabila naakuti nsimbi iili kuumwa. 2 Kuti kandili aachipo chakupolofita alubo kandimvwisisisya nsiswa zisalala zyoonse alubo kandili aaluzibo loonse alubo kandili aalusyomo loonse lukonzya kusunzulusya* zilundu, pesi kanditakwe luyando, tandigwasyi pe.* 3 Alubo kuti ndapa bantu zintu zyangu zyoonse kuti balye alubo kuti ndapa mubili wangu kuchitila kuti ndilidunde, pesi kanditakwe luyando, taakwe nchizigwasya pe.

4 Luyando luli aamoyo mulamfu alubo luli aaluzyalo. Luyando talukwe bbivwe pe. Talulidundi pe, talulisumpuli pe, 5 talulijati munzila iitali kabotu, taluliyandwiidi nziluyanda, talufwambaani kunyema, talubambi zintu zibi.* 6 Talubotelwi aakutalulama, pesi lubotelwa aakasimpe. 7 Lulakakatila muzintu zyoonse, lusyoma zintu zyoonse, lulangilila zintu zyoonse, lulalisimya muzintu zyoonse.

8 Luyando talumani pe. Pesi kuti kazili zipo zyakupolofita, zizoomana, kuti kazili zipo zyakwaambuula mundimi* zizoomana, kuti kaluli luzibo luzoomana. 9 Nkaambo tuli aaluzibo lutamaninide pe alubo tupolofita munzila iitamaninide pe, 10 pesi eezyo zimaninide zyaakusika, zitamaninide zizoomana. 11 Nindakachili mwana, ndakali kwaambuula mbuli mwana, ndakali kuyeeya mbuli mwana, ndakali aamaanu aabwana. Pesi lino mbukunga ndakomena, ndazisiya zintu zyabwanike-nike. 12 Nkaambo lino tatuboni kabotu akaambo kagilazi lyansimbi pesi kuchiindi eecho, kuzooba mbuli kuti tulibwenene. Luzibo ndundilaalo lino talumaninide pe pesi kuchiindi eecho, ndizooziba kabotu* mbuli mbandizi kabotu andime. 13 Nikuba oobo, lino kusyeede zintu eezi zitatu: lusyomo, bulangilizi, luyando, pesi chipati kwiinda zintu zyoonse eezi, nduyando.